同事問我，近日所發生的事，乜嘢令我最開心，是不是股市大升，或者美國開始減息？我話這兩件事都非常之好，但不是令我最開心的事，香港能夠切低新加坡，重返金融中心三甲，紐倫港重現，相信唔單止我，有不少人都好開心。老實說，我想也沒有想到可以切低新加坡，重有兩分咁多，距離英國只是一分，大家努力，下次排名分分鐘是紐港倫。

同事又問，點解香港可以重返三甲？據所見所聞，香港政府又幫唔到乜嘢手，最多搞吓街頭夜繽紛，唔似得新加坡，隨意一揮，就請咗Taylor Swift嚟，新加坡政府每場補貼兩百萬美元，不過是叫好叫座，搞到新加坡街頭日夜繽紛，最近，一級方程式又在新加坡舉行，已經十幾二十年，香港政府自己知道做唔到，就算想做都會俾市民鬧到失魂，所以，香港政府學老子，以老子思想管理香港。

老子在道德經講「治大國若烹小鮮」，意思是冇事就唔好搞佢，香港政府只要為市民搭一個平台，大家可以做生意搵錢，市民可以生存，不但人可以自出自入，錢亦可以自由出入，做生意的人又唔使應酬官員，全世界都冇幾多個地方好似香港，所以，香港重返三甲亦是理所當然的。

同事話，外電報道，滙豐銀行房地產壞帳急升四點六倍，達三十二億美元，投資者擔心壞帳陸續增加，所以對投資滙豐有所保留，近日股市大升，滙豐股價好似老僧入定，郁都唔郁，究竟滙豐有冇危險？

我夠膽講，百分之百是冇危險，首先那些不是房地產壞帳，而是房地產貸款違約，而三十二億美元違約貸款，借貸比率是百分之五十五，即是有五十八億美元房地產，如果滙豐老總有讀「道德經」，知道治大國若烹小鮮，做生意也是一樣，客戶抵押品足夠，又準時還款，冇事就唔好搞佢哋。唔知點解，不單止滙豐，香港所有銀行都將煮緊的小魚翻來翻去，令到不少小魚甩皮甩骨，香港差不多所有銀行以地產價格下跌為理由，向借貸比率只得四至五成、而又準時還款的客戶call loan，搞到不少客戶要賣走自用甚至自住物業，來滿足call loan要求。

但仍然有部分客戶未能滿足銀行要求，被銀行列入房地產貸款違約，而那些貸款違約，全部都有足夠抵押品，市值很少超過貸款金額六成，最壞就是賣樓還貸，基本上唔可以稱為壞帳。今次被外媒捉字虱，違約貸款變成壞帳，令人感覺到香港的金融體制並非十分建全，沒有資格做紐倫港。所以，銀行應盡快向外界解釋，房地產貸違約並非壞帳，如果銀行冇call loan，那些「壞帳」根本不會出現，現在搞到啲小海鮮爛晒，才醒覺到治大國若烹小鮮，冇事就唔好搞佢啦。