有不少人在假日就會北上消費，包括公司部分同事，於是我問他們，點解要北上消費？答案不是平，而是很開心，雖然同樣服務商品比香港是平了一大截，但如果唔開心，一定不會北上消費。

有一日，我跟同事北上消費，首先去買燒味，同事買一百元叉燒，準備下午茶的時間食，燒臘檔刀手秤完之後話九十五，但如果在香港買一百元叉燒，秤完之後一定話一百零五，如果嫌多，話只要一百元，刀手就會切一大出嚟，最後客人都要死死地氣畀多五元，買埋切了出嚟的那叉燒。

有同事買了一個單位，當日裝修完工，大家一齊去收樓兼食叉燒。同事話，裝修老闆擔保用中山沙溪工人，裝修費是貴了一點，當時報價是十五萬，今日收樓，他多帶幾萬，準備找多出嚟尾數。根據香港經驗，以報價收樓，真係萬中無一，收多兩成已經是很有良心，最後裝修費是十四萬八，有兩千元剩。同事話請裝修老闆去食飯，老闆話應該佢請，得幾個人，兩千元食唔晒。

距離晚飯時間還有很多，同事話新屋入伙，要去超市買嘢，去到超市，好似劉姥姥入大觀園，真係目不暇給。或者，始終是有新鮮感，同事們買到不亦樂乎，畀多少錢便可以搵速遞送到香港，對北上購物，雖然同事很開心，但我有多少保留，同事們買咗咁多嘢，的確是慳了不少錢，但我覺得有不少是用不着，最後只是浪費。但這是見仁見智問題，同事話既然上到嚟，唔買番夠本，才是浪費。老實說，消費購物，最緊要開心，如果買得少覺得唔開心，就要買多啲，做生意，最緊要是顧客開心，黑口黑面，在國內已經一早被炒，只有在香港才會被人話有性格。

到了晚飯時間，裝修老闆帶我們去食海鮮，的確比香港平，但質素就差很遠。裝修老闆話，質素好的食材都去香港，在國內，一般餐廳只有次級食材，一級食材唔係冇，而係消費比香港更高，所以，他們不時都會去香港食好嘢。裝修老闆講得對，雖然在復活節期間，有八十萬港人外遊，對餐飲業影響很大，業界估計少了兩至四成生意，但對高級餐廳、會所等就唔係咁大影響，有部分高級日本餐廳的生意反而非常好，因為國內禁止日本海產進口，內地人如果想食高級魚生，最方便快捷就是嚟香港。最後埋單一千零十二元，餐廳不但沒有收加一小費，而且抹去十二元，只收一千元，我相信在香港很難搵到這類餐廳，區區十二元就令到同事們非常開心，這個做法值得香港的餐廳去學，不過唔知學唔學得到。

回程時大家都很，我亦不打擾他們，獨自閉目養神，當日的確是一個好經驗，但偶一為之還可以，如果每個星期都要北上消費，真係慘過返工，我唔係話大家不用擔心，當香港人覺得厭倦，就會留港消費，其實不一定，如果服務業唔提高質素，仍然黑口黑面，又怎會令香港人留低消費，反而很快就會被執笠關注組關注。