做人情有公價，封利是都有。星島同頭條早前做咗一項關於利是嘅網上調查，八千名受訪者中，近六成預算以三千蚊或以下作為利是開支。派幾大封則親疏有別，最多人封紅衫魚畀仔女；親戚就派五十元；而同事則封廿蚊利是。另外，每逢農曆新年大家都會對樓下管理員表示心意，調查顯示一般都會派廿蚊。

陸叔祝讀者龍年福氣滿屋、龍馬精神。

封利是疏爽定手緊，或能反映社會經濟狀況。呢項調查問到公司年尾有否派發花紅及雙糧，逾六成受訪者表示無，獲派雙糧者不足兩成。事實上，自去年初本港疫情趨緩，各行各業憧憬復常，可惜經濟復甦力度未如預期，上年香港全年GDP低於市場預期，營商環境前景未明之下，公司出手難免審慎。

我覺得派利是豐儉由人，不論青蟹定紅衫魚，甚或電子利是，都代表一份心意同祝福。諗返細個時𢭃嘅利是一般都係一蚊、兩蚊，當時收利是真係好開心，但唔好以為我係想攞利是錢去使，其實當時家貧，每逢過年見到媽媽為買應節用品和封利是，真係左度右度，樣樣都掹掹緊。於是我𢭃到利是都會自動自覺交畀媽媽，而佢就會用我哋啲利是錢「循環再封」，咁至過到個年關。

唔知係咪細個見到媽媽要精打細算，我好早已經當收到嘅利是係收入，而且仲會即刻用手「甩」下封利是，睇下對方係畀一蚊、兩蚊，定係極罕有嘅大手筆紙幣（五蚊、十蚊），抑或係薄薄嘅一毫、兩毫，然後向媽媽暗示，等佢派出「相應」嘅利是。假如對方仔女多，媽媽仲會按人數計算應該派幾多。喺呢個策略之下，我同媽媽每年嘅利是收支不單平衡，仲通常有淨回報。

到我中學入讀英皇書院，學校落啲就係海味街，我放學會等埋媽媽一齊落去，嗰度有啲親戚開舖，媽媽可以用較平價錢買少少海味過節。可能有人會覺得，既然屋企環境唔好，不如留家唔消費，點解仲要過節同拜年？呢點除咗因為潮州人好注重親情，過年點都要聚下，亦反映當時大家對過年非常重視，點困難都要好好度歲。

我七○年入大學之後幫人補習，每個月都搵到成千蚊，開始畀家用媽媽，過年無咁手緊就可以自己keep住利是錢。到七七年畢業四年後，我一升上Officer就結婚，第一年派利是都好肉痛，雖然當時公價都係兩蚊、五蚊、十蚊，但總覺得自己本來「贏」開變「輸」。後來諗返我自己收利是時嘅快樂，咁派畀人即係令人開心，轉個心境又變得樂在其中。

有仔女之後佢哋𢭃到利是，雖然我唔會要佢哋上繳，但都幫佢哋開銀行戶口，將利是錢放入去儲起，自細養成儲蓄習慣。咁多年總結我並無從利是中「獲利」，但有關嘅回憶都係甜嘅，所謂千金難買少年窮，呢段經歷令我更珍惜所有，遇到困難亦更加能夠積極面對。