有美資公司客戶送了兩張上星期日的邁阿密波飛畀我，仲表明一票難求，我多口問一句，美斯會不會出場，客戶話人頭博芋頭，美斯一定出場，最後美斯竟然甩底，陪三萬八千球迷一齊睇美職聯，如果講水準大概應該是英乙，如果一場英乙有咁多人睇，我諗每一個球員都會爭住落場兼踢甩髀。

事情經過幾日沉澱，大家亦有一個概念，邁阿密以及主辦機構是有心玩香港政府，美斯唔落場並不是有甚麼傷患，而是羞辱香港，但美斯應該知道，事情到了最後，被羞辱的應該是他自己。除了一些移英港人之外，全世界就算連台灣民進黨都沒有支持美斯，主辦機構有見及此，亦立刻急急忙忙撤回香港政府的一千六百萬元贊助申請，其實，主辦機構唔應該撤，因為這代表自己毁約，唔使再打官司，一定輸梗。

講返場比賽，不但有很多內地人來港睇波，就算是香港，亦有很多一家四口一齊睇波，到後來小朋友的失望大家亦可想而知，如果美斯是一個喜歡將自己快樂建築在別人痛苦身上的人，我相信今次他不但做得到，而且做得很好，不過就一世英名盡喪，對於他來說，似乎不值得。

美國人又點睇?雖然美國政府要打壓香港，扶植新加坡為國際金融中心，但所有美國人都不恥美斯行為，甚至有美國人認為美職聯應該同美斯割席，美斯知道又唔知有何感想？

其實香港的球迷要求很低，只要美斯係咁咦出場淨踢十分鐘，大家都收貨，但美斯堅持唔踢，大家都冇符，現在全世界都冇人支持，相信他明白所做的決定是錯的。

執筆當日，日本仍然催谷美斯門票，估計有不少人不值美斯所為，亦有不少人擔心美斯不會落場而決定唔買飛。畢竟，一個失信的人要再取得別人信任是很困難的。

如果有人問我今年美斯會不會再次取得球王名銜，今次輪到我人頭博芋頭，無論是世界足聯或者足協都唔會將一個咁值得尊重的名銜頒畀一個咁唔值得尊重的人。

星期一早上回到公司，有一個特大的禮物籃，是由送波飛畀我的美資公司客戶送給我，並且話非常之對不起，令我浪費了一個星期日下午。老實說，我的確冇所謂，但有不少球迷是從內地來港．甚至遠至新疆都有，美斯的確欠支持者一個交代，在退休前蒙上一個污點。