三、四十年前有一套戲叫《的士司機》，講一個人搭的士，經常畀的士司機玩，例如當他截車時，的士司機慢駛到他身邊，那人滿心歡喜以為可以搭到的士，誰不知還未開心完，的士就絕塵而去，有時候由於的士要停紅綠燈，他可以追到那架的士，的士司機立刻冚旗，如是者試過不知幾多次，最後那人動了殺機，隨機殺了幾個的士司機，但講大家都唔會相信，竟然有不少人同情那位殺手。

近日同事、朋友都不知有幾多人遇上類似情況，所不同的，當年香港的經濟是黃金年代，市民收入豐厚，資產快速增值，的士司機收入追唔上，難免產生妒忌之心，拒載、冚旗只是一種下意識發洩行為。今時今日，香港經濟環境只可以講勉勉強強過得去，的士司機收入比很多人好得多，而且又不用交稅，點解仲要冚旗揀客？的士冚旗這個問題已經幾十年，唔通香港政府冇晒辦法？

有老友話，這純粹是一個政治問題，不少的士團體是非常支持政府，在不同場合聚會，一定請高官講返兩句，正是投桃報李，政府對於的士冚旗揀客視而不見，睇唔到的問題就不是問題，所以在政府官員的工作手冊裏，並沒有的士冚旗揀客這回事，反而行人亂過馬路，就要罰款二千大元。

的士團體要求加價，理由很奇怪，就是加價之後司機有合理收入，才可以提供服務，我覺得這不是理由，而是恐嚇。不過，我是同意的士加價，而且不設上限，加幾多都可以，只要一個條件，就是不能夠冚旗揀客，現在只是要求加五元，效果是不會顯著，加價之後市民仍然搭唔到的士，咁樣不如唔好加。

的士行業投訴政府唔取締Uber，令他們收入減少。其實，的士已經可以冚旗揀客，代表唔憂做，點解重要取締Uber，我擔心取締Uber之後，更多的士冚旗揀客。其實，Uber與的士客路不同，就好似西隧同紅隧一樣，不少人貪方便寧願畀一倍價錢行西隧，而搭Uber的人，多付一倍車費都唔止，有咁大空間，的士稍為提高些少質素，便可以搶走Uber生意，又何須要政府立例取締Uber。

我問自己個私人司機點解唔揸的士，是否的士司機收入少過私人司機？我的司機話，應該的士司機收入多私人司機兩三成，不過就有風險成本，例如抄牌、撞車等，到最後可能是差不多。所以，不少年紀較細的人不願做的士司機，現在的的士司機大多數是七老八十，對乘客安全亦有一定風險，如果不能吸引年輕人入行，倒不如讓的土公司輸入外勞，由的士公司規定唔可以冚旗揀客，才有機會根治揀客這個問題。老實說，的士司機是要面對旅客，以現在的質素根本唔合格，倘若太過維護的士行業，連冚旗揀客都唔理，最後受損的是香港，以及香港人。