今年極端天氣頻生，連月既有超強颱風襲港，又有五百年一遇世紀黑雨，引發多區水浸。其中黃大仙成為重災區，黃大仙中心北館更遭洪水攻陷，地庫全層水浸，其後消防同渠務署馬上派員抽走商場積水，而負責商場清潔嘅豐盛生活服務（0331）亦動員逾百員工參與清潔行動，迅速清理完畢等商舖可以點算損失。

豐盛生活服務副主席林煒瀚（右二）。

事實上，物管公司嘅角色越趨重要，隨本港商住樓宇落成量持續攀升，清潔、保安、機電工程，乃至環保管理嘅需求都有增無減，今次特別搵豐盛生活服務副主席林煒瀚（Patrick）傾下偈。

豐盛主攻物業管理、清潔維修同機電工程服務，喺三頭馬車拉動下，近月發布嘅全年業績見到健康增長。截至今年六月底財年收入按年升一成一至七十七億元（港元，下同）；純利多賺百分之四至近五點二億元，若撇除政府補助，純利亦達四點四億元。公司派息向來不俗，全年派息四點五八毫，派息比率維持四成。由上市至今每股股息總額已達二點三六元，等同當年招股價八成六，單計收息已將近回本。

其中綜合生活服務收入升幅最為顯著，按年增約一成六，佔總收入近半。旗下客戶包括賽馬會、會展、亞博，以及香港大球場等，Patrick話最近港府積極舉辦大型活動，如國際級展覽會同香港夜繽紛，將進一步推升保安、清潔同技術支援等需求。另外，香港未來十年預計有四十三萬伙公私營房屋落成，加上樓宇強制維修如火如荼，有利公司吸納新合約。

至於業績展望，集團疫後中標理想，單計今年中標合約金額已達八十七億元，按年激增五成五；而手頭合約則達二百三十億元，亦按年增長二成四，創歷史新高。根據弗若斯特沙利文調查報告，以本地第三方物管公司市場計算，不論物業管理或綜合生活業務，豐盛生活服務市佔率都屬龍頭之列，市場領導地位穩固。

為提升整體營運效率，集團近年加強科技運用，如透過物聯網技術，物管人員可利用手機系統實時更新巡邏狀況，或以文字、聲音、相片或影片實時匯報事件，方便後台人員調配人手。另引進航拍機監測外牆同喉管漏水情況，減低入屋檢查嘅不便。

人力資源係物管行業重要一環，不過業內一直存在人手老化兼短缺問題。Patrick坦言疫後請人確有困難，所以承接新項目都要認真考量。為吸納新血和挽留員工，管理層出盡法寶，如提供彈性上班時間、深化內部培訓、建立以人為本嘅企業文化。另因應近年致命工業意外頻生，加強保障員工職安健，並以人工智能監察工地，締造安全工作環境。目前集團有近二萬四千員工，比上年高出五千人。管理龐大團隊有何方法?我相信喺公司logo中嘅「人」字可以搵到答案。