公司同事問我申請一筆五萬元旅遊費，目的地是深圳，全公司同事及家人可以在深圳享受一個晚上。大多數同事知道我並不主張無緣無故返深圳消費，認為太浪費時間，所以認為我一定會拒絕，但想唔到我立刻大筆一揮，批准那筆旅遊費，令到不少同事大跌眼鏡。我話如果大家申請去深圳食一餐晚飯，我一定唔會批准，理由是太過倒算，我記得阿嫲經常話大食唔窮倒算窮，使錢唔緊要，但千祈唔好倒算。
我細個時，阿嫲見我消夜食雲吞麵，立刻將個妹仔鬧了一餐，阿嫲並不是鬧妹仔幫我買雲吞麵，而是點解碗麵咁淋，失了雲吞麵爽脆特色。妹仔好似被人冤枉咁回答，她見到隔籬街的雲吞麵不但平一毫子，而且仲超過一両麵，不是平時的九錢重，所以寧願行多十分鐘去隔籬街買。阿嫲話今次真係大食唔窮倒算窮，冇錯碗雲吞麵的確是大咗又平咗，不過麵身淋咗，根本唔好食，叫妹仔立刻去買過另外一碗。
我阿嫲唔識字，但識做生意，而且好大開埋（做生意術語，指睇大數唔睇細數），不少人話佢很蝕底，但阿嫲從不為意，佢有一句口頭禪，就是大食唔窮倒算窮，唔會打算一世窮，我亦學到皮毛，使錢冇問題，使多啲都冇問題．不過就要使得其所，唔好倒算。
近日有不少香港人去深圳食晚飯，理由很簡單，就是平靚正兼服務質素很好，我絕對同意，但我唔支持，理由是很倒算。去深圳食晚飯除了多花交通費之外，最緊要是時間，就算可以六點鐘放工立刻去深圳，去到酒樓最低限度是七點半，食完晚飯就要九點，即使直接回家都要成十一點，是否倒算就真的見人見智。
有人話去深圳不單止食餐飯，大多數會去KTV或者按摩，比香港平很多，我絕對同意，但在香港去完娛樂場所，跳上的士半個小時就可以回家瞓覺，但在深圳，長途跋涉回到家，可能東方已既白，在回家路上，很多會好後悔，以後都唔會北上消費。不過，生仔姑娘醉酒佬，唔使幾耐又會再去深圳玩過。
有人問我有關大量香港人北上消費的意見，我話施比受更為有福，友人唔同意，佢認為香港人根本好窮，有一百三十六萬人在貧窮線之下，所以才揀消費低的地方，我話今次真係冤哉枉也，香港失業率只得百分之二點八，又點會有咁多窮人。
由於有不少香港人經常對外媒話很窮，有一百三十六萬人處於貧窮線之下，但沒有講失業率只有百分之二點八，差不多已經全民就業，並且要大量引入外勞與專才，點會有咁多人在貧窮線之下，這完全是妄自菲薄心態，令到深圳人睇唔起香港人，認為香港人很窮，在自己的地方消費唔起，又要有心目中服務質素，所以才北上消費。
其實香港人去深圳或者北上消費是沒有問題，亦符合大灣區一小時生活圈，但不能以香港的消費太高，服務質素又唔好為理由，咁樣講是很倒算，應該話香港生活很容易，工作時間又不長，可以隨時北上消費，你估如果有香港人咁樣講，內地人怎樣睇那些人，我認為會多一些尊重，少一些鄙視。
