日前Tea time忽然想飲杯奶茶食個蛋撻，就拉上世姪女作伴。兩個女人仔坐响中環某「茶記」的卡位，一邊嗒住奶茶食住撻，一邊「月旦」娛樂潮流、小道花邊，細聲講大聲笑不停。
食飽飲夠八完，起身埋單之際，突見廚師從廚房走出來，向收銀姐姐勞氣的說：「呢張外賣單我唔X識做呀，你打電話叫個客取消啦！」
屁股已離櫈半吋的我，敵不過好奇心的重力，馬上同世姪女坐返低，聽吓究竟是甚麼order，難倒出了名「靈活多變」的茶餐廳廚房。
原來有人外賣點了「揚州炒飯」走葱走蛋，但廚師認為這樣子不是「炒飯」，要收銀姐姐取消訂單。他返回廚房時仍忍不住咕嚕：「唔食葱唔食蛋，做咩X嘢食炒飯！」
待廚師走過後，世姪女蚊滋聲的說「走葱走蛋」不過小事，今時今日咁嘅服務態度，古天樂唔收貨㗎！
我卻是兩肩一聳不以為然，向世姪女解釋廚師美名「食物藝術家」，藝術家有執着、有原則不足為奇。正如雕刻翡翠的玉匠，一樣有態度，客人的要求跟他們理念有所抵觸，同樣會推job。
「Auntie你講過，尤其造『花件』的師傅，多數是omakase，雕甚麼全由他們決定。」世姪女好記性，接嘴說。
真的，別以為顧客大晒，手拿一块翡翠就要玉匠言聽計從。翡翠原料件件不同，玉匠要憑其外形、玉質、色澤、以至她予人的感覺來自由構思雕刻內容。若然客人要求雕製的主題，跟原料對襯不上，玉匠會斷然拒絕。
舉例你給玉匠一塊質地啞濁的原料，又執意雕造一隻猴子，閣下被拒絕的機會高達99.9%。原因是原料已給人了無生氣之感，還要雕刻以靈動為貴的猴子，作品必會遭人詬病。成日講「以作品說話」，如此就沒人會理這是否客人order，只會負評落手落腳雕刻的玉匠。一單生意壞了名聲，值咩？
「哦，所以有時推job，唔係佢哋『威威』唔恨錢，係care自己嘅reputation！」世姪女點着頭說道。
世姪女一言，讓我悲喜參半。喜是她涉世未深，看世界似童話美好；悲是現實社會，難得這般單純高尚。
我堅信人間一定還有不為五斗米折腰的人，所以五十幾蚊一碟「揚州炒飯」走葱走蛋，會有廚師唔肯炒。但資本主義係＂don't argue with money＂，要是付五萬、十萬、甚至五十萬，就是點一碟沒葱沒蛋的「揚州炒飯」呢？
殘酷真相是reputation都有個價，至於人家願出多少錢來𠱁你賣（賣唔賣是後話），就要看一直以來，你有多努力去建立和捍衛你的reputation了。
小妹真心respect呢位廚師，畢竟佢唔會因為嗰五十幾蚊，賣掉佢對炒飯要有葱有蛋嘅風骨；亦因為咁樣，食飽嘅我外賣咗兩碟正常嘅「揚州炒飯」，作為聊表我對佢嘅敬意。
廚師跟玉匠皆是攪藝術的人，重視自己的作品非常合理。
