世姪女在電話裏問我：「Auntie Serena，你得唔得『閒閒』？我有嘢想請『教教』啊！」
嘩，她搬出大殺傷力武器—佻皮嬌嗲的「BB話」，我如何say no？
半小時後，她已坐在我studio的梳化上了。
「Auntie，我想請教嘅事係咁嘅⋯⋯」將長髮隨意低盤了一個「羽毛毽子」髮式的世姪女，收起平日的淘氣，一面正經說。
原來，她跟一位讀大學時的師姐計劃合夥開「網店」，銷售以翡翠作設計核心、價錢大眾化的「輕首飾」。
外型簡潔、體積細小的翡翠，近年深受年青人追捧，成為「輕首飾」的一個設計元素。
「⋯⋯咁『翡翠』嘅嘢唔問auntie，咪等於⋯⋯去到咩嘢廟⋯⋯都唔抽籤！」世姪女說着混入自家創作的俗語。
平時我一定趁機取笑她，但此刻她臉上掛着鮮有的認真，讓我不敢放肆。在這氣氛驅使下，我立刻轉換至「專業模式」分析她的計劃，並提出幾個需要留心的地方⋯⋯
首先，這類「輕首飾」有成本限制。
翡翠價格現正高企，普通質量的也不便宜。若成本有限，只能將「價」來就「貨」，揀選翡翠時便要把要求降低。
但翡翠品質平庸，會影響客人的購買意欲；如何在翡翠質量和成本中取得平衡，是要慎重考慮的事。
接着是挑選翡翠的能力。
這方面世姪女雖有我「親傳」，但始終經驗尚淺，能否選擇到好的翡翠，仍是一大考驗。
翡翠不時暗藏裂紋或瑕疵，你明知故「售」當然不該；但若連自己也沒察覺，便有失「專業」了。
賣「玉」營商，具有替顧客篩選翡翠的眼光，是不可或缺的。
「仲有一樣嘢都要諗吓⋯⋯」我稍作停頓，先瞄世姪女一眼。
只見她低頭歛眉，專注地抄寫重點，抿緊的小嘴禁錮了招牌甜笑，小妮子跟平日判若兩人。
待她停下筆，我繼續說：「貨源供應都係問題⋯⋯」
近年翡翠的供應疏落，要持續推出「新品」，有一定難度。然而缺少new items帶來新鮮感，網店的吸引力又難免下滑。
所以，翡翠供應短缺會造成的隱憂，亦是不能輕視的。
「你哋嘅首飾要用到『翡翠』，呢幾點就需要注意吓。」我向世姪女呈交「分析報告」。
以為她會先回去跟partner研究，怎知她揚揚眉，擺擺手表示：「呢啲問題，有人會幫我哋solve㗎嘞！」
咦？難道世姪女還找了翡翠業內的人合作？剛想問過底蘊，卻見她水靈的大眼睛定在我身上⋯⋯
正感到一股不安悄然籠罩時，世姪女已閃電般握着我雙手，用她甜美怡人的聲線「宣布」：「Auntie Serena，我決定請你做我網店嘅Purchasing Manager嘞！係咪好開心？係咪好興奮？」
吓？！我幾時apply咗呢份工⋯⋯
