港人愛按腳，皆因有減壓、排毒、消除疲勞，兼促進血液循環等好處；按完不但面色紅潤，當晚仲好瞓到不得了。雖然有人鍾意返大陸做腳底按摩，但其實香港都有好多選擇。
        今次就派出「臥底按腳團」成員朱潔儀（Donna）、莊韻澄（Xenia）和林雅詩（Grace），放蛇測試好多名人、藝人都幫襯嘅三大星級按摩店。究竟超豪如皇帝級享受好？還是平民價錢的服務好？價廉係咪一定物美？即刻帶大家去睇睇！

朱潔儀/ 富足臨 名太至愛

       有十幾年腳底按摩經驗的朱潔儀（Donna），這天與記者結伴到中環區，幫襯城中數一數二貴價的「富足臨」按腳。甫到埗，接待員即禮貌地稱呼她「朱小姐」，並安排我們到一間獨立4人房間，私隱度頗高。

       房內環境及椅子都很舒適潔淨，且每一位客人，都獲提供一支蒸餾水，及一條獨立包裝的用完即棄短褲。而職員透露，店內毛巾都交由萬豪酒店消毒清潔，衞生度滿分。

       記者觀察所見，於按肩頸和按腳期間，技師都會細心詢問客人的力度是否適合。曾經遇過不少偷懶技師的朱潔儀，這天更卧底上身，按到咁上下刻意合上眼睛扮瞓着，「我合上眼睛約10分鐘，乘機測試師傅會唔會以為我瞓着而減力偷懶，結果個師傅好專業，冇偷懶喎。」

        縱觀技師的技術、店舖的舒適度和衞生環境，Donna都大力給讚，只略嫌泊車比較麻煩。「泊車入呢幢大廈，要揸架車入Lift，我就驚驚哋，所以多數都係搭Uber過嚟，會方便啲。」至於由中環港鐵站行過去，約需8分鐘，尚算方便。

        費用方面，各項按摩服務，收費由$280至$580不等。按兩Part腳另加25分鐘肩頸，盛惠$1,076元，除番開1分鐘平均$8.6，價錢都幾「揦脷」，一般OL就未必Afford到個個星期去按返Part了，相反對於追求私隱的名媛明星，這裏是不錯的選擇。

評價：
地點方便 ★️★️★️★    
價錢合理 ★★★
環境舒適 ★★★★️★    
用品乾淨 ★★★★️★️
服務態度 ★★★★★    
（5粒星為滿分）
捧場客：蔡卓妍、梁詠琪、陳寶珠、汪明荃、羅家英、李嘉欣、許晉亨。

莊韻澄/ 松•SUNG 性價比高

       已婚並育有一子的莊韻澄（Xenia），這天帶隊測試由節目主持「妹頭」盧頌恩開設的「松•SUNG」於何文田的分店。到達後，職員先請Xenia換拖鞋；如有需要，會提供短褲更換。Xenia被安排到大房、坐在近窗口和電視前的位置。

       記者觀察所見，整體清潔衞生，職員表示用品會定時消毒。而按摩區算寬敞，梳化和鄰座有足夠距離，私隱度ok；梳化亦舒適，可調校高低，方便按肩頸。店內還有背景音樂、電視、Locker、WiFi和充電設備等。Xenia一坐低，技師即用放有薑包的水給她浸腳，據稱可以驅寒，又細心問她水溫是否合適，之後還奉上菊花水和薑糖。浸了大約5分鐘，技師便開始按腳，力度算適中，按完還放熱毛巾在雙腳敷數分鐘才完事。

       事後Xenia大讚是性價比高的按腳服務：「我手機冇電，職員即刻攞啲叉電線畀我叉電，有晒咁多款插頭揀；我話想睇電視，佢即刻開畀我，仲問我想睇邊個台。按到有啲位好痛時，我特登問佢點解，佢又會講得出係咩穴位，仲教我點保健。」美中不足是交通麻麻哋方便，皆因由港鐵站行過去，最快都要10分鐘，門口又不能泊車，只能泊在附近的錶位。

       原本按腳50分鐘只需$238，但加多$150可以做埋20分鐘肩頸按摩和20分鐘遠紅外線足浴桶，除番開1分鐘平均$4.3，當然做埋抵啲！這店的服務有很多選擇，由$68至$938不等。

評價：
地點方便 ★★★    
價錢合理 ★★★★
環境舒適 ★★★★️    
用品乾淨 ★★★★️
服務態度 ★★★★★    
（5粒星為滿分）
捧場客：蔡潔、黃美棋、903DJ阿正、雲妮姐姐黃君慧。

林雅詩/ 創健坊 一試無妨

       林雅詩﹙Grace﹚不算是按腳的狂熱分子，因她是怕痛之人，但「創健坊」札根跑馬地30幾年，技師經驗豐富，所以Grace決定一試。甫入店內，接待處是光猛的，等候座位旁邊的雜誌架更有免費《東周刊》供借閱。按摩位則較昏暗，茶几上有小枱燈照明，並提供一杯暖水。當見到客人飲完，職員會醒目地添飲。

       一坐低，先浸腳約5分鐘。就記者觀察所見，環境算衞生，但空間不大，私隱度一般。現場冇音樂、冇電視。梳化是柔軟度Ok，但椅背冇得調校角度，只可用Cushion墊住遷就。技師開始前，先問Grace怕唔怕痛，再選用合適的力度。事後Grace大讚技師專業：「之前做過腳底按摩，只按小腿同腳，呢個技師知我有水腫，特登幫我按埋大腿去水腫。而手勢唔錯，特別按到痛位時，佢會減輕力度就番我。」

       期間發生兩段小插曲，首先是技師囑咐Grace和記者閒談要細聲啲，因旁邊客人要邊按邊睡。其次是Grace的朋友看手機時，有職員要求他將音量收細，卻原來是隔兩個座位、休息中的員工發出來的，情況有點尷尬。Grace續說：「雖然環境安靜，但同朋友傾偈要細聲，睇電話又要冇聲。交通方面，跑馬地唔係咁方便，雖然揸車可達，但門口係禁區，今日仲差啲抄牌添！」Grace按了兩Part腳，除番開1分鐘平均$4.4，價錢仍算合理。店內有不同的服務，由$130至$380不等。

評價：
地點方便 ★★    
價錢合理 ★★️★★
環境舒適 ★★️    
用品乾淨 ★★️★️
服務態度 ★★️★★    
（5粒星為滿分）
捧場客：洪欣、王秀琳（Mango）、霍啟文。