成日都話「平嘢冇好，好嘢冇平」！但近年消委會多份測試報告話俾我哋知，呢個定率已經Out。立春後天氣乍暖還寒，今期搵嚟藝員兼KOL李思欣（Charmaine），和寇鴻萍細女、從事保險業的唐貝欣（Fiona），即場測試6大平價保濕Cream。原來$200有找嘅都有好多選擇，而且效果唔錯，結果由Nivea成為大贏家，即刻睇下測試點評。

（C：李思欣/ F：唐貝欣）
（綜合評分，每項以5分為滿分，總分為20分)

1. Neutrogena水活保濕無香特潤凝霜 $120/50g （唔試冇蝕）

簡介：深入肌底補水，紓緩乾燥肌膚，有效撫平乾紋，改善肌膚紋理，恢復肌膚透亮。
成分：玻尿酸、胺基酸、電解質、神經醯胺等
C&F評語：「質地唔薄唔厚幾水潤，冇香味又易推開，Cream狀感覺都幾順滑。」
編輯評語：「柔滑奶油質感，清爽唔油膩，感覺都幾水潤嘅，但吸收力一般。」
保濕度：3
滲透度：3
清爽度：3.5
CP值：3

2. OLAY長效保濕凝露 $129.9/50g （唔試冇蝕）

簡介：淺藍色的透明凝膠質感輕盈；其蘊含聚水因子，有助肌膚滋潤補水和鎖水。
成分：甘油、丁二醇、戊二醇等
C&F評語：「Gel得嚟幾輕薄，所以更加易推開，感覺都水潤，仲有淡淡嘅清香。」
編輯評語：「水狀啫喱質地，易推開，搽完尚算濕潤，但吸收力唔算強。」
保濕度：3.5
滲透度：3
清爽度：3
CP值：3

3. 肌研極潤保濕水分露 $148/50g （值得推介）

簡介：紓緩修復受損肌膚，增強肌膚屏障，並啟動補水、儲水再鎖水的協同效應。
成分：仙人掌抗敏因子、4重透明質酸等
C&F評語：「Gel狀好易推，冇乜香味，都幾易吸收，感覺又水潤，滋潤度唔錯。」
編輯評語：「質地透薄嘅啫喱水狀，濕潤易推，搽完都幾滋潤，唔會有繃緊感覺。」
保濕度：5
滲透度：4
清爽度：4.5
CP值：4.5

4. NIVEA長效保濕水潤凝霜   $160.9/50ml （唔買就笨）

簡介：輕水潤配方蘊含高濃度透明質酸，由內至外深層保濕鎖水，肌膚瞬間清爽水潤。
成分：甘油、角鯊烷、十六酸異丙酯等
C&F評語：「Cream同Gel嘅Mix，好清香水潤，易推易吸收，搽落皮膚好舒服。」
編輯評語：「啫喱水狀好易推，吸收力強好滲透，搽完滋潤又清爽，感覺好好。」
保濕度：5
滲透度：5
清爽度：5
CP值：5

5. Curél深層高效保濕面霜 $180/40g （一試無妨）

簡介：保濕功能成分及桉樹精華能滲透至肌膚角質層，讓肌膚回復高密度滋潤狀態。
成分：尿囊素、甘油、矽靈等
C&F評語：「質地厚身較滋潤，易吸收，俾極度需要保濕嘅朋友，只係容量比較少。」
編輯評語：「Cream狀易推，搽完好快吸收，又唔會覺得黏漉，感覺幾清爽滋潤。」
保濕度：4
滲透度：3.5
清爽度：3.5
CP值：4

6. LANEIGE水庫補濕微質酸紓緩啫喱 $188/50ml （諗清諗楚）

簡介：清涼不黏膩啫喱，為皮膚補足水分，水漾質感瞬間滲透肌膚，告別油光。
成分：甘油、甜菜鹼、山醇等
C&F評語：「質地薄冇香味，有粒粒好似水潤嘅珠珠，望落似磨砂，搽完都幾濕潤。」
編輯評語：「偏厚身嘅啫喱狀，推開度一般，吸收力唔強，但吸收後都幾水潤。」
保濕度：3
滲透度：3.5
清爽度：3
CP值：3.5

開心Share保濕心得

李思欣 滋潤靠湯水

「我嘅皮膚一向都好乾，最嚴重試過個鼻同嘴角甩皮上唔到粉，所以好注重保濕，護膚程序如潔面、搽Cream都做到足，一星期仲會敷一、兩次保濕Mask。而最緊要係揀啱護膚品嚟用，之前轉咗用Love starfish 30嘅精華素同保濕Cream，好啱我好滋潤。飲食方面，每日盡量飲8杯水，仲會飲好多湯水如人參雞湯、海底椰、蟲草、淮山等。」

唐貝欣 睡房加濕器

「上年皮膚科醫生話我有玫瑰痤瘡，啲皮膚紅色一撻撻，會敏感、生粒粒同爆瘡，醫生建議我搽多啲保濕，咁我用開ISAWORKSHOP嘅Lotion，洗完面搽好滋潤，有時仲會放落個樽度噴，當定妝咁用；仲有Eye Gel，搽完眼紋會減淡。我一日飲8杯水，每日瞓8個鐘；同埋瞓覺我會用加濕器，有時更會滴埋香薰油落去，室內濕度高啲又冇咁乾。」