發佈時間：17:41 2024-01-05
姜紫藍（Color）03年以模特兒身份入行，之後擔任電視節目主持、拍過劇也有客串拍戲。09年出版寫真散文集，3年後推出她首部著作《彌留人生》轉型做作家，並任全職攝影師幫病患義影。去年她因為患與白血球有關的病搞到個人又腫又甩頭髮，經治療後踏入2024年身體逐漸康復。為了令身形回復最佳狀態，她Keep住做瑜伽和Gym，並用食肉減肥法戒澱粉質、糖份積極瘦身，終在1個月減去20磅，她坦言：「其實第一個禮拜已減到10磅，幫我去晒啲水腫。」
食藥狂嘔助減肥
2012年Color推出勵志書《彌留人生》講述自己患白血病死而復生的經歷，沒想到去年又患上與白血球有關的病，她坦言：「唔係舊病復發，但患病時個人又腫又甩頭髮，加上年紀大新陳代謝慢咗，所以肥咗好多。」一向Keep住95磅的她，高峰期重到130磅，她續稱：「食藥有副作用搞到我經常嘔，都有助減磅。」身體慢慢康復後，她再用食肉減肥法戒澱粉質、糖份瘦身，她續稱：「男士鍾意食牛肉，我就鍾意食魚肉如吞拿魚同銀鱈魚，仲會食雞蛋同飲奶，但一定要戒食蛋糕、朱古力同曲奇餅呢啲甜嘢。」
隔日運動不少得
此外，Color也會Keep住做運動，最喜歡做瑜伽和Gym，她稱：「通常會隔日做，每次做1小時；每晚臨瞓前，仲會做一啲Core嘅運動，可以收肚腩。」她每星期還會帶愛犬跑步出身汗排毒。雙管齊下，總算慢慢瘦番，她表示1個月已可減去20磅，「因為我成日水腫，用咗呢個方法後，其實第一個禮拜已減到10磅，幫我去晒啲水腫。」
護膚要注重保濕
而Color的皮膚一向白滑，護膚亦有自己一套心得。她說：「化妝後落妝要落得乾淨，而且要不停補水，我早午晚都會搽保濕嘅嘢喺面上，譬如保濕爽膚水、保濕肌底霜等。因為皮膚有好多問題都係因為缺水引起。」在選擇護膚品方面，要嚴選一些天然配方做的產品，因她試過生濕疹，後來用了天然的牛奶皂沖涼，經過兩、三個星期問題已得到明顯改善。她希望保持在最佳狀態，2024年繼續打併，她續說：「已跟出版社簽咗約，今年書展會推出以我特別經歷寫成嘅書，嚟緊仲想做番幕前去拍戲。」因此她表示現時未去到最Fit的狀態，並笑言：「減多10磅就滿意喇！」
甚麼叫食肉減肥法？
食肉減肥法主張高蛋白、高脂肪的飲食方式，期間需要嚴格限制碳水化合物的攝取量，令身體在缺乏碳水化合物之下，用脂肪和肌肉去製造能量。即是肉類、魚類、雞蛋、油份的進食並冇限制，但絕對不能進食五穀類如米飯、粉麵、麵包等，甚至不能吃蔬菜和水果。
