發佈時間：15:04 2023-11-25
陳君宜（Qinnie）昨日Call齊好友羅霖（Candy）、陳爽、李美慧和于淳西一起到長沙灣為「全球華人乳癌組織聯盟」整「粉紅天使」慈善曲奇籌款。Qinnie表示曲奇會在聖誕義賣，她除了親手做裝飾、畫圖案外，亦已訂購80盒作為支持，皆因乳癌是香港婦女的頭號癌症殺手，她表示女性應注重身體，尤其是乳房，要定期做檢查，千萬不要掉以輕心。
爆胸好驚恐
Qinnie表示認識這個組織後才驚覺檢查乳房的重要性，她解釋：「佢哋話我知有個會員患咗乳癌，不幸地佢老公都患有癌症，但嗰刻只有太太可以返工搵錢，於是佢將搵到嘅錢畀佢老公醫病，佢自己就唔醫，結果佢最worse嘅情況去到爆胸，之後亦醫唔番。」Qinnie聽完後好驚恐，才感受到女性真的要注重自己的身體，並即時預約醫生做全身檢查。
自摸做檢查
由於這個組織會幫低收入的基層家庭婦女，義賣曲奇的收益將全數用於病者的支援服務，咁有意義，所以Qinnie一班好友也到場支持。她笑言：「我都係之前一日先問佢哋，竟然個個都話嚟。」Candy雖然要香港和內地兩邊走工作，但為慈善都義不容辭，她坦言：「因為媽媽30歲時都患過乳癌，如果家族有呢啲歷史要check密啲，加上我比較成熟，所以每半年就會檢查一次。」由於醫生也提她可以自己檢查，她續稱：「我幾乎每晚沖涼都會摸下自己（胸部）有冇硬塊。」
挑戰畫翅膀
陳爽、曾文豪太太李美慧和于淳西就話每兩年就會做一次身體檢查，如果女性檢查如乳腺、子宮等就一年一次。問她們當日整曲奇有難度嗎？她們異口同聲說：「以前有整過曲奇，但今日主要係為天使做裝飾，最難應該係畫天使對翼，因為兩邊都要balance。」
有篩查最好
而該組織主席Mary就感謝每一位的到來，並說：「組織會為患者提供陪診服務，因為我自己都患過乳癌，有時陪患者覆診可以過來人嘅身份安撫佢哋，令佢哋安心啲。」Mary續稱現時政府提供先導計劃畀高危婦女檢查乳房，但會員多來自低收入家庭，較難理解自己是否符合資格，所以如果有埋篩查就最好喇。
