3年前憑電影《假冒女團》入行、現年20歲的陳伊霖（Eelyn），也有一把好聲音，今年跨過界，勇闖樂壇，推出首支派台單曲《單戀勿語》。實力如何，還看網民留言最實際，幾乎清一色的讚不絕口，讚陳伊霖人美聲甜不在話下，更指她是不可忽視的超強樂壇新力軍。

初時未有以歌手身份出道，原來是關於自信問題，陳伊霖說當時認為自己才不及人：「我唔覺得自己好出眾嘅歌手，後來被公司老闆知道我係識寫歌，開始問我有冇興趣唱歌，我當時係一口拒絕，唔覺得自己唔係特別叻、壓唔到台。後來真係對唱歌寫歌真心喜歡，加上父母叫我把握機會、唔好後悔，所以最後決定試吓。」

「以前會覺得，自己幾喜歡唱歌都好，都一定同獎項無緣，package唔夠人嚟，但係而家反而有個諗法，究竟會唔會真係有人賞識、有機會攞獎呢？」陳伊霖說。

心酸的情歌

「人人話暗戀有限期 是我蠢不肯收尾 也有人說過 你我沒結果 不想如實揭破 總可尋覓到下一個好更多 原諒我偏要犯傻 是我捨不得放棄奈何」-《單戀勿語》

「本身想以愛情呢個題材做第一首歌，但諗親都係關於失戀呢類唔太開心嘅曲風。當收到呢首歌demo後，我反而好喜歡，覺得好sweet、好有粉紅泡泡嘅感覺。同填詞人商量之後，決定以開心嘅戀愛氛圍去出發。」陳伊霖說。

以愛情作為人生首支歌曲的主題，平常不過，陳伊霖說曲風是融合快樂及甜蜜，演繹時不期然重投那些年那份心如鹿撞的悸動，可堪回味，其實，這也是一首心酸的情歌。

人人都有一首屬於自己的心酸情歌，單戀更是苦多於甜，陳伊霖說自己非戀愛大過天的「戀愛腦」女生，不會輕易地喜歡人，但數數指頭，曾令她魂牽夢縈的單戀對像，也有三、四個。首個單戀對象，是讀小六時的同班男生，品學兼優，也是首席小提琴手，令她心心眼是自然不過。惟首次體驗戀愛的滋味，才知道愛情的重量，非單純的甜蜜如軟糖。

初戀恐怖體驗

陳伊霖首次戀愛，是15歲，還是一名入世未深的未成年少女，男友是比她年長六年的學生。「媽咪唔想我咁早拍拖，所以當年拍拖係暪住屋企人，每次出街拍拖，都係話去補習或約咗女同學等等嘅借口。講大話嘅次數，始終都唔可以太多，所以陪男朋友嘅時間都限。」陳伊霖說。

「陪得少，男友唔係好滿意，覺得好冇安全感，唔理解我，開始好chur我，拍咗半年，我真係好辛苦，最後係我提出分手，我同佢講長此落下令我好大壓力，又或者不如等我畢業或真係ready時，先至再一齊。點知分手後，男友變咗恐怖情人，成日查我行蹤跟蹤我，甚至會send相畀我，話我知佢喺我屋企樓下，話心絞痛，跪喺條街，佢咁講都係想見我。」陳伊霖說。

初戀男友變恐怖情人，堅持以不同的手段及話語，來強行繼續戀人關係，紙包不住火，陳伊霖的媽媽終於知道。「男友喺IG搵我媽咪，仲講咗兩個鐘電話，甚至同我啲朋友講，話我好衰，生安白造。我終於知道，一個人去到某一個地步要呃自己，首先係令自己成為受害者，將所有嘢去合理化。」陳伊霖說。

多得他

陳伊霖經歷三段戀情，第三段戀情的結束，也是因男友不滿已入行的陳伊霖，投放感情的時間不足。感情留不住，雖感到可惜，但也多得他，令她成為自信的女生。

「本身我係無乜自信嘅人，尤其入咗行之後，更加覺得自己又唔係靚同叻，成個package冇人咁好，甚至出現好多否定我嘅聲音：『你點努力都冇用！』、『你做得唔夠好！』但係當時係男友一直鼓勵我，令我發現自己，其實都有一啲值得被愛、被欣賞嘅地方。」

陳伊霖說自小已自卑，就算做得多好，總會有人冷言冷語，甚至狠批攻擊，在這樣的負面環境下，她開始質疑自己，甚至認為自己一無是處。

「唔會覺得自己好，甚至唔想畀人知自己嘅優點，覺得做乜都畀人話。唱歌，就係一個好好嘅例子。我由小學開始參加合唱團，又或喺教會獨唱。最記得，係升中後參加歌唱比賽唱《You raise me up 》，過五關斬六將，好順利入咗最後回合，當時我有信心，覺得可以入三甲。點知臨場喉嚨發炎，加上唔見咗首音源，搞到要清唱，邊唱邊咳，發揮當然唔好，信心一次過冇晒。賽後仲有同學藐嘴藐舌咁寸我：『你唱歌真係好好聽！』自此唔敢再參加比賽幾年，直至轉校後有師姐鼓勵合唱，先至肯唱返歌。」

被咒去死

最血淋淋的攻擊，莫過於是和《全民造星》出身的歌手應智越（細貓）傳緋聞。去年陳伊霖和細貓合演舞台劇《得個夢。無銀用》，即爆出戲假情真的傳聞，由於細貓已有女友，故陳伊霖慘被指是小三，更被網民瘋狂攻擊。

「最深刻嘅一個留言，係話：『你快啲死咗去啦！』係咪需要講嘢咁難聽？咒人去死？其實有冇睇過我嘅訪問、睇過我嘅作品去了解我？留言要負責任，總會有啲人會留意負評，如果因為呢類叫人去死嘅留言而受影響，真係去做，咁邊個負責？你個心會唔會愧疚？」陳伊霖說。

「當時見到呢單緋聞，我係有啲錯愕。因為大家初合作時都好尷尬、好抗拒對方，佢（細貓）話：『𡃁妹，你細我成十年，戀童癖咩！』我又會扭扭擰擰，唔係好想做拖手或攬攬嘅親密戲。突破心理關口照做，其他演員都話我哋冇火花，所以最終演變咗緋聞，當時都會覺得，係咪我哋做呢場戲都幾成功？」

「大家一直都係拍檔關係，直到而家都仲有人問我哋係咪散咗！我想同廣大嘅男士們講，我係單身！一開始都有啲追求者，但爆咗單緋聞出嚟就冇！其實我暫時都唔想有人追，有時要拒絕追求者都痛苦㗎，哈哈！」陳伊霖說。