參加歌唱比賽入行的DJ瑪姬（Maggie／原名張卓賢），早前終於圓夢開了她人生的首個個唱。演唱會上，她感謝父母親的愛，可惜做時裝生意的爸爸因病早逝，當時她拍心口話給媽媽更好的生活。身為港大碩士生和擁8級鋼琴資格的她，被喻為「司儀界女神」，她狂接司儀騷，結果29歲買樓做業主，給媽媽兌現承諾。但過時過節她仍會念掛疼錫她的爸爸，因爸爸從來冇打過她，她坦言：「爸爸真係好錫好錫好錫我，又唔會縱我，因為佢知道縱唔會得到一個好嘅小朋友，佢會教囉。」瑪姬爸爸在天之靈也會感驕傲有呢位孝順女。

在舖頭打躉

瑪姬透露出生前爸爸已經營時裝零售生意，更大爆媽媽是因為在爸爸舖頭工作認識，繼而拍拖、結婚、再誕下她這位獨生女，所以她自細已在鋪頭打躉。她回想小時候常遇到賊人到舖頭偷嘢，有次因為她的機警才不致造成重大損失，她憶述：「有次有客人幫襯買晒全間舖頭幾十件夢特嬌，當時我得10歲，一件要9百幾蚊好貴，見係大客，爸爸逐件逐件摺好畀佢，所以先等到我同媽媽學完琴返嚟。」

難忘偷竊事

「當時爸爸入好晒放入紙袋，擺晒喺Cashier旁邊，而我見得小偷太多，我亦sense到有問題。因為當時嗰個人拎住叠金牛，畀我爸爸點數，跟住又攞番問折頭，總之翻來覆去，突然舖頭多咗好多人問長問短，於是我即刻將入晒夢特嬌嘅紙袋攝入Cashier枱底入面，否則啲賊人就會趁爸爸唔在意逐袋攞走，之後賊人見勢色唔對，就話攞番啲錢唔買，全間舖頭啲人即刻走晒，我真係幫爸爸捍衛咗近10萬蚊，呢件亦係爸爸成日表揚我嘅一件事蹟嚟，哈哈！」不過這只是冰山一角，之後她還目擊爸爸追出舖頭與小偷肉搏搶番啲衫，十分難忘。

爸爸是好人

瑪姬稱爸爸永遠是好人，因為他看舖看到十點幾才返家吃晚飯，他回到家瑪姬差不多都要睡覺了，所以二人在家相處的時間很短。為見爸爸多幾面，瑪姬放學後通常會返舖頭玩一陣再返屋企做功課、沖涼和食飯。就是因為兩人相處時間較少，因此瑪姬爸爸從不會打她，她坦言：「唉！其實我由細到大都好乖，只係喺佢哋角度有時會好曳。記得有一次激到爸爸好嬲，佢拎住籐條不停打地下，當時我企喺度諗爸爸做緊咩呢，我又唔痛，因為佢真係唔捨得打我，而媽媽就笑話你打地下佢都唔痛，你都唔捨得打佢。講真，爸爸真係一下都冇打過我，大力啲搣下都冇，我爸爸真係好錫好錫好錫我，但又唔會縱我，因為佢知道縱唔會得到一個好嘅小朋友，佢會教囉。」

媽媽好Harsh

相反媽媽就好Harsh，還處於體罰的年代，她記憶猶新說：「我兩歲幾未入幼稚園已不停要在家練字，寫得唔好，媽媽會喺我面前撕爛掉咗本簿，然後攞本新嘅畀我再寫過，我媽媽好惡，會用籐條打我，又會用衣架打我，因為屋企做時裝生意好多衣架。」瑪姬長大後時常話媽媽打她時連衣架都打爛，瑪姬媽媽則駁斥：「衣架本身都係脆架，同埋如果當年我唔係咁狠對你，你有咁乖咩？但確實我讀書時真係成日攞啲書法比賽冠軍，佢話如果唔係咁，我啲字邊有咁靚，當然佢覺得自己做得啱。」媽媽的體罰教育令瑪姬覺得她未來有小朋友一定不會這樣做。

見最後一面

就是因為爸爸的辛勤工作，令一家生活無憂，還稱得上是小康之家。當瑪姬15、16歲時，父母更決定退休，大家相處的時間多咗，一家人便經常去旅行享天倫之樂。只是好景不常，在瑪姬20歲時，爸爸發病突然腳腫，由他入醫院那天到他離開嗰日其實只有3星期，瑪姬坦言：「對我嚟講真係好短，當時我啱啱喺理工讀Year 1，嗰時仲以為佢會醫得好出番嚟，點知個情況一路惡化，好在去到最尾一刻，媽咪打畀我話爸爸唔得喇，你快啲返嚟喇，嗰時我應該係幫人補緊習，咁咪即刻走衝去醫院，都叫做見到最後一面冇遺憾。」

買樓做業主

瑪姬由中六開始就幫人補習和教琴去賺零用錢，直到爸爸病逝不久就入了電台工作。所以當爸爸不在時，她就立下誓言跟媽媽說：「你放心喇，我會繼續秉承爸爸畀你嘅生活質素，仲會更加好。其實我係做到，因為入電台後我不停接MC Job，瘋狂咁做，終於儲到首期，29歲買咗人生第一間屋，比起我細個住嗰間大一倍，所以我買樓時同媽咪講，我兌現咗9年前對你嘅承諾，我令你過得更加舒服。」真是一位孝順女！