發佈時間：17:31 2025-11-11
第十五屆全運會（全運會）已開鑼，HOY TV三條免費電視頻道76、77及78台，以及手機應用程式直播或轉播多項全運賽事，身為「瘦身教主」唐安麒（Dr Angel）旗下ACE娛樂藝人Lenna T.（湯嘉宜）成為是次HOY TV報道全運會賽事的一員，更是她入行以來首次主持電視節目！
身為YS韓國偶像學院香港分校舞蹈老師的Lenna T.，可謂文武雙全，不單「舞功」了得，口才更是不錯，因她也做直播主等相關工作。Lenna T.接受東周網訪問，直言首次主持電視節目，不單感到新奇及具挑戰性，更是十分寶貴的經驗。「壓力都唔細，因為運動員同賽事等資料唔能夠錯，加上係直播節目，冇得NG，所以事前工夫要做得充足。記得第一日主持時，因為唔熟悉電視台運作流程，所以連望住邊部機都未知。」
Lenna T.說為了不容有失，除了事前做足功課，了解更多全運會及運動員的資料外，就算接到講稿，都會不停念誦，希望能有生動演繹。「最深刻係有次出門口時，見單車手李思穎落後，但返到電視台後見佢衝線成功攞金牌，所以真係要密切留意賽程。同埋我想語氣自然啲，講得更流暢，所以一接到稿，就對住化妝間塊鏡不停去講。翻睇第一日嘅表現，覺得自己好僵硬，所以更要做好表情管理，例如背稿時會錄低自己講嘢個樣，注意同調整表情。」Lenna T.直言今次主持全運會的經驗十分寶貴，希望日後可參與如旅行或美食等不同的節目主持。
Lenna T.工作日程忙碌，日前遠赴韓國出席《Asia Model Awards 2025》，並擔當得獎者兼MIRROR成員Alton王智德的貼身翻譯，她承認剛從韓國回來有點抱恙：「有少少咳，為咗唔影響表現同把聲，Dr Angel介紹我食某隻蜜糖糖潤喉，我都有睇醫生食咳藥同開聲藥。」而Lenna T.的「開工袋」一定有「五寶」，就是外套、小風扇、充電寶、水樽及雨遮。「帶定外套，因為錄影廠有時冷氣好勁，帶定唔怕冷親，而如果焗時，有個小風扇就唔怕個妝會溶。充電寶更加重要，因為講稿同流程都係電話接收，唔可以冇電。」
除了主持全運會賽事及在YS授課外，Lenna T.同時要為HOY TV的大型音樂舞台劇《歲月如歌》進行密集式舞蹈排練，她笑言腦力消耗多過體力消耗，因既要記講稿又要記舞步：「而家都不自覺『168飲食』，因為11點食第一餐，跟住開工做嘢，6點食第二餐，跟住就去排舞，返到屋企沖涼瞓，唔會食宵夜。因為平時都習慣咗身體高強度訓練，所以唔會覺得太攰。」
