發佈時間：14:30 2026-07-23
本來唔打算寫足球，不過，在今屆世界盃帶出很多問題，如果大家梳理討論一下，或者會為足球帶來一個新面孔，以後更加多人參與，畢竟現在足球好似汽車內燃機，已經運作了百幾年，唔係有問題，不過，就要發掘更佳能源，所以，新能源汽車出現。
有人問我睇足球，除了自己捧場的一隊之外，最注意是甚麼？我認為是節奏感，如果場波斷斷續續，就算自己捧場的一隊贏咗，都唔會覺得好睇。
足球歷史上最經典賽事之一，就是一九八六年墨西哥世界盃八強賽事，法國對巴西，雙方曾經有十幾分鐘連續性比賽，沒有犯規，沒有界外球，充滿節奏感，令到大家至今仍念念不忘，沒有節奏感的足球比賽如雞肋，食之無味，棄之可惜。
在VAR未出現之前，足球比賽節奏尚算明快，球證不時以自己的判斷容許球賽繼續進行，甚至入了波都會判有效。不過，球證並不是神人，間中亦會錯判容許進行的比賽，甚至出現入球，輸的一隊當然不服，最後唯有以球證犯錯是球賽的一部分來結尾。
正所謂知錯能改，善莫大焉，FIFA知道，唔能夠成日用球證犯錯是球賽一部分來結尾，於是搵助理裁判幫手，不過助理裁判不是人，而是攝錄機，慢鏡頭重播，咁就唔會錯判，解決到判錯問題，就會將足球比賽節奏拖慢，足球比賽失去快速節奏，好似一味冇落鹽餸菜，淡而無味，最後令大家唔再喜歡那味餸菜。所以，足球比賽必須要落鹽，一定要由球證主導比賽，承認球證犯錯是球賽的一部分，VAR是輔助裁判，而且是應雙方領隊要求才會使用VAR。
有很多運動都使用VAR，例如網球比賽，球員在每一局有三次使用VAR的權力，來挑戰網球在界內或者界外，如果挑戰成功，使用權可以保留，如果三次失敗，球員就冇權繼續挑戰，就算判錯亦要接受，教練以及網球員全部都明白這個道理，亦未聽過有網球員不滿意這個做法。
足球比賽也可以一樣，上下半場球隊領隊有兩次使用VAR權力，如果挑戰成功，挑戰權可以保留，否則在兩次挑戰失敗之後，球證點判都要接受。而且，球證毋須自己要求睇VAR，因為只要他作出判斷，一定會有一隊領隊要求睇VAR，例如判恰西（越位），入球作廢，入球的一隊會要求睇VAR，如果唔判恰西，入球有效，失球的一隊會要求睇VAR，當用完挑戰權之後，就唔能夠要求球證睇VAR。不過，球證如果冇信心，可以主動要求睇VAR，咁樣做會令比賽節奏感加快，否則，係又睇，唔係又睇，最後令睇波的人覺得悶，甚至唔睇足球比賽。
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
