發佈時間：19:38 2025-07-23
行車安全最重要！近日有網民在社交平台Threads發文並上載影片，指在乘搭巴士期間，目睹車長因一名大叔大聲播片，怒而在高速公路上停車，並上前與大叔爭執，還多次激動地說：「依家你騷擾到我呀......我依家開唔到車啦！」樓主指雖然車長最終在其他乘客勸說下再度駕駛，但他直言：「見到佢情緒咁激動其實都好驚。」
據樓主指，涉事巴士當時正行走北區路線，在接近「欣盛苑」巴士站時，因為一名大叔「睇片開到勁大聲」，車長「行緊高速公路途中，突然停低架車，行過去鬧爆個阿叔」。
巴士車長：你好似好唔滿意咁喎！ 大叔：梗係啦
從其分享的影片可見，大叔坐在下層第一排靠走廊位置，車長大聲怒道：「我歡迎投訴，你記低個車牌！」有其他乘客勸說：「細聲啲，細聲啲啦，熄咗機，去開車啦。」大叔仍不服：「依家都無聲……」車長則喝道：「你好似好唔滿意咁喎！」大叔爭辯：「梗係啦，無端端畀你『拮』。」
隨後車長喝令大叔不要舉手機拍攝，大叔反駁：「我無影呀。」車長警告他：「你依家騷擾到我揸車，我就開唔到車啦……你好似好唔滿意咁！」乘客再勸交：「好好好，揸車揸車，大家都趕住時間。」大叔仍不服氣：「我熄咗機囉喎。」乘客即時勸阻大叔：「阿伯你唔好出聲啦。」
但車長仍怒氣難平﹕「你投訴啦，歡迎你去投訴，你依家去投訴，我依家唔開車啦，我索性唔開車啦，投唔投訴我都唔開車啦！」之後底頭打電話，相信是要向上司匯報。這時其他乘客繼續勸交，有人代大叔道歉：「阿哥呀，對唔住啦，對唔住啦。」但大叔反道：「咩對唔住啫……」其他人當即叫他「唔好出聲」。
樓主指，「好多人圍攻個阿叔叫佢收聲，然後請司機繼續開車」，「因為好多人都拜託司機快啲開車，係（喺）群眾壓力下，明顯見到司機未可以休息一下，情緒平復翻啲都答應肯開車。」但樓主亦坦言，「雖然最後個司機肯揸翻車，但見到佢情緒咁激動其實都好驚」，「驚影響對路面判斷同道路安全，但我好慶幸同多謝呢位司機最後可以維持專業，冇畀呢位阿叔影響，完成整趟旅程」。
網民：D人硬係唔記得馬場巴士單意外
有關帖文吸引網民熱議，不少人對車長被阿叔大聲播片滋擾之苦表示理解：「或者有d人唔知對聲音敏感既（嘅）人，太嘈真係會令司機分心兼情緒高漲。」有人亦指出，司機位其實「好應聲」：「唔好以為睇片開聲好小事，司機位係好應聲，係非常應聲。」
有人感慨車長為難：「車長處理就話車長情緒激動，車長不處理就話車長不負責任。」有網民則認為車長不應該繼續開車：「司機有權唔開車」，「我一定唔開車，報警。」「D人硬係唔記得馬場巴士單意外。」
來源：yyte_23＠Threads
