發佈時間：19:20 2025-07-07
有苦主網購了一個逾300磅大雪櫃及一個400多磅的櫃，未料集運送貨時，不僅撞碎屋苑照明燈，致要賠償500元，雪櫃玻璃也被撞破了。事後向集運公司追討損失，對方卻意圖向商家卸責。苦主隨後發警世帖講述事件來龍去脈，細訴集運公司「5宗罪」，提醒網民「用私人集運真係要加倍小心」。
苦主列出集運公司5宗罪
苦主昨日（6日）在facebook群組「香港集運苦主群」，以「網購大型電器／傢俬教訓」為題，上載相片發帖曝光事件。苦主先簡單交代，自己「買咗一個大雪櫃，重量154kg（約340磅），連埋一個櫃差唔多200kg（440磅）」，接著便羅列涉事集運公司「5宗罪」：
第一宗罪：人手不足
送貨當日只安排一個司機送貨，當時佢一個人雪櫃卸落貨車都未做到，要我哋出2個人幫佢落車，但呢件貨係包送貨上屋企門口嘅。
第二宗罪：撞壞屋苑設施
司機推雪櫃撞爆咗屋苑照明燈，屋苑罰咗我哋500蚊，而XX集運係拖得就拖，無賠償俾我。
第三宗罪：撞爆埋我個雪櫃玻璃，推卸責任
因為個雪櫃連包裝箱入唔到屋企門，我哋無要求嘅情況下，司機幫我哋拆包裝減少體積入屋企度門（可能係因為撞爆咗燈而內疚，想做返啲嘢）。老實講師傅搬貨技巧真係一般，跟住佢嘅指引去拆箱，雪櫃打側移除底座發泡膠嘅時候撞到牆，玻璃馬上發出裂開嘅聲音，跟住師傅話係本身已裂，叫我哋追究返原廠。但當時玻璃裂開嘅聲音維持咗差唔多30秒，一定係當時整爆嘅。XX集運叫我哋同商家講打開包裝就爛咗，將個波推俾人哋。
第四宗罪：條款係用嚟保障自己公司
佢哋一方面sell（賣）自己可以做到大貨集運，另一方面喺條款寫話玻璃破損係唔會賠償，條款如下：「所有易碎物品我們在運輸中會盡量小心處理，如在運輸中損壞不予賠償請知悉（包含電視機、陶瓷用品、玻璃製品、工藝品、傢俱用品，超長易折斷物品等）」。
第五宗罪：送貨時間好慢
6月23號貨到香港，6月30號當日中午先通知你下午會送貨。
苦主熱心回應網民提問
帖文引發網民關注，有人表示：「一條友，玩隻對門櫃有啲難度喎。」「200kg派一個人。」苦主回應稱，當時已出動2人幫忙，才勉強夠力，「好心佢既然有大貨集運呢個選項，就唔好不自量力，一條友送。當時司機佢個車仔都就嚟壓爆咁款，之後都係用我哋提供嘅車仔」。
不少網民建議在香港買，有保養又有售後服務，苦主則表示：「香港一定好，保障大啲，比較過價錢貴幾千，我哋大意了。」
資料來源：熊大＠facebook
