發佈時間：15:12 2026-02-02
訪問江欣燕，第一件事便想起笑聲，想起在撈電視汁送飯的年代，她在《歡樂今宵》搽黑塊面扮菲傭Maria或梅艷芳。下月，這位扮嘢天后回來了，在《粵劇特朗普4.0》中化身「街市早苗」和「伊萬卡」，造型驚喜，觀眾要落足眼力才認得出她。正如她的身形，由月前出席《俠醫》宣傳活動開始出現變化，外界都擔心其健康狀況。
「我會叫嗰身造型做『大郵筒』，當日條裙改唔到窄，對鞋好高，天氣又熱，咪趁大合照前返後台休息囉。之前食甲亢（甲狀腺功能亢進症）藥物可能都有影響，同埋最近戒咗煙，啲人話戒煙會肥。」
她和前夫吳積遜的12年婚姻，在2013年走到盡頭。結婚期間，她生活糜爛，經常開P劈酒，「我試過飲醉瞓喺餐枱底，第二朝先被人發現。後來我選擇離開﹙離婚﹚，係因為人與人之間有個時鐘，緣份吧！突然有一下我覺得夠鐘，唔想再留喺度，想同爹哋媽咪一齊生活。」
這個鐘，時間校得剛剛好，令她可以陪爸爸走完人生最後的3年時光。
「我成日都講好彩有離婚咋！記得幫爹哋執遺物，喺佢書房個夾萬入面見到我張成績表，我啲眼淚好似花灑咁標出嚟，打畀梅小惠話佢知我唔掂，睇唔到嘢。嗰一刻我先知道一個人傷心到極致，係冇演員做戲嗰啲表情，只會腳軟坐喺地下。小惠就叫我唔使怕，即刻過嚟幫我執。」
現在她和媽媽同住，母女之間的鐘聲正嘀嗒嘀嗒地響，家中每個角落都充滿愛。
延伸內容 : 江欣燕化身「街市早苗」成熱搜 扮嘢高手扮乜似乜 最強係扮
自嘲大郵筒
在《歡樂今宵》建立的扮嘢天后形象，令江欣燕獲玄學家李居明賞識，邀請她踩過界演出《粵劇特朗普4.0》，一人分飾模仿日本首相高市早苗造型的「街市早苗」和特朗普女兒「伊萬卡」，更會有香艷的出浴鏡頭。
「我想減肥，瘦啲演伊萬卡，但老閭李生話唔使，話外國人有肉地，我幾開心呀！後尾佢話加個角色叫街市早苗，我話山口百惠我就識啫！之後我靠化妝戚起隻眼，整個假嘅長下巴，加埋塊面灰灰地同皺紋，搞掂。」
毋需減磅演出，她笑言好安樂，但健康緊要，提起她之前現身《俠醫》活動時，不但面容浮腫、身形發福，還當眾除鞋，惹來患病揣測，她笑着否認：「我會叫嗰身造型做『大郵筒』！其實嗰日我冇乜食嘢，又熱又攰，對高踭鞋又高，可能因為咁面容扭曲。企到腳痛咪同公關講影大合照時再通知我，冇諗過會俾人話我有病而離場。睇到網上將我啲動作repeat又repeat，好笑。」
58歲，走到人生下半場，煙、酒，她都戒了，想reset自己回到18歲，做一些對自己有益的事。
「我一決定戒煙，就叫工人姐姐收埋晒啲打火機、煙灰缸同煙。啲人話戒煙會肥，可能我經歷緊呢個階段，加上年紀唔細，唔想好快速咁瘦，我𠵱家錫身呀！
「同埋我冇再進行生酮飲食，陪媽咪食番飯。甲亢啲藥就停咗好耐，之前驗血冇事喇。其實開頭唔知有甲亢，只係成日覺得個心點解會跳得咁犀利，體檢後先知咁嚴重，咪開始注意身體。𠵱家我可能有三高：心頭高、志氣高同眼角高，哈哈！」依然不失搞笑本色。
流產B叫吳知
人會變，江欣燕在過去一段和吳積遜的婚姻，有大約10年時間，過着紙醉金迷的生活，日日擘大眼，只顧吃喝玩樂，甚至試過朝早燒嘢食，「電力」十足。
「唔飲唔知身體好！𠵱家唔同階段，要做唔同嘅嘢。嗰時如果我冇陪前夫闖蕩江湖，過一段咁瘋狂嘅日子，就唔會眼界大開，識到咁多朋友。」
她仰慕前夫人脈廣，交際手腕勁，但心中的時鐘，有天卻提醒她是時候要離開，轉換生活形式，回歸公仔箱拍劇，搬回娘家與父母同住。當初是奉子成婚的二人，最終卻流產做不成父母，問她若BB順利出世，結局會否改寫？
「咁就大劑喇，兩個人最好冇樓、冇細路，咁會簡單好多。開心咪一齊，想轉個環境咪分開。記得我有咗身孕兩個星期，臨擺酒前去照超聲波，BB居然冇咗心跳，嗰吓我接受唔到，爆喊！」
最後她決定婚照結，但對於再做媽媽，一切隨緣。有次她想幫流產BB做法事，被問起BB名字時，臨急改了「吳知」，其後還將刮宮手術後的部份胎盤，放入樽帶回家紀念。問她不覺得BB的名字有點荒誕嗎？不怕觸景傷情嗎？
她笑說：「人生根本就係咁荒誕！我好多時都睇老夫子領悟人生，即係嗰啲『苦中作樂』嘅題。嗰時我冇諗咁多，淨係知平時剝完牙都會拎隻牙返屋企紀念。我日日同『吳知』講嘢，叫佢走，冇幾耐就見到百葉簾郁。我問：『係咪你返咗嚟？』個百葉簾又再郁，我就驚到掉咗樽嘢喇。」
執父遺物爆喊
婚姻失敗，換來江欣燕重拾與父母相處的時光。江爸爸在2016年因淋巴癌病逝，提起亡父，她說：「走得快好世界，冇諗過爹哋走得咁快，佢好怕痛，我明佢辛苦。」
她指爸爸走得很突然，前一晚還去醫院幫他全身按摩，見換片時間到了，自己又肚餓，她便本着翌日會再見面的心態離開，豈料一別成永訣。
「第二日媽咪打嚟，話醫院叫我哋快啲去，問插唔插喉？我都唔知發生乜嘢事。去到醫院，我仲等買埋杯咖啡先上去，醫生見到我哋就話：『仲唔上去？急救緊呀！』我先知原來佢會死，所以我好唔啱，喊到失控。」
江爸爸沒有留下遺言便離去，江欣燕心很痛，唯有駕車到大欖隧道大叫，踢走悲傷。「我開窗喊住大嗌：『爹哋我好掛住你，好唔捨得你！』嗌得三、五、七次，宣洩出嚟就好好多。到幫爸爸執遺物，發現佢書房個夾萬有我小學同中學畢業嘅成績表，我啲眼淚就好似花灑咁標出嚟。」
代爸爸照顧媽媽，是江欣燕現時最大的任務。「大家嘅歲月都唔知仲有幾長，細個時佢照顧我，大個咪我照顧返佢，就算細個時佢『虐待』我都係咁話。好似第一個男友（張衛健），佢反對唔俾㗎！嗰時我做《歡樂今宵》，佢限我時間返屋企。」
和新秀師兄張衛健拍拖5年，最終被媽媽棒打鴛鴦，但她沒有怪媽媽，「因為我知道佢好錫我，同埋一切都係緣份。分開後，張衛健會打嚟，同我講女友有幾好點點點，我話你開心就得啦，其實話俾我聽做乜啫，哈哈！」
K歌之后
江欣燕執爸爸的遺物喊到癲，閨密梅小惠二話不說即飛車上門，幫手執文件。訪問尾聲，欣欣致電小惠，細說二人的友情歲月。
梅小惠說：「你85年參加新秀歌唱大賽，我就參加健美小姐，後尾TVB派我哋去做青年大使，嗰時你冇同我講嘢，因為你靚女，俾好多蜜蜂圍住，好似張衛健，我埋唔到身。到我加入《歡樂今宵》，你已經好出名，帶住我。」
聽見小惠這樣說，江欣燕即搶說：「你好客氣，『帶住』？狗咩？」二人笑成一團。
梅小惠感激江欣燕的家門隨時為她打開，「無論幾點，只要我唔開心，佢都歡迎我上佢屋企，次次都好似整omakase咁，喺雪櫃嘢俾我食，午餐肉都會切成心形。最感動係佢喺我爸爸喪禮上，由朝到晚不斷摺金銀衣紙。」
江欣燕18歲參加新秀入行，1989年就登上日本節目唱《龍貓》插曲。原來私底下，她和梅小惠都是「K歌之后」。
梅小惠大爆：「欣欣會教我唱歌，我哋可以由夜晚6點，唱到第二日朝早9點。我哋只係不斷重覆唱4首歌，好似〈心淡〉、G.E.M.嗰首〈你把我灌醉〉，十足小朋友放電。」
說着說着，江欣燕來個突擊友情測試，問：「我諗住問你借20萬啊！」梅小惠秒回：「俾個戶口嚟過俾你囉。」
人生難得一知己，相信牽連兩人的時鐘，不會斷電。
延伸內容 : 江欣燕發福身形惹關注 宣傳《俠醫》不適突中途離場
延伸內容 : 失婚10年 江欣燕盛女生活享天倫
