發佈時間：13:41 2025-04-08
世事一場大夢，人生幾度秋涼。
生於秋天的黃秋生，敢怒敢言，大情大性，從不喜歡傷春悲秋。過去的歷練風霜，卻足夠他推出自傳《秋生回憶》。
他是一名私生子，英籍父親在其4歲時，拋下他與母親相依為命，自小性格反叛倔強。
憶起年少時經常向母親發脾氣，他心中有愧，「我覺得自己做得唔夠好，好後悔……」
轉換角色為人父親，他亦歉疚未有好好與兩個兒子相處，「事實係自己自私，唔識得點樣做爸爸。好感謝我老婆，花咗好多心血，付出好多。」
當年不明曲中意，如今已是曲中人。怒火與傲氣，都已隨着時間流轉而收斂。最近，這名鐵漢愛上了畫畫、唱歌、寫書法。
「我細個夢想係做畫家，不過外婆唔俾，近日開始臨摹Matisse的粉彩畫，如果有人傾，我想開畫展㗎。呢排又有唱下歌，青雲（劉青雲）聽完話有感染力，我都有打算開演唱會，一生人搞一次啦。」
他一邊說，一邊碌着電話，分享兩首近日作曲填詞的歌，高興得有如小學生考到好成績。
過盡千帆，63歲的黃秋生，收了火，但仍有很多想追逐的夢，遊戲人間，不負光陰。
黃秋生跟錯師傅 畫家夢碎
這天，黃秋生穿上皮褸，頭戴冷帽，加一副購自台灣的墨鏡，很配合其舞台劇《螳螂捕蟬》中的殺手造型。
不過，這個殺手並不冷。談起近日放上社交網的畫作及自彈自唱的短片，他興奮至眉飛色舞。「我自學嘅，畫咗幾幅啫。好奇怪，有一日諗，今年玩咩好呢？畫畫都好喎。過咗幾日，杜汶澤同楊天命喺個節目度講起我，楊天命竟然話：『佢（黃秋生）有冇諗過畫畫呢？』，我心諗，係咪咁邪呀？結果我真係拎返買咗好耐的粉筆同畫紙出來。
「我一向鍾意野獸派畫風，又鍾意Matisse，後來我搵到一疊postcard，就決定臨摹咗先。我同阿澤講，畫具好貴，不如你贊助我啦，跟住佢話『得！我做埋你經理人，幫你sell埋畫又點話吖』，我話，你係先好講呀。」
外表粗豪的他，原來小時候曾有一個畫家夢。「我細個唔鍾意同人講嘢，最想匿埋喺自己的世界畫漫畫。當年黃玉郎收徒弟，我12歲時想去應徵，但阿婆鬧我，話『公仔佬，一世都無出色㗎！』
「後來阿媽帶咗我去搵《兒童樂園》主編羅冠樵學畫，點知佢淨係叫我印天主教版畫，悶到我嘔，又吹牛話自己係黃玉郎師父，咁我嬲起上嚟就唔學囉。後來學校繪畫比賽，我畫咗幅畫去參賽，老師又退番嚟，話唔信幅畫係一個12歲細路仔畫嘅。」
曾校際比賽冠軍 唱歌天份被埋沒
畫家夢碎，小學時曾經唱《滿江紅》而拿過校際比賽冠軍的他，唱歌天份亦一樣被埋沒。「當年係兒童合唱團之父葉惠康先生頒獎俾我，佢話未聽過一個細路仔把聲咁好，鼓勵我去參加兒童合唱團，我好開心，同阿媽講，但阿媽叫我讀完小學先算啦。我心諗，讀完小學都變聲啦，最後咪算囉。」
藝術天份未能盡展，為人父親後，他就任由兩個仔睿名和煜政自由發揮，不給他們設框框。二人的英文名，各有意思，「大仔叫Omar，因為我好鍾意演《齊瓦哥醫生》的埃及演員Omar Sharif。原來呢個係回教名，所以佢讀書時，回教徒對佢特別好。」而細仔的名字Ulysses，則是古希臘文學裏的英雄人物尤利西斯。
2010年，他曾經安排Omar在他主演的電影《報應》中客串了2日戲，「佢賺咗幾千蚊，但之後同我講，我唔會做呢行，咁辛苦！」
他慶幸兒子有這個想法，「最怕佢哋被人評頭品足，咩星二代、學霸，聽到都起雞皮。」
細仔曾有過度活躍症 帶仔學大聖劈掛放電
Ulysses年幼時曾有過度活躍症，黃秋生於是帶他去學大聖劈掛放電，結果他一試愛上。他經常人前人後提起父親，視父親為偶像，「佢成日話：『我得到你遺傳，係一個藝術家』。我叫佢小心啲，𠵱家世界唔好，一陣人哋以為佢爸爸好有錢呀，好彩佢識功夫，打得啫。」
現時29歲的Omar做銷售行業，27歲的Ulysses則是設計師，分別居於美國和加拿大。他笑言，兩個仔趷起條尾，他都知二人想點。「佢哋兩個好少打電話俾我，有次細仔一早打俾我，話好掛住我。我話：『你老實講，你想要咩？』佢話：『冇，我只係掛住你，關心下你身體啫。』我就話：『唔係嘅，你有嘢就講啦。』跟住佢話：『……我想問你攞啲錢……』我知道啦，邊度有咁好死打俾我吖，哈……」知子莫若父，算是這㮔。
黃秋生曾被嘲是「雜種」 回家後大罵母親
黃秋生坦言，過去與兒子相處的時間不多，兒子沒有變壞，已是「家山有福」。「佢兩個無吸毒、無賭錢，無紋身紋到成頭一撻撻已好好。我只想他們開開心心，做一個似樣的人。」
對於自己作為兒子的表現，他則直認有愧於母親。黃秋生學生時代經常被同學「蝦」，嘲笑他是「雜種」，有次他惱羞成怒，回家後大罵母親：「做咩生我出嚟？」還發晦氣把一張與母親的合照撕爛。冷靜過後他卻後悔不已，馬上用膠紙把照片黏好，還用相架鑲起。「我刻意將張撕爛的相放喺當眼處，提醒自己唔可以再發阿媽脾氣。」
又有一次，他肚子餓，嫌棄母親煮餸慢，不停粗聲粗氣催促，更一手把她端來的菜掃至散落一地。母親被他的舉動氣得哭了，他才知錯，立刻跪下認錯。「其實我真係好蠢，知錯都冇用啦，脾氣咁差，非常唔好。」
口硬心軟的他，其實很疼愛母親。在母親的最後歲月，經歷過一次肺部大手術，又中過三次風。他於是向上天許願，願意減壽10年，以換取母親活下來。結果母親在最後一次中風後癱瘓了10年，至86歲時過身。
母親走後兩年（2022年），他憑《白日青春》奪得金馬獎影帝，在領獎台上，他不忘向天上的母親道謝。「有年我獲提名，我拎住個吉的行李箱，諗住去台灣買書，結果冇獎攞，阿媽就話：『你去買書，咁梗係輸啦。』到呢一年攞獎，我最想告訴阿媽，我終於得到了，可惜佢已經不在了。」
他早年曾經在社交平台寫道：「懷念父親因他遠去，無須念慈因她常在我心。」
剛強背後，我看到一份莫失莫忘的母子情。
與父親的緣份 只相處短短4年
黃秋生與父親的緣份，只有短短4年。
最後見面那天，父親向他送上啤啤熊和一大排朱古力。母親跟他說，食完朱古力，父親便會回家。
他於是每天拼命地吃朱古力，期待父親回家的一天。結果朱古力吃完了，父親卻沒有回來。「吹牛！自此都無再出現！」
那隻啤啤熊，成了父親留給他的最後禮物。後來一天，啤啤熊被外婆丟掉，令他傷心不已。遺下一顆童心，埋於內心深處。
入行後，他為麥嘜動畫獻聲多年，負責聲演春田花花幼稚園的校長和茶餐廳侍應。這天發現，他的手機殼圖案，正是一隻麥兜公仔。
「之前有好多選擇嘅，又有老虎又剩，但我最鍾意𠵱家呢個。」抱着熊啤啤的他，腆覥地解釋。
誰說粗眉硬漢子，不能有童心一面？
