你認識陳湛文這位演員嗎？
對！就是電影《三夫》的四眼佬、《飯戲攻心》的陳熹、《命案》的變態殺手；還有劇集《IT狗》的男B，和《殺手廢J》的J。
 以上角色的共通點，並不只全由陳湛文飾演，還是廢宅毒頹一族，連他也坦言：「我都Lam咗年幾兩年廢宅毒頹。」
要成為一個界別的專業戶，也是成就解鎖。40歲的陳湛文，24歲才覺醒，當了5年社畜才投考演藝學院，30歲才真正踏上演員之路，捱過收入可升可跌可有可無的歲月，到2020年，才憑上述演出，讓人記得他的名字，初嘗演戲的甘甜。
有成功感嗎？「或多或少總有嘅，好似有一種守得雲開嘅感覺，但係變相我會對嚟緊嘅作品，壓力係大咗少少嘅。
「一來我唔想俾觀眾覺得，我又做番食老本嗰款廢宅毒頹；又想喺自己既有嘅能力上，再擴闊多少少空間，或者再挖深啲我嘅潛能。所以，除咗係壓力，其實都係一個推動力。」
由此可見，Chan Charm Man的「Charm」，不是慘，是Charm，苦盡甘來的魅力，更耀眼。

戲如人生

網絡世界發達，令人一個智能電話在手，便可通向全世界，也衍生了不少問題，陳湛文笑言，也誤墮過釣魚網站，身受其害。
「當時我冇搞雙重認證，一撳咗個釣魚網站，就俾人Hack咗個IG，搞咗成個幾月先攞番個Account。呢個俾人Hack嘅經歷同我喺新戲《全個世界都有電話》嘅情節一模一樣，所以完全唔使做功課！」
雖然人腦漸漸依靠電腦，但陳湛文說：「就算唔攞個電話出嚟，我都可以噏到老婆，仲有我爸、我媽、哥哥同家姐嘅電話號碼，就係5個，連最Friend嘅friend都唔記得嘞。
「我有朋友有一次話，自己同人講咗好多嘢，但只係打文字訊息，一句嘢都冇真正講過。我覺得好有趣，好似係我哋嘅身外物不停咁進化，而我哋嘅機能就好似不停咁退化。不過，如果我想對方好清晰咁接收我嘅態度、語氣嘅話，我都會打電話嘅。」

逆向思維

訪問這天，正值陳湛文為新劇及電影，進行拍攝工作期間，更曾創下連踩36小時的拍攝紀錄；新作又接連上映，有誰會想到，他曾因演戲收入不穩定，兩度萌生轉行的念頭。
「我24歲先考演藝學院，之前喺一間再保險公司，即係Support保險公司嘅公司，做咗5年Back office。畢業之後就喺劇場工作，收入都好唔穩定，我又30幾歲嘞，所以喺2016、2017年，我就考咗個保險業牌照，以防萬一。
「到拍咗《三夫》，雖然有提名『新人獎』，但係唔代表有嘢做，於是為咗賺生活費，我有做過其他工作。」
不過，陳湛文的轉行路，也是處處見伏。「首先我去咗做一個語音識別系統，糾正人哋啲讀音嘅，做咗幾個月，連個系統都未出街，就俾人解散咗成條Team。跟住我去做主題公園，又係做咗冇幾耐，就因為疫情封園。
「我當時諗，乜自己啲腳頭咁好，去到邊度，嗰度都係命不久矣嘅，哈哈！跟住就放棄轉行嘞。」

三人世界

事業穩步上揚，陳湛文坦言，感激太太與他同甘共苦。
「佢抵得諗，願意同我一齊捱，冇勸我轉行。我哋拍拖，連去大排檔都嫌貴，於是多數食茶記。我認自己唔浪漫，禮物都好少送。
「某個程度上，當我拍完第一部電影（《三夫》）之後，我就發覺，嘩！原來真係好辛苦㗎喎，呢種辛苦係，我身邊嘅人都要承受我嘅辛苦！當時我覺得，佢咁都承受到，梗係非佢莫屬嘞！」
陳太宋雯是前娛樂新聞主播，也是陳湛文於演藝學院的師姐，當他為《三夫》試鏡時，由於要帶同女對手，他便帶陳太一同前往。電影後來被媲美愛情動作片，心臟較弱小的女生，未必應付得到。
「唔係個個都啃到，自己嘅另一半，喺鏡頭面前咁樣㗎嘛，佢都得，咁基本上唔使揀啦！係咪先？」
二人於2019年拉埋天窗，陳湛文後來還搬到郊區築愛巢。「想有個大啲嘅空間，同我老婆二人世界嘅，點知搬咗入去，喔！就有咗餡咯，哈哈！」
二人世界變成三人世界，女兒Nina也快將兩歲，「做咗爸爸先發覺，有時真係會後知後覺，好似阿女唔知幾時學識攞個遙控俾我，然後指住個電視，不停話『睇！』，我同老婆都冇教過佢。」
結婚4年，陳湛文笑言，溝通最為重要。「間唔中會吵吵鬧鬧吓，吵吵鬧鬧完之後，又食番啲好嘢、去吓旅行，行吓行吓，一日一日就行到過嚟㗎嘞。」

溫柔的爸

有說女兒是父親的前世情人，對陳湛文來說，亦不例外。
先從女兒的名字Nina說起，是簡單的為了靚靚。「我睇過一個Chekhov（文學家契訶夫）嘅劇本，入面有一個角色叫Nina，我覺得呢個名好靚！」
即使工作多忙多累，他享受的，還是在家中湊女的時光。「我最叻幫佢沖涼，過程中成日問佢『得唔得？』，有一日佢咬字好清楚咁答我『得！』，我即刻開心到呆咗。」
來自瑣事的喜悅，不計其數，問他可有想過，跟25年後的女兒說甚麼，陳湛文的眼神瞬間變慈愛風，看着鏡頭，語氣萬般溫柔地說：「女，25年嘞！我知道你已經建立咗好多睇法，有好多嘢想做，你去做啦！但係唔好太過固執、太過執着，如果唔係自己會傷身㗎，知唔知？
「我知道你一定係好想追求完美，但係記住，呢個世界，有時唔完美都係完美嘅一部分嚟㗎。希望你睇到呢條片嘅時候，我仲在生啦！」（附送四萬笑容）
溫柔之下，充滿期許，最重要，還是要身體健康。