屹立漫畫界一個甲子，今年73歲的黃玉郎，創作出多部經典漫畫，如：《龍虎門》、《天子傳奇》、《神兵玄奇》等。時至今日，雖然市面充斥着動畫與手遊，漫畫已風光不再，但黃玉郎表示絕不退休，因為他的漫畫與時並進，而他近年推出的電子版漫畫，讀者人數就接近3,000萬，所以一年多前他就將公司整合，並搬遷到北角，一個面對無敵海景的5,000呎風水工作室。最近，他更在紅磡開了一個佔地三層樓的畫展，動作多多，力證香港漫畫仍未沒落。

漫畫界教父

被外界稱為「漫畫界教父」，黃玉郎笑言當之無愧。6歲移居香港的他，曾就讀潮商中學，當時他已是校內的風頭躉，皆因8歲已經毛遂自薦寄畫作到報館，在10歲那年獲得刊登，於校內聲名大噪，他憶說：「當時能夠有作品刊登喺報紙，真係好威㗎，老師都做唔到啦！我記得當年係刊登咗喺《中國學生周報》，之後我仲收到4蚊稿費，對一個𡃁仔來講，呢一個係好大嘅財富。其實，我讀書嘅時候，係橫掃晒學校嘅美術獎。」回想起當日的威水史，他不禁沾沾自喜。

漫畫界少林寺

13歲入行漫畫界的黃玉郎，1964年看着蕭條的漫畫業，油然而生一股雄心壯志，找父親借了1,000元開辦了一家漫畫社，靠着堅韌不拔精神和一支生花妙筆，至今畫了60年。在他筆下創造了很多響噹噹的漫畫角色，最影響深遠的一定是粗眉大眼的王小虎，他坦言：「其實有好多漫畫我都好鍾意，包括《天子傳奇》、《神兵玄奇》，當然唔少得《龍虎門》啦！外間好多傳聞，話我會封筆，我好肯定咁樣話，我一定會永遠咁樣做落去，畫畫啫又唔使出去打功夫，幾多歲都畫得。」其實，幾乎香港大部分的殿堂級漫畫家如馬榮成、邱福龍等，都曾經在他旗下受訓，「玉郎門」絕對是漫畫界的少林寺。

出獄東山再起

88年，黃玉郎被指因訛騙公款而入獄，也是令他十分無奈的事，他坦言：「犯咗官非，坐咗20個月監，梗係唔開心；期間公司仲被惡意收購，令我失去咗好多漫畫嘅版權，不過發生咗咁多年，我已經消化晒，再提都冇乜感覺。」93年出獄後，黃玉郎東山再起建立玉皇朝，再在漫畫市場叱吒一時。
而入行以來最令黃玉郎不開心的事，必定是2015年，他想於杭州千島湖興建的「玉郎巨星文化創意園」項目停工，這個預計以8億元興建的「動漫王國」，由於遇上不少複雜問題，其後又因為疫情，令他損失慘重。他直言：「我有好多朋友都投咗呢個項目，停工都令佢哋冇咗好多錢，興建呢個王國一直係我夢想，疫情過去，希望計劃能夠進行。」此外，他心底裏還有一事耿耿於懷，他慨嘆謂：「咁多年來，我都好擔心我第3個患有自閉症嘅仔，佢6呎高，23歲，得2歲智商，但係有時候就係天意弄人。𠵱家，我當然最想就係有一個好好嘅醫療技術，將佢醫番好，不過好渺茫。」

嘗盡人生巔峰

黃玉郎的人生中，開心的事遠比傷心的事多，他雀躍說：「86年，我間公司上市，係全世界第一間漫畫公司上市，前一晚我真係瞓唔着，因為嗰一刻真係我人生嘅巔峰，敲鐘嘅時候，我真係興奮到癲癲哋！」另外，能夠在35歲買下自己的Dreamhouse，也是令黃玉郎至今仍難以忘懷的事，他說：「我十幾歲拍拖嘅時候，同女朋友去淺水灣行沙灘，望住啲別墅，我就好期待有一日我可以住到呢啲咁靚嘅地方。」結果，他當年購入的淺水灣麗景道10號大屋，佔地達1.1萬呎，實用面積6,301呎，單是花園已經有3,000呎，雖然最後因為股災令他損手，但總算曾經擁有。

力拼再攀高峰

現今科技發達，手機、電動遊戲等娛樂設備圍着我們氹氹轉，漫畫公仔書，已風光不再，但憑漫畫起家的黃玉郎，手執電話肯定的說：「我揸住部手機北望神州，漫畫點會沒落？我推出嘅《英雄十八》漫畫，喺香港就賣實體書，內地市場我就用網上版賣書，𠵱家嘅讀者已經接近3,000萬，內地咁多人，少則幾百萬人嚟睇，多則可以過億，市場咁大，我冇驚過囉！」近年，黃玉郎動作多多，先是一年多前將公司的行政部與漫畫部整合，搬到北角一個佔地接近5,000呎的辦公室，並且找來玄學家精心擺設風水陣，助他一臂之力再攀高峰！