發佈時間：10:00 2023-07-28
講就天下無敵，做就無能為力。有幾多人，能夠像F4方程式中國錦標賽的首位香港女車手蕭詠雯（Vivian）一樣，有勇氣踏出第一步？
沒有強大的後台支持，正職在投資銀行工作的Vivian，為了圓車手夢，由頭到尾都願意貼錢追夢。
「份糧cover唔到㗎！仲會嘔凸，前後用咗六位數字。好難解釋到點解咁鍾意車，可能呢份熱愛喺DNA入面。」
完成珠海和寧波兩站賽事後，下月她會出戰平潭，目標是十一月殺入澳門尾站，順利完賽，為女車手爭一口氣。
香港第一
Vivian的車手生涯起步比人遲，今年四月，她首次接觸方程式賽車，五月就膽粗粗，在珠海參加F4方程式中國錦標賽，成為香港女性第一人。作為賽車新手，能夠與專業車手一較高下，平安完賽，更於六月寧波站其中一個回合打入頭十名，成績超額完成。
「好開心，好難以置信，我冇乜賽車經驗，好似發緊夢一樣。其實我BB嗰陣未識講嘢，已經對車好有興趣，會扮引擎聲。到後來大個識畫畫，我會畫車，唔會畫太陽同屋仔，亦唔鍾意玩公仔。」
由做投行對沖基金的OL，到跳上F4賽道，一切緣於疫情前，她有次玩小型賽車比賽贏得冠軍，被車隊T-1 Racing發掘，栽培她參加F4賽事。
「人一世物一世，梗係豁出去試下啦。賽車本身係一個好大開支嘅運動，𠵱家全部嘢，包括衫、車費、比賽費等等，都係我畀，用咗成六位數字，份糧都嘔凸。我平日工作好忙，又要抽時間玩車，可能一星期返一次深圳嘅小型賽車場練習，時間同金錢上都付出好多，好想努力搵到贊助，繼續玩落去。」
驚人意志
Vivian在賽車場上逢車過車，私底下的她，不算特別大膽，只試過玩skydiving。而在訪問中，她亦多次提到賽車危險，之前兩度出賽都幾乎中暑，好彩有驚無險，令她明白到提升技術之餘，亦要好好鍛煉體能，作為保護自己的第一步。
「嗰次揸揸吓車，開始覺得唞唔到氣，有啲暈，感覺車內好似有成五十幾度！我份人比較固執，見仲有兩、三個圈差唔多完，咪死頂捱埋落去。」
眼前的她，穿上比賽時的貼身賽車服接受訪問。雖然已開大冷氣，她又少穿了一層打底防火服，但摸摸她的戰衣，已感受到又焗又熱，可想而知，她作賽時的環境有幾惡劣。
而在第二站寧波比賽，Vivian遇上人生另一個考驗，要首次在雨中高速飛車，她說：「視野好差，咁多架車濺起水花，係會令你乜都睇唔到，好危險，要靠自己感覺同判斷力，繼續比賽。」
Vivian的意志力驚人，今年四月，她一抵達意大利即病倒，但依然堅持上陣一小時，和車隊並肩作戰，參加小型賽車廿四小時耐力賽。
爸爸驕傲
在美國讀書的Vivian，十六歲已考獲車牌，畢業後回流香港發展。香港人多擠迫，馬路又窄，但她笑言駕車和賽車是兩回事，奉行安全至上，「我平日揸車好慢，賽車先畀油。出面揸車好危險，唔到你控制，可能條街無啦啦有嘢跌落嚟，所以我揸車龜速到會被的士司機呠，哈哈！」
Vivian的父母早年已逝，身邊只剩下九十四歲的婆婆，「如果父母仍在，相信佢哋都會支持我賽車。其實我鍾意車，有少少係因為爸爸。細個時，佢會畀我坐大髀扮揸車。
「婆婆初頭覺得我係女仔，做乜玩啲咁危險嘅嘢，後來我帶佢睇我架車，見我嘅車隊，佢覺得放心，𠵱家變成支持我，幫女性爭番啖氣。我都驚訝佢會接受，因為佢個年代，女人一定要靠男人嘛。」
十一月壓軸的第五站F4澳門賽，適逢是第七十屆，Vivian希望可以成為史上第一位女賽車手完賽，「加上我爸爸係澳門人，所以我更加想做到，令佢為我驕傲。婆婆都話想睇我比賽，如果係，呢一幕會好感人。」
賽車背後有洋蔥，為家人，為女性，加油！
【東周刊】更多精彩 敬請瀏覽
《東周網》：https://eastweek.stheadline.com/
《東周刊》FB：https://www.facebook.com/eastweek.com.hk/
《東周刊》IG：https://www.instagram.com/eastweekhk/
《東周刊》微信公眾號：eastweekhk
