發佈時間：14:00 2026-11-08
由模特兒轉型做打女的楊梓菁，向來專注事業，對感情事保持低調，年前曾參演無綫劇《逆天奇案》、《法證先鋒》系列、《解決師》等，但在2023年竟秘密產子，「升呢」做人母。
轉眼間囝囝Jace已經3歲，楊梓菁坦承自己是單親媽媽，既要湊仔，又要打理生意。但為母則強，縱使休息時間不夠，但每朝見到Jace笑住嗌一聲媽咪，即為她打下一支強心針；加上一家人同心，由媽媽到弟妹都是「神隊友」，提供全天候支援，令她無後顧之憂，繼續在事業上全力向前衝。
開刀驚魂
現年39歲的楊梓菁（前名：楊柳青），前年被本刊獨家拍得未婚產子，其囝囝轉眼間已3歲大。有仔萬事足的她，也樂於分享跟囝囝的生活點滴，Jace的降臨，令她完完全全體會到生命的神奇，「阿仔出世頭一兩日，我完全冇辦法離開佢。見到佢呼吸、會笑會喊，係一個有血有肉有溫度的生命，感受真係好獨特。佢真係好好湊，日日瞓十幾個鐘，我就餵奶、換片，嗰刻先知原來做媽咪係咁。」
但當回憶在產房生產的一刻，她笑言相當驚險，因為原先選擇了無痛分娩，但最終卻要臨時開刀，她說︰「當穿咗羊水後，因為落咗啲無痛分娩嘅藥，我個人唔太清醒，只聽到醫生話Jace有兩、三次心跳率下降，即時要嘭嘭聲開刀。阿仔出世時重8磅2，個頭好大，醫生箝唔到出嚟，連麻醉師都幫手『推』佢出嚟。生完理應係同阿仔影合照，但俾佢咁推法，加上因為原先係順產，所以前一晚食飽入產房，end up個BB出咗嚟，我就喺度嘔。」
全家動員
初為人母的楊梓菁，除了睇育兒書學湊仔，同時還要挑戰作為一個單親媽媽的身份，為令小朋友健康成長，故由懷孕一刻已經做好心理準備，「我哋係意外有咗，當初都有諗會否因小朋友，而喺返埋一齊，但最終都係有問題解決不到，加上timing唔啱，我要一個人去面對。而我深思熟慮後，覺得自己都可以承擔，加上當時我媽咪同我講：『無論點，我都會支持你！』就係咁，我就決定生落嚟。」
單親媽媽不易做，楊梓菁除了演藝工作，還要打理自己開設的健康療癒工作室，幸好她全家一條心，她說︰「我係單親媽媽，現實中我都要工作，有時可能都要交低個仔俾屋企人照顧一段時間，好彩我有一班『神隊友』，阿媽、細佬、細妹都好幫手，後來仲請埋外傭姐姐，仲有好多朋友都主動過來幫忙湊仔。而我生仔前都特別上咗啲身心靈課程，學會愛小朋友前，亦學識要愛自己，因為個人情緒容易影響小朋友；而父母係子女塊鏡，一定要調節好自己心態，先可以令囝囝開心。」所以她對囝囝的愛經常宣之於口，講完「我愛你」，又會以行動錫錫，保持親子互動。
壓力爆錶
既要事業和家庭兩兼顧，楊梓菁又要努力搵錢，原來不經不覺間，積聚了不少壓力，隨着產子後，她的健康亦響起警號，身體一度出現免疫系統問題，甲狀腺亢進致大細眼，幸而經藥物治療後已逐漸康復。故她建議作為人母，間中都要抽時間享受獨處，「我間中會訂間酒店休息兩、三日，交佢俾婆婆照顧，畀自己叉叉電。」
楊梓菁雖然已學懂管理時間，但仍覺時間不夠用，「我自覺仍未係一個稱職的媽媽，有時放工，囝囝已經瞓咗覺，同佢講唔到睡前故事。我通常早上陪佢玩，有時甚至帶佢返埋舖頭，爭取親子時光，多啲同佢溝通傾偈。」對於會否望子成龍，她期望囝囝快樂成長，將來是一個善良兼有智慧的人。她亦笑言縱使工作繁重，但現在每日起身，見到Jace笑住跟她講早晨，已被即時融化，為新一天添上無限動力。
延伸內容 : 楊梓菁開拓新商機 大搞《身心靈配對計劃》
