發佈時間：17:30 2026-09-19
去年，正式成為獨立歌手的譚嘉儀（Kayee），家中養了兩隻可愛的貓咪。提起大女雪雪，Kayee至今仍心有餘悸，皆因牠兩個月大時，曾因嚴重肺炎在鬼門關前走了一轉：「好彩佢最後大難不死！」
而為了不讓雪雪孤單，這位用心良苦的「媽媽」，決定幫牠找個伴，於是迎來了相差4年的細佬Vanilla。兩隻貓咪不單止極具靈性，更加非常醒目，懂得聽指令甚至「回話」，成為了Kayee生命中不可或缺的治癒心頭肉。
險些失明
除飲飲食食外，譚嘉儀（Kayee）最大的娛樂就是與家中的兩隻愛貓玩樂。她表示，因有一位朋友的貓媽媽生了一竇貓仔，而其中一隻白雪雪的小貓特別活潑吸睛，瞬間融化了她的心： 「其實攞番嚟嗰時，我係好猶豫嘅，因為我不停問自己究竟我有冇呢個能力去照顧一隻貓呢？真係一生一世㗎嘛。但係我見到雪雪好得意、好活潑，我就同自己講：『不如畀自己試下啦！』」
不過，領養雪雪才一星期，就遇上寒流，加上對環境不適應，牠開始出現流鼻涕、流眼水的病徵。Kayee帶牠去診所照X光，醫生的一番話頓時讓她整個人呆了。因為雪雪患上嚴重的肺炎，對於只有兩個月大的幼貓來說，隨時面臨生命危險。Kayee隨即安排牠留醫，更揪心的是，當時正值世紀疫情，醫院謝絕探訪，她憶說：「我去到診所，見到佢哋擺個cam照住雪雪，我就透過iPad去睇佢，我見佢病到咁樣，我就不停喊，我一邊喊一邊話：『唉，雪雪⋯⋯你要快啲好番！』」
跟着，醫生向Kayee提出嘗試用一種強力的抗生素，但副作用極大，甚至有可能導致雪雪失明。面對這難題，令她內心近乎崩潰，她激動的說：「哇！聽到直頭崩潰啊！我第一次養貓，就要經歷佢咁重病，我又唔知點樣可以照顧佢，又唔知佢好唔好得番，嗰時個心情係非常、非常之複雜⋯⋯」
最後，Kayee決定用強力抗生素為雪雪治療；而雪雪就展現出頑強的生命力，擊退肺炎，並且眼睛亦安然無恙。出院後，Kayee在家裏安裝了氧氣箱，還整天開着暖氣，她回想： 「當時醫藥費都大概用咗3萬幾、4萬蚊，醫療費都已經唔在話下，而係嗰種惶恐嘅心情⋯⋯」整整半年的時間，Kayee隔着氧氣箱和雪雪玩耍、培養感情，慢慢調理成如今健康活潑的模樣。
日漸長大的雪雪，性格變得沉穩乖巧；由於，Kayee的工作性質經常要出差或長時間在外，故她開始擔心「囡囡」獨留家中會感到孤單。於是，她迎來了第二隻白色小貓—Vanilla。大女與細佬相差四年，為了讓兩隻貓咪和平共處，Kayee實施「隔離政策」：「直頭將佢兩個隔開晒，睇唔到對方嘅，但佢哋聞到對方嘅氣味，等雪雪可以慢慢接納。」起初，雪雪對於房門罅隙後的神秘氣味充滿好奇，幸好兩隻貓咪經過一輪摸索後，如今相處融洽。雖然雪雪不是熱情黐人的性格，但這位做姐姐卻極具風度，每當Vanilla衝過來爭寵時，牠總會默默讓開，盡顯大家姐風範。
幸福加倍
談起這兩隻寶貝的性格，Kayee笑言牠們各具特色，但共通點是「非常醒目」。大女雪雪文靜又幽雅，而且聽得懂hand hand、hi five及sit sit等各種指令，更神奇的是，牠還曾充當過家裏的「安全糾察」，「有一次，我哋廚房嘅雪櫃冇閂實，跟住雪雪就企咗喺廚房嘅門口度係咁喵、喵、喵⋯⋯我抱住佢入到去，就發現個雪櫃打開咗喎⋯⋯佢係非常、非常之聰明。」
為了將兩隻猫咪養到毛髮蓬鬆、肥美健康，嘉儀有一套獨家心得。除了定期餵飼寵物魚油來補充Omega-3，維持毛髮柔順之外；她還會烚雞蛋，切成細粒餵給愛吃蛋的Vanilla。遇到牠們腸胃不適或有軟便時，她則會將益生菌粉神不知鬼不覺地滲入食糧之中。
快樂的背後總藏着所有寵物主人最不想面對的現實—貓咪的壽命比人類短暫，Kayee直說相當恐懼：「有時睇戲見到劇情裏面，有寵物離開嘅時候，我就會想像自己嘅雪雪、Vanilla，如果真係有呢一日，我覺得我真係會崩潰，佢哋始終陪住我咁多年啊，真係好似自己嘅仔女一樣。但係我都要prepare我個心情，如果呢一日嚟嘅話，我都要去接受。惟有喺佢哋在生時，畀最好嘅回憶佢哋。」早前，Kayee於38歲生日時，公布「喜上加喜」，皆因她在意大利科莫湖首肯男友的求婚。這樣兩隻貓咪又多了「爸爸」錫，幸福加倍！
延伸閱讀：譚嘉儀38歲生日宣布結婚 開心收圈外男友巨型鑽戒 感激遇見給100%無私的愛
