人生，可以說是一趟只有單程路的旅行！只是，路程長短，節奏快慢，每個人都有屬於自己的步伐與風景。然而，當跨越一個又一個的高山低谷後，到達終點站，迎來的卻是一份看似無情的「死亡」習作。新世界創辦人鄭裕彤次子、周大福慈善基金主席鄭家成，近年大力提倡生死教育，去年自資拍攝訪談節目《關於‧快樂的死亡》後大獲好評，今年他決定延續這份感動，與HOY TV 77台合作拍攝第二季，並與主持人敖嘉年搭檔，請來一班老友嘉賓包括金燕玲、陳志雲、陳德森和後輩唐詩詠等笑談生死。

在鄭家成眼中，生與死本是一體，死亡既是人生旅途的終點，亦是另一段旅途的新起點，「好多人恐懼死亡，係因為唔知自己之後去邊度，就好似忽然放低你喺一個黑麻麻嘅森林，搵唔到出路；但當你透過修行，知道自己下站係去另一個好嘅地方，就唔會再有恐懼。而喺佛教角度，人死後會迎來重生，既然出世要擺滿月酒，生日又話要食飯慶祝，咁死亡簡直要開派對慶祝啦！」心態豁達，無論是走在康莊大道，或是踏過暴雨泥濘，處處皆是好風景。在抵達下一站之前，不妨擁抱當下，將生死皆付笑談中。

難忘阿爺回魂夜

身兼「淨緣慈善基金項目管理委員會主席」的鄭家成，這天訪問，細說為何會親自上陣主持節目，「我以往好怕出鏡㗎！但自從拍咗呢個生死教育節目，覺得好有意義，亦多咗人得益，我就唔再介意要拋頭露面。」
今年七十有三的他，憶述人生第一次近距離接觸死亡，是在上世紀六十年代。雖然當時他還是一個孩童，但至今依然記憶猶新：「阿爺當時喺屋企過身，我好深刻記得，殯儀館架車慢慢駛入嚟接走阿爺嘅遺體之後，屋企就整咗個靈堂喺客廳中央。中國人嘅靈堂布置好恐怖㗎嘛，加上老人家又常常提起『回魂夜』，夜晚每次經過大廳都幾驚吓。因為人走咗啫，但神識仲喺度，話返嚟就返嚟。」

年輕時的他，跟一般人一樣會恐懼死亡，亦視之為忌諱，在長輩面前不敢談及。但隨着慢慢長大，多了人生閱歷，加上接觸佛法後，他對死亡的原始恐懼逐漸消失。
「人對死亡恐懼，往往存在很多『未知』。以前怕死，覺得死係好恐怖，因為冇把握，又驚會痛苦，唔知自己死咗之後，個神識去咗邊度，就好似忽然放低你喺一個黑麻麻嘅森林，搵唔到出路，又唔知路上遇到啲乜，真係幾驚。其實諗深一層，如果相信輪迴嘅話，死亡除咗係上一頁嘅終結，亦係下一頁嘅開始，係百分之百嘅重生。既然出世要擺滿月酒，生日又話要食飯慶祝，咁死亡簡直要開派對啦！」

他又笑言，現在對死亡的詮釋，就像要去一次終極的長途旅行：「去旅行除咗需要機票同現金，還要準備『行李』。從佛教角度，那就是當世修行積累的福報與智慧。只要當世做足準備，下一世多多少少都可以喺自己嘅掌握之中。既然有路可循，又何須再害怕呢？」

彤叔身教大智慧

工作日理萬機，為何會對生死課題產生興趣，從而再製作節目？鄭家成坦言：「年輕時覺得『自己仲後生啫，仲有大把時間。』跟住就忽略咗呢個課題。但當年紀有番咁上下，一個人靜落嚟嘅時候，自自然然又開始諗，將來要點樣交帶？以人嘅平均壽命85歲計算，其實一生眨吓眼就過咗，望吓張身份證，再諗番40年前嘅事，真係好似昨日咁近。」

近年他發現不少人都鍾意拿着手機看影片，於是就同公司慈善基金團隊，構思製作一輯關於生死課題嘅節目。「開頭只係用啲好基本嘅器材同場景，以最低成本攝製，去年放上YouTube和HOY TV頻道播出後，反應好好，於是今年做第二季，就洽談HOY TV聯手製作，仲搵埋敖嘉年一齊主持。」

十年前面對父親鄭裕彤離世，鄭家成坦言對生死亦有了更深體會。回憶與父親的相處點滴，他說：「小時候父親終日為事業奔波，超級忙，幾乎晚晚都要應酬，間中會帶我哋去飲茶。那年代，屋企邊有咩補習先生，放學返嚟做完功課就去瞓，最多上吓天台玩。父親雖然學歷唔高，亦唔會經常講大道理，但喺佢身上亦學到處事哲學。我哋平日會靜靜觀察父親做生意與待人接物的實際行為，特別係『勤、誠、義』這三個字，成為我一生謹守嘅座右銘。」

而在「生死」這個極度敏感的課題上，彤叔更展現了「只做不說」的無聲大智慧。「父親從未喺我哋面前提過或討論過任何關於死亡的話題，但到咗其人生後段，原來早已默默做好部署，將所有家族事務與後續事宜安排得妥妥當當。」

熱鬧告別大派對

借鑑父親，鄭家成亦開始對未來的「終極大旅行」着手安排。他笑說：「點解一定要等到死咗，先去殯儀館搞咁多嘢？我真係到嗰一日，儀式最好盡量簡單，親戚朋友千祈唔好嚟煩我，我要好好安息呀！仲搞咁多繁文縟節儀式，陣間影響我旅行、害我連飛機都上唔到咁點算先？加上在殯儀館裏躺着的遺容，無論怎樣粉飾，也不及生前瀟灑好看，何必讓親朋好友留下沉重的記憶？要見面，當然要喺自己最開心、最精彩、最靚嘅時候。」

他又構想，在自己精神奕奕的時候，舉辦一場熱熱鬧鬧的生前告別派對，邀請所有好朋友過來「玩到癲為止」，在歡笑聲中好好道別。「但太早搞，我怕要搞好多次；太遲搞，又驚時間太急趕唔切，呢個等我再好好思考吓！哈哈！」
而信佛30年的他，笑言佛學漸漸改變了其性格和思想：「開頭都係睇吓佛經，聽大師講吓道理，再思考吓，慢慢信心就越來越大。但我比較懶，唔夠精進，間中喺屋企唸吓密宗嘅咒《百字明》，有時會打吓坐。不過學佛後，睇嘢清晰好多，人亦平和咗，冇咁容易有極端反應。」

人生下半場，鄭家成除了工作，閒時亦愛行善，好好地去享受人生。但假若生命只剩下最後24小時，他希望可以自己一個人靜下來「懺悔」：「人喺世上唔係嚟攞債就係嚟還債，那怕平時在地鐵上無意踩到人，或互相罵了一句，都係種下了傷害人的因果。我習慣每天懺悔，就係盡量幫自己減低啲利息（業力），利息減晒，去旅行先可以輕裝上陣。」