發佈時間：12:59 2026-05-11
「煒哥」陳煒的醫生丈夫陳國強，近年沉迷收藏動漫figure。繼《龍珠》後，過去一年亦瘋狂尋找《北斗之拳》一系列figure產品。由遠至80年代的大膠公仔、連載漫畫書，到近年推出、關節可動的pvc塑膠，和造型精細的樹脂人形figure，只要看見而又合心水，他就會想盡辦法將整個系列買回來。
除了陳國強家中書房，其位於將軍澳和上環兩間診所，更擺滿了珍藏品，變成展館。「其實我細個冇玩過，之後讀醫又冇時間，但結婚後成個人都開心晒，呢幾年先開始收藏。閒時我會拆晒啲figure公仔出嚟，擺吓甫士，影吓相，雖然只係小小樂趣，但真係超級減壓㗎！」
男人的浪漫，確實係你知我知，單眼佬都知！
一指必殺技
這天陳國強早早返回上環診所，精選過去一年搜羅回來的《北斗之拳》模型公仔，整齊地列陣。叫他跟着主角健次郎，伸出右手食指指向敵人的動作擺甫，他笑說：「佢一出呢招，會講句『你已經死了』，然後敵人個頭就會爆炸，哈哈！」
看見陳國強的《北斗之拳》figure，系列齊全且藏量驚人，以為他由細儲到大，誰知他竟然說：「呢度嘅藏品，全部都係過去一年買回來。有啲係80年代嘅早期產物，如大膠健次郎公仔，當年根據電視動畫勾畫出來，線條冇咁細緻，個樣有啲似李小龍，又似史泰龍。其後就進化到關節可動，到2000年仲有超像可動系列等。隨着製作技術提升，好多figure都可以擺出唔同甫士，加埋情景配搭，玩時增添趣味。」
除了尋找一些陳年精品，陳國強亦鍾情動輒數千元至上萬元一隻，近年大hit，造工精細的樹脂figure，家中更藏有大型的Prime 1 Studio系列。「過去幾年pvc塑膠嘅figure已經做得好精美，而且大量生產，價錢相宜超抵玩；而樹脂figure就因為工藝家自己畫自己做，造工超精細，但產量少，價錢較貴，由幾千到萬幾蚊一隻都有，適合高階玩家。」
紀念日漫畫
雖然收藏只有一年時間，但陳國強卻相當沉迷，更不時「狂煲」相關漫畫知識：「漫畫中的角色超過100個，健次郎、雷奧、聖帝……，我唔係全部認得晒，但作者原哲夫好勁，好人、壞人，每個角色造型都認真設計，即使一個大壞蛋都畫得十分細緻。而且故事注入好多小朋友元素，更滲入咗人生哲學，唔係淨係得暴力。近期有影視平台播映重製版《北斗之拳》，全新動畫比早年畫得更精細和流暢，令到漫畫翻hit，模型品牌BANDAI停產好多年的《北斗之拳》模型，亦趁勢喺6月重出一系列figure，和一番賞抽選品。」
除了figure，他搜羅了一些中古連載漫畫書，「呢啲漫畫書以前售價只係180円（當年匯率約12港元）一本，依家喺網上想搵本『靚仔』啲嘅，最少都要幾千蚊，我就買咗幾本。一本出版日期係我同太太嘅結婚紀念日9月26日，另一本係太太嘅生日11月21日。」
開盒有跳蚤
為了這些心愛的動漫藏品，陳國強除了一有空檔就瀏覽日本二手購物網站尋寶外，還會向本地賣家招手。陳國強笑言在港也不時找到心頭好，當中最有趣的是交收過程：「啲賣家咩人都有，有啲俾人感覺『好宅』、有啲竟然係女仔、仲有啲成個look有晒design咁款。
而交收地點更走遍咗全香港18區，有啲地方仲係未曾去過。而難忘嘅係，試過買啲二、三十年前嘅中古品，交收打開盒檢查嗰刻，竟然見到啲會郁嘅跳蚤喺入面。又試過成lot買入，以為齊套，但原來仲差一兩隻，要再努力去搵，但即使幾難搵嘅款，基本上都可以用錢解決，搵齊嗰刻係最開心嘅！」 而太太陳煒對丈夫突如其來的興趣，則沒有多加干涉，「太太比較女性化，唔鍾意動漫嘢，而喺屋企我亦冇佔用太多位置，大部份都係攞喺書房。不過有時網購停唔到手，試過訂咗隻好巨型figure返嚟，太太打俾我話有個雪櫃送咗嚟，因為太大箱，佢以為我買咗個新雪櫃呀！」
延伸內容 : 50歲陳煒艷壓TVB小花！ 大晒白滑長腿回饋觀眾
延伸內容 : 陳煒居功至煒 事業家庭兩得意
