發佈時間：18:00 2026-04-16
一個藝術家，對自己的作品要求高，對居所的要求一樣高，除了要住得舒適，室內的空間感、布局、設計和氛圍亦有講究。
擅長畫熊貓的當代水墨畫家黃湘詅，兩年半前買入港島東一個900呎單位後，便找來設計師將其大改造。除了將三房改成一房，又偷位將客飯廳變大，加上擺放了不少水晶和琉璃，為全屋增添雅緻。
「我鍾意屋企有空間感，但香港一般的單位面積偏細，所以設計師就幫我善用屋內每一吋空間，客、飯廳盡量唔做櫃，令整體感覺更開揚闊落，視覺上係好睇，但實用性就冇咁高囉！」
藥師佛保佑平安
習畫數十年的黃湘詅，對顏色觸覺敏銳，在裝修初期和設計師商討居所用色時，便提議用上她畫畫愛用的「三綠」色和米白色作主調，「『三綠』色偏暖，在Tiffany Blue上加少少綠、少少黃和少少紅，調色睇起嚟唔會好刺眼。我哋畫畫嘅綠色都分好多種，如大師張大千嘅畫，好多時都有石綠同花青，而我就鍾意用『三綠』色。天花牆身用米白色，就令成間屋睇落更開揚和光猛。在不同季節，我都愛放置不同鮮花點綴，令一室變得更有生氣。」
除了色調和諧，黃湘詅在家中又放置了不少琉璃擺設，「琉璃擺設係我其中一位徒弟大兵所製作，佢送咗條龍同綠度母菩薩俾我，我覺得好靚，之後就幫襯佢買咗個藥師佛同關二爺嘅琉璃像，我信佛，藥師佛能消災延壽，擺喺屋企可以保佑平安和健康。」
除了琉璃，她也喜愛水晶，廳中裝設兩盞水晶吊燈外，又在窗邊放置了一座水晶小几和花樽，「水晶花樽喺香港買，Lalique出品，樽身雕刻和設計好靚，成個好紮實，磨沙又靚，散發出一陣神秘藝術氣息，配埋同品牌的鏡面玻璃小几，放喺呢個角落，有種安靜和安神的力量。」
父親畫作加持
為了令居所增加空間感，她將三房打通成一房，令房間面積變大，另又在睡房窗旁放置一張畫枱，「平日大多時間都在畫室畫畫，在家中只會畫一些小品。」
黃湘詅的父親是畫壇宗師黃君璧，更是蔣介石太太宋美齡的畫畫老師，她自小在耳濡目染下，身上早已埋下藝術種子。長大後她跟父親一樣畫得一手栩栩如生的水墨畫。為了令家居增添藝術氣息，她又特別在客飯廳牆身裝設畫線，方便掛上不同的作品點綴，「現在掛着的兩幅都是先父的作品，佢嘅水墨畫得好出色，客廳的《竹谿幽居》係佢畫於87歲的作品，描繪嘅係竹林青幽生活；而飯廳那幅係宮筆嘅小品鳥語花香圖，兩幅畫嘅色系同意境都好襯呢間屋。」
喜歡畫畫的她亦愛收集硯台，每次見到合眼緣的總會火速買下，「有時到內地寫生，見到靚的硯台都會買回來收藏，當中在肇慶找到的坑種最靚，不過我唔識睇㗎，只知摸上去好滑，有啲側邊雕晒字，好似一件藝術品。」
鍾情熊貓26年
全屋雜物不多，大多擺設都是徒弟送贈，或是她外遊時購買，「葫蘆是我另一位在北京的徒弟做，上了很多層漆，然後髹上金線再拋光，大大細細都要經過繁鎖的工序製作，屬非物質文化遺產的手工藝，彌足珍貴。」
擅長畫熊貓的黃湘詅，下月初將和海洋公園合作，在香港藝術中心舉行《墨韻熊貓》慈善作品展，在她畫筆下的水墨熊貓，包括盈盈、樂樂、安安、可可，還有去年出世的一對雙胞胎加加、得得，隻隻繪畫得活潑可愛。她更將部分精選作品製作成月曆，「在家中有時亦會即興畫一些熊貓扇畫，有時又會到海洋公園實地寫生。」
問她為何喜歡畫熊貓，她笑說：「大約26年前，有次去四川旅遊，去當地的熊貓基地參觀，畫了第一隻熊貓後，便開始愛上熊貓。加上熊貓只係成日坐喺度，或者發吽哣，便輕易贏晒全世界人鍾意，就好似我小時候，集萬千寵愛在一身。」
見「貓」如見自己，難怪她特別愛熊貓了。
