發佈時間：12:00 2025-09-18
走入大館，眼前的「光影邊緣─香港電影的臥底世界」展覽，一如其名，神還原的場景，令人憶起一幕又一幕的經典臥底片。《無間道》的金句：「三年又三年」、《掃毒》的「耶穌都留唔住佢」，有聲有畫面。
擔任聯合策展人兼創意總監的陳詠燊，揀來8部具有代表性的臥底片致敬。「我哋根據流行程度嚟揀，好在乎觀眾嘅投入程度，所以一定有《無間道》、《辣手神探》同《英雄本色II》等。」
10月5日展期完結後，他坦言不想將心血送去堆填區，「希望政府支持電影業，提供地方俾業界擺道具，久唔久做下展覽，對旅遊業都有幫助㗎！」
拆車重組
陳詠燊在2000年投身影圈，編劇出身的他最初跟隨馬偉豪打天下，歷來參與過的電影包括《追擊8月15》、《新紮師妹》系列，當中笑爆嘴的方中Sir個「Sir」字，正是由他設計寫法。他一度轉行，直至2018年首次執導《逆流大叔》聲名大噪，到2022年拍《飯氣攻心》，更奠定地位。
今次他踩過界辦展覽，由3月構思到正式揭幕，只有數個月時間。而選中的8部電影：《邊緣人》、《龍虎風雲》、《英雄本色II》、《辣手神探》、《龍在邊緣》、《無間道》、《門徒》和《掃毒》，全部深入民心，拍出臥底游走正邪之間的掙扎。
「我好鍾意睇警匪片，做編劇後發現臥底好好寫，一行出來已經有戲，係警察同賊人之間嘅一個身份，要瞞來瞞去。比起荷李活，唔知點解香港拍得最多臥底題材，差唔多一線演員都做過一次臥底咁滯，有香港特色。」
展覽中的人氣打卡位，除了《無間道》陳永仁在窗邊用石膏手打摩斯密碼外，就要數兩架吊起的車，為遷就古蹟大館展廳入口狹窄等規定，要拆散再砌過。
「我專登搵咗兩架80、90年代嘅車，首先要喺工場吊起，車頭向下，不停撞落地撞凹，再研究碎片點整，拆散後運入嚟還原。如果留心睇，其實前面嗰架係賊車，有珠寶同槍，佢哋逃走時向後面架警車開槍，所以擋風玻璃有子彈窿㗎。」
偉仔借獎
眾多場景中，陳詠燊對重現《龍虎風雲》中周潤發和李修賢藏身鐵皮屋，然後與警方爆發槍戰一幕最滿意。「本身美術已經做得好，最特別係我哋玩埋槍戰，嘭嘭嘭，營造俾警方圍剿嘅感覺。現場仲要放埋煙，美術、燈光、聲效，配合得天衣無縫。」
說着說着，陳詠燊自爆有兩部片是漏網之魚，忍痛放棄致敬。一部是他師傅馬偉豪的《新紮師妹》，另一部是周星馳的《逃學威龍》。
「我諗過整《逃學威龍》入面，實驗最重要係記性嗰幕㗎，哈哈！仲諗埋掟粉刷遊戲，但呈現出來效果好似一間普通班房，冇曾近榮先生喺度，成就唔到件事。我又試過擺《新紮師妹》落展覽，但喜劇感太強，好似有少少同主題甩tone，擺明荒誕，探索唔到臥底電影世界嘅謎團。」
除了全新炮製的場景外，現場還展出一系列珍貴的劇本手稿、電影分鏡手繪和電影獎項。他自言厚面皮地問梁朝偉、麥兆輝、劉偉強等人相借，大家都爽快答應，令他好感恩。「今次搞展覽，我有少少上癮，滿足感好大，好似喺戲院聽見大家笑聲一樣。」
最後八卦一問，今次展覽關於臥底，問他小時候可有想過做警察？他哈哈大笑：「梗係冇啦！我咁孱，由細到大，我一下引體上升都未做到過呀！」
現實做不到，唯有睇展覽時交戲體驗一下吧。
《東周網》訪談系列節目《星桄伴我心》9月重磅嘉賓：
即睇：羅毓儀淚眼訴說4段情 冧數林俊其出「七連招」追求 甜蜜剖白：我想出年結婚！
