發佈時間：09:00 2025-05-04
中國人熱愛「開枱」！每副共144隻的麻雀牌，更是親友間不可或缺的聯誼聖物。雖然現在大部分麻雀已被機器雕製取代，但家中三代都從事麻雀製作生意的張順景﹙景叔﹚，卻堅持每日在佐敦其開設的麻雀店內，一心一意專注地以熟練手藝製造手雕麻雀。早前他更獲機管局邀請，在機場參與文化藝術節展覽，介紹其手雕麻雀工藝。每副牌由選膠、雕刻、上色、打磨，都由景叔親手製造，他說：「後生時，一日雕到兩副牌，𠵱家年紀大咗，十日左右先雕一副，新訂單要排到出年先交到貨。雕麻雀的過程唔難，只係需要大量時間，而雕刻刀亦非常鋒利，一不留神就好容易整損手，所以每一隻手雕麻雀真係有血有汗㗎！」
60年匠人工藝
這天訪問，景叔在店內端出一個充滿鏽蝕的小鐵盒，再打開拿出一套用了幾十年的雕刻刀具，並即席示範其有60年功力的雕工。見他隨手拿起一把挑刀，在白雪雪的麻雀原料上用力推，一撇一捺，再來來回回修整，十數分鐘便雕出一隻八萬，「雕萬子同番子會用挑刀，長時間都係用佢，因為有好多筆劃需要挑，所以刀尖最容易損蝕，要經常打磨；索子就要刮刀用力拉出一條直線，再用挑刀雕上筍紋；筒子用自家特製的十字架形木鑽，在鑽軸裝上一片有四至五條齒紋的刀片，一鑽就劃出筒子色樣的圓圈。而一筒的圓形太大，要用特製的圓規形刀具雕刻。」
雕好麻雀後，景叔再從櫃裏拿出毛筆和顏料上色，「等乾透後用刮刀刮走表面溢出的顏料，再打磨一下，一隻手雕麻雀就大功告成。」
為提高效率，景叔平日習慣先雕好一整副麻雀，集齊幾副再一次過上色。「集中流程，可以節省製作時間。始終一個人得一對手，我依家返到舖頭下午主力做生意，同客人交流，晚飯過後先開始雕刻工序。」
而麻雀四種花式，即筒、索、萬、番子當中，景叔說最難雕是萬子，「因為筆劃最多，每一劃至少要挑四至五次，所以很花時間。而挑番子的東、南、西、北、中、發、白，和索子亦要一定時間。當中筒子就最快手，因為有手動木鑽，雖然只係重覆轉兩三次就搞掂，但因為速度高，鑽軸上的鐵片會發熱，隻手一唔夠定，鐵片就會斷，飛出嚟隻手馬上遭殃，真係流血㗎！所以係製造過程中最危險。後生嗰陣，試過受傷後冇理傷口，搞到發炎，十幾日開唔到工。」
家中三代麻雀師
景叔與麻雀結緣，源自其家中三代都是從事麻雀行業，他於十四歲便入行，「由阿爺嗰代，屋企就做麻雀生意，阿爺係磨牌師傅，日日用粗砂，幼砂、水砂砂紙後，再用樹葉，以人手打磨麻雀，磨到手掌起晒繭冇晒感覺。阿爸就係麻雀雕刻師，創立「標記蔴雀」。我自細就經常喺舖頭出入，每日放學返去，啲師傅見我冇嘢做，就俾把刀我玩，雕吓雕吓，師傅話都似樣喎，就開始俾啲牌我雕，十幾歲已經雕到一副麻雀。嗰時當舖頭唔夠伙記，會叫我返去幫手送貨，或者幫麻雀上色。因為讀書成績唔好，做做吓索性留喺舖頭幫手，就咁入咗行，到我呢代一做就60幾年，仲承繼埋阿爸創立嘅『招牌』。」
「標記蔴雀」在過去60多年來先後搬舖三次，但店址都在廣東道一帶，「五、六十年代，呢頭有不少麻雀館、夜總會，第一間標記開喺廣東道，雖然當時一條街有好多店賣麻雀，但生意好，大家唔驚互搶生意。當時好多人買麻雀㗎，加上出口量又多，有時自己雕唔切，仲要外判俾其他師傅做。」
不過景叔稱現在巿況已大不如前，「因為一副機雕麻雀幾百蚊就有交易，手雕始終係人手造，價錢唔會平，我賣都要$6500一副，真係鍾意同欣賞先會買。近年買手雕麻雀嘅客人多數係外國人，和一些三、四十歲，有經濟能力又捨得消費嘅本地中年人。除了手雕麻雀，我亦有出售機雕麻雀，不過我賣嘅係機雕都過千蚊一副，用最靚嘅阿加力膠，唔用平價嘅回收膠，因為嗰啲劣質膠有陣味，我入咁多貨，日日對住，賺到錢都唔夠睇醫生。」
工作坊傳承文化
30年前，景叔的麻雀店搬到佐敦道現址繼續經營，雖然店面越縮越細，但他仍然享受着每日看舖和雕麻雀的生活。「我每年只在年初一休息，其餘日子除咗打風，我日日朝11至晚11都喺舖頭。」
自2014年手雕麻雀被列為非物質文化遺產後，景叔的店亦開始備受關注，近年更成為遊客打卡熱點，年前他已不時到中學和大學開辦工作坊，教授手雕麻雀技藝。去年農曆新年，他更獲邀到加拿大多輪多作示範表演。「十幾年前開始同旅發局合作，去會展搞講座，近年就去學校多啲，推廣手雕麻雀文化。」
問他有沒有計劃找人接班，將手藝傳承，他笑稱：「搵人接班就無謂喇，學好呢門手藝最少都要十年八載，而且仲要功多藝熟，但𠵱家都唔多生意，冇咁多牌俾你去雕同練習。咁啱近年潮流興懷舊啫，如果冇呢股潮流，可能一年都賣唔出一副，學識手藝都搵唔到食，搞吓工作坊當興趣班大家開心吓咪好囉！」
景叔育有三子女，但亦無意接手他的生意，「佢哋都有自己嘅天地，但早幾年仔女都有幫我喺社交媒體宣傳，吸納咗一啲新嘅外國客人。」為了營運店舖，景叔近年亦加添一些客製服務，「我幫客人喺麻雀上，雕一啲有意思嘅中文字句、祝福句和圖案，價錢逐隻計，有啲公司會一次過訂好多隻送俾客戶。」
即使已年屆72歲，但景叔笑稱不會輕言退休，「或者等到真係要自然淘汰，好似要拆樓、租約期滿、身體捱唔住，真係冇晒辦法咯，到時先唔做囉！但只要我仲有能力、仲有收入唔使蝕錢嘅話，呢間舖都會經營落去。」
《東周網》訪談系列節目《星桄伴我心》5月重磅嘉賓：
即睇：魯振順八級鋼琴，出過唱片，手揸兩層樓 曾割脈斷9條手筋：「我對唔住媽媽！」
