發佈時間：19:40 2025-04-05
堪輿學家蘇民峰習慣和愛人每月出埠旅行，在部份常到的國家，更索性在當地買下物業，省去長期住酒店的高昂費用。繼早年在北海道二世古購入服務式住宅後，3年前他又在美國加州洛杉磯比華利山，買下一幢面積2,000多呎的Town House（聯排別墅）。
他稱：「我愛人喺L.A.讀書，我哋每年都過去兩次探朋友。疫情期間上網睇完相就俾錢買入，完全冇睇過現樓。但因為裝修進度緩慢，拖咗3年都未搞掂，今年索性直接買傢俬執靚間屋就算。」今年1月的加州大火慶幸離間屋好遠，沒有被波及，有網民驚嘆蘇師傅是神算，自身帶着趨吉避凶的體質。
神算避過加州大火
蘇民峰和愛人上月到美國洛杉磯小休，此行除了相約朋友食同玩，亦抽時間為居所物色傢俬，「間屋兩層高，有兩個客廳、一個飯廳、三間房、三個廁所，仲有個巨型車房，原本諗住裝修好先買傢俬，但裝修拖咗好耐，每次過嚟一個月，整吓停吓，三年都係裝修好一層，間屋仲係『空nelnel』，家徒四壁得個殼，今次過嚟決定唔再整，直接買傢俬，同裝好全屋窗簾。最開心係買咗張飯枱，因為呢3年一直都喺廚房張Bar枱食飯。」
今年1月，美國加州發生災難性大火，超過16,000棟建築被摧毀，蘇民峰居住的區域，慶幸未有波及，「好慘呀！近海好多過千萬一間嘅屋成排燒晒，我喺香港睇住Google地圖，知道我哋住嗰度離火場都有一段距離，加上中間隔咗條好闊嘅高速公路，啲火先燒唔到過去。」有網民卻驚嘆蘇師傅是神算，自身帶着趨吉避凶的體質。
冬天滑雪實彈射擊
愛滑雪的蘇民峰，今次留在當地3星期，期間亦抽了數天，到鄰近城巿Park City滑雪，「我哋喺比華利山搭一小時飛機到鹽湖城，再搭40分鐘車就到Park City，方便過由香港去北海道。加上呢個係全美最大滑雪場，滑道更多更刺激，好玩過二世古好多。我去到搵咗條最容易嘅路俾愛人玩，之後就自己一個四圍滑。」
除了滑雪，他又會跟當地的老朋友到槍會玩實彈射擊，「朋友有幾百支真槍，除咗曲呎、仲有狙擊手專用嘅長槍，每次去玩，佢都帶定好多支搶，同幾盒子彈。佢哋玩槍係不斷發射，啲子彈好似唔使錢咁。」見他在分享的短片中槍法如神，他牙擦擦地說：「咁我嘅準繩度都好高㗎，唔使瞄，好多槍都射中紅心，或有分嘅部分，但隔離啲人就射到『烏哩馬查』！」
夏天暢遊周邊城市
蘇民峰笑稱若在當地長期居住，生活會相當乏味，「如果你啲時間冇用，可以過去長住，但我每年去兩次就夠喇，因為感覺喺度浪費緊生命。無論要見朋友，或者出去食餐飯，都要預留個半鐘車去，個半鐘車返，如果塞吓車時間就更長，好多時間都浪費咗喺交通上。而且周邊娛樂設施相對少，所以夏天過去，我都會去周邊國家或城巿旅遊，之前去過馬蹄灣、羚羊峽谷等，雖然路途遙遠，但風景好靚好值得去。舊年仲去咗墨西哥城，由香港去要搭一日半飛機，喺L.A.去幾個鐘就搞掂。」
雖然蘇民峰身家豐厚，但亦認為當地消費貴得驚人，「食嘢係比早年多咗選擇，但貴到黐線呢！3個人食碗越南粉埋單百幾蚊美金。有次食西餐，7個人埋單3,000幾美金，淨係貼士都接近1,000美金。我喺香港多數都係買餸煮飯，冇乜錢使，啲錢全部留番去旅行使。」
《東周網》訪談系列節目《星桄伴我心》重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
即睇：倪樂琳曾因心口胎記感自卑 爆媽媽鍾意某男星
