發佈時間：09:00 2025-03-23
生日、結婚、百日宴⋯⋯一個靚靚的翻糖蛋糕，絕對會令派對氣氛高漲。擅長製作漂浮蛋糕的劉志穎（Jimmy），明星客人隨手數來，便有古天樂、阿Sa、MC張天賦、黃翠如等，受歡迎程度有辦你睇。
「2016年我開公司時，覺得啲人將蛋糕賣得太平，用咁多心機，但賣$200或$300一磅，其實是糟蹋自己雙手。不如玩高級啲，收比較好的價錢，然後用心去做。第一個唔可以叫藝術品，但當整到第100個，就可以將藝術融入雙手中。」
Jimmy創意無限，整蛋糕整到識噴火噴煙，絕對有資格講蛋糕的藝術。
古仔回頭客
做開工程師的Jimmy，當年在藝人好友陳敏之的慫恿下，膽粗粗在長沙灣開店。他回憶道：「那年她生日，見到我的蛋糕，便跟我說：『開舖啦，我實撐你喎！ 』」於是他付諸行動，將認知的工程力學，放入去製作出「可以用腳支撐起成個人」的翻糖蛋糕。起初，他撞板多過食飯，後來在不斷改進蛋糕的高度、重量方面的限制，和準確計算到搖擺幅度後，終於不用再擔心送貨時，蛋糕會毁掉。
Jimmy稱最高峰時，試過一個月接18個蛋糕訂單，而每個閒閒地收幾千，甚或幾萬元。以為他出神入化的手藝，一定是師承乜乜大師？錯！原來是無師自通。
「自學不難，當你有地方、有機器、唔怕掉嘢，怎會做不到？YouTube和IG未必教晒你所有嘢，但可以參考，bookmark定，睇下幾時應用到。好似最近我整的飛鷹蛋糕，其實冇學過，我跟着相片不斷試，前期做好雕塑部份，後面部份就似砌模型，加加減減。」
不少明星都慕名而至，找Jimmy度身訂造蛋糕。他先後3次為古仔製作《明日戰記》、菲林和《一家人大戰機械人》的主題蛋糕，「第一次要多謝阿Bob（林盛斌），有日他打給我，話要送生日蛋糕給古仔。當時《明日戰記》上畫，咁就整他的心血盔甲啦！之後兩年，古仔的公司再搵我。至於張寶兒夫婦，他們好信任我，只是告訴我派對主題，我再配合會場的backdrop和佈置，放相關元素落蛋糕即可。」
倒模Zimomo
Jimmy近來最滿意的傑作，非幾可亂真的Zimomo蛋糕莫屬。他說：「我特登買了幾十隻Labubu figure返來研究，唔易搵㗎！可能好多人唔知，原來它們最左邊兩隻牙黐住，其他牙分開，仲有啲毛，我搞得最耐，成隻用咗40幾個小時先整好。」
這個震憾人心的Zimomo蛋糕，盛惠5位數字，跟Jimmy早前在社交網貼出、標明$7,000的《死侍與狼人》蛋糕，同樣引起大迴響。
「啲人會話$7,000，賺到你笑啦！其實關鍵在於你點睇。我一個月最多做10個蛋糕，當賺$7萬，要交租，間舖要長開冷氣，又驚雪櫃過熱等等，要養住一啲大家見唔到嘅嘢。」
不少人會覺得翻糖蛋糕最大作用是打卡，好睇唔好食，Jimmy說：「我好自豪這些是藝術品，而且可以話你聽是好食的，只不過個base冇任何水果，而是一個用料靚的朱古力蛋糕。」
薪火相傳，Jimmy有收徒弟，亦有飛往台灣、新加坡等地開班。雖然他呻做這一行是折磨，不能生病，但當見到客人收到蛋糕時的笑容，一切都值得。
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
