發佈時間：10:12 2023-10-31
時裝設計師何國鉦（Dorian），縱橫業界30年，見慣風浪，萬料不到會患上焦慮症，慶幸兩年前民政處邀請他協辦時裝比賽，令他有如找到救生圈。
「疫情幾年，令我自覺冇存在價值，但接觸呢班後生仔之後，發覺可以做啲新嘢。如果當日搵唔到呢條出路，我諗我會黐線！」
去年底，他成立亞洲新一代創意設計協會，扶持一班後輩。訪問這天，他就帶隊在尖沙咀舉行花生騷。教識徒弟無師父？他未驚過。只希望青出於藍，為設計界出一分力。
患焦慮症
性格樂觀的Dorian，好鍾意返工，一直認為香港人個個都有壓力，照道理，焦慮症與他無關。但幾年前有一日，他非常頭痛，去睇心臟科和腦神經科，才知道出事。「兩個醫生都診斷我患焦慮症，仲嚇我慢慢會變成抑鬱症，甚至有自殺傾向，我當初係接受唔到。」
食精神科藥物食足一年，副作用多籮籮，明明很累卻失眠，個人好沮喪，似喪屍。最終因忍受不了而停藥，改為靠做運動和瑜伽等去放鬆心情，平衡生活。
「有呢個病，會成日亂諗嘢，撞啱疫情，我曾經諗係咪應該退休？但我先50歲出頭，分分鐘有80歲命，之後30年點算？工作係我嘅生命，唔做嘢可能有更多病痛。」
說着說着，他一臉內疚，並坦言何媽媽也有焦慮症，於20年前某日，突然血壓升至200幾，「醫生話呢個病係有事件觸發，我諗或多或少關我事，因為當時我逼佢退休，令佢突然冇咗精神寄託。」
Dorian指疫情期間，何媽媽長期困在家，病情翻發，幸好能及早發現，「真係要多啲關心身邊人，唔好當有呢個病嘅就係怪人，要接受佢哋，多啲同佢哋傾偈。」
傳承重要
Dorian能夠走出低谷，完全是誤打誤撞。疫情期間，很多活動停擺，他坐在家中悶得發慌，越想越負面，自覺沒有存在價值，剛好收到民政處的電話，請他擔任別出「深」裁時裝設計比賽的評審和導師，頓時令他空虛的心，得以填補。「累積咗咁多年經驗，係時候回饋社會，等年輕人行少啲冤枉路。」
和後生仔接觸，首先是要克服代溝，潮語聽唔明？只好慢慢學。「我講麵粉公仔，佢哋唔明㗎！所以傳承好重要，將一啲有文化特色嘅舊嘢延續落去，好似裙褂咁。佢哋覺得喺我身上學到好多嘢，其實雙向，我都有得着，意識到要跳出框框，用舊物結合新元素。以前成日周圍飛，未試過靜靜地去做一件咁有滿足感嘅事。」
今年已是第3屆舉行別出「深」裁時裝設計比賽，在此之前，Dorian已出心出力，培育一班年輕的時裝設計師，例如舉行工作坊、到學校舉行講座等，甚至在去年底成立亞洲新一代創意設計協會（CDA-Asia），向這班時裝界的未來棟樑，傳達環保的使命，並響應社會趨勢，合併科技發展。
「9月9號，CDA-Asia會喺會展舉行成立典禮，屆時會以元宇宙方式呈現出來，會有一個AI嘅我上台講嘢，而時裝設計比賽也會舉行決賽。」
強大後盾
下一步，Dorian打算向政府申請資助，亦會開showroom，希望壯大CDA-Asia這個平台。他願擔當這班年輕時裝設計師的強大後盾，於他們勝出比賽後，提供後續，出任經理人角色，代理他們的品牌，幫手生產和銷售。
「第2屆冠軍張慧珊教緊書，其實佢好想做時裝設計，奈何家庭環境唔容許佢追夢，更加激發我要去幫佢哋。好多時有人搵我做嘢，我會交換條件，要求佢哋搵埋呢班後生仔。
「好多人教人會留一手，我唔會，亦唔會斤斤計較。如果當日我太計較做比賽評審冇酬勞，就唔會知道會有更美好嘅將來。」
早前，他獲政府委任為製衣業訓練局咨詢委員會成員，重頭戲是下月的Fashion Summit，屆時會在戲曲中心舉行首場環保時裝騷，已邀得六個國家的資深時裝設計師參加，「我嘅collection會同粵劇有關，亦相信未來會有更多公職，每個崗位都係新挑戰。」
薪火相傳，一切唯心造。
