發佈時間：19:06 2025-03-15
把最後言明，需要勇氣，還不可失霸氣。
入行12個年頭的J. Arie（雷深如），5年前轉當獨立歌手，唱盡偏鋒題材，自負盈虧。早前宣布於2月舉行其「最後的演唱會」，連主題「J. Atriarchy」，也要把父權社會（Patriarchy）私有化，霸氣盡露。
「暫時係最後一個演唱會，我會咁講，唔係我今日就收山，聽日又會出道，仲未去到咁快！因為我開show，喺麥花臣開show，2月15號，同日我會出大碟，呢隻碟基本上籌備咗兩、三年。「我做獨立歌手之後，呢10幾首歌，到目前為止我要講嘅嘢，暫時已經講晒嘞。實驗性又好、好偏激嘅歌曲Style，我暫時已經做晒。除非我人生突然有衝擊，例如我突然閃婚，或者突然整咗個B出嚟⋯⋯可能就會寫歌，冇就應該會退隱田園。」
口裏說「退隱」，但站在台上12載，35歲的J. Arie，總有最珍惜的Moment在心頭。
「入行之後，我覺得最正嘅，通常係嗰一刻過咗，事後先會醒起原來係咁正！做嘅時候，個腦總係有好多旁門左道嘅聲音，可能有時喺台上面，突然間有100個聲音⋯⋯令到喉嚨又乾、手又震，但事後就會醒起，其實好正！有機會企喺台上面，係最正嘅！
「所以有呢一刻，就要做盡佢！怕咩？其實好多時都係咁，所以要心理狀況強大得好緊要！係沒得怯嘅，出嚟做咩都好，一上到台一定要覺得自己最正，冇得縮嘅，一縮就死！一縮把聲又收縮、所有肌肉又收縮，好似龜縮。
「我都要洗自己腦，話俾自己聽我係Diva，雖則我啲歌好Queen好女王，但我係真心做我嘅歌，我亦都希望自己嘅Live performance，可以做到好強嘅氣場。」
不論台上台下，活在當下，就是霸氣之表現。
新舊並存
既然能大膽地宣布演唱會為「最後」，足見J. Arie早已有所計劃，她還想好了「後着」。
「會做多啲幕後嘅工作，呢幾年都有做。上個演唱會已經係4年前，到2024年，我覺得係時候理吓自己，因為前兩年冇，只係寫歌、做配樂。去年就想做一隻碟，連埋開一個show。喺咩都冇，連今年第一首歌〈甜心老爹〉都冇嘅時候，我已經開始砌今次嘅Rundown，所以整件事已經構思咗兩、三年。」
曾幾何時，J. Arie轉當獨立歌手時，對其一系列舊作甚為抗拒，這次人大了，心境也變化了。
「一定要唱！真係要感激有當時嘅作品，就算𠵱家嘅樂迷，未必每個都有聽我新嘅作品，雖然我覺得𠵱家嗰啲係精彩絕倫，但始終喺街上面，𠵱家都有人會講〈你死我活〉、〈我錯〉、〈第一志願〉⋯⋯我覺得真係好彩有呢啲歌，可能會認得吓我個樣；又或者可能我偶爾拍咗啲有趣嘅綜藝，我都會慶幸。」
感恩之外，堅持追夢也要有所付出，最實際的，自然是金錢。
「暫時我仲係負資產，仲未脫貧，基本上真係㗎！做獨立歌手，如果要做幕前嘅嘢，保持唱歌、拍MV，但係冇唱片公司嘅資源，所以係燒錢燒到PK！所以我𠵱家點樣Run呢個所謂嘅business，係勤力啲寫歌，會有多啲版稅。
「有時有啲歌手，會叫我一個Package去做，除咗寫曲，可能做埋製作，就有製作費。另外去年第一次嘅新嘗試，係幫ViuTV劇集《飛黃騰達》做30集配樂，做足半年，每一日都要開工，但我未來想試多啲，要有時間Practise先會有進步。」
開了源，但J. Arie這個初學者，難免撞板。
「Kick到我懷疑人生，哪管平時做音樂、做製作，配樂係另一個範疇、另一個世界。我覺得最搞笑，係我會錯晒劇情嘅意思，我永遠覺得一個男仔關心一個女仔，一定有企圖，一定係想追佢。裏面有個類似嘅劇情，我記得係陳安立明明啱啱識Ivy So，已經突然好關心個女仔，所以我突然間配咗個好Sexy嘅音樂。導演覆我問，幾分幾秒我搞咩，原來佢係想Ivy So入佢條Team，唔係想追人哋，所以有目的性咁對人哋好。」
樂做性女
曾一度住劏房，連銀行戶口的餘額也不能從自動櫃員機撳出，所以在節流上，J. Arie也絕不馬虎。
「𠵱家可以撳到出嚟，仲可以去茶記食嘢，𠵱家食茶記都好癲，好食啲嘅，成90幾蚊一個餐，都唔係餐嘞，係90幾蚊一碟嘢，所以我都揀比較平嘅消夜餐，或者下午茶。」
生於中產家庭的J. Arie，近年形象、言談與曲風也被歸類為大膽，其父母也看得一額汗。
「佢哋覺得It’s too overwhelming（太讓人不知所措），都係都似普羅大眾嘅諗法，通常去到真係有性嘅題材嘅歌，又或者同性有關嘅，就會話好Overwhelming、Too much、Too explicit（太露骨），但係其他歌佢哋又冇特別留意，但我想講嗰啲其他歌先Overwhelming，先係精髓之處，你唔好俾一啲表面蒙蔽咗啦！」
愛之深，除了口裏責一責，心裏還是有愛。
「佢哋間唔時會以利是嘅方式塞俾我，俾我可以儲吓呢啲零用，5嚿水利是，唔係新年又唔係聖誕又唔係生日，間唔使濕吓呢啲，但係我唔使㗎嘞，有陣時我唔知呢個係衰格，定係叫有骨氣，定係唔應該咁有骨氣，係硬頸啦！」
他人看不穿，還標籤她為「性女」，但J. Arie毫不介懷。
「好開心！仲開心過俾人話Sexy！我都冇本錢sexy，雖然我都冇得露，但係如果能夠成為一個被標籤為一個性女，我覺得嘩！已經係超額完成。其實我終極嘅目標，係想提倡正確嘅性教育，我直頭想成個教育制度改革咗佢，我覺得由小學開始，要加人際關係科、情緒科、性教育科，同埋理財科。
「因為我覺得呢4樣嘢，先至係成個人生最苦惱嘅嘢，錢、人際關係、性生活圓唔圓滿⋯⋯如果解決咗呢啲煩惱，人生就冇煩惱。」
因「羽毛球」論曾一度鬧得沸沸揚揚，J. Arie則不乏「球技交流」機會，只是還有煩惱。
「我唔缺囝囝嘅，但係要搵一個囝囝，可以做到Partner，又可以培育下一代，又係另外一回事。唉呀！太難搵嘞！」
跨越EMO
外看大情大性，J. Arie內裏也有斷弦時。
「我去年年中就有過Emo（憂鬱），我覺得呢個moment係好多嘢積埋嘅，之前我爆過幾個月，我諗係5月至8月。去年年頭，發生咗一樣我好唔想成真嘅事，就係我契爺河國榮⋯⋯
「屋企人話話新聞唔知出咗啲咩，咁我即刻上Google search，即刻去IG碌吓。咁我當然知道佢屋企發生咩事，但係我冇諗到真係發生咗。我嗰一刻係平靜嘅，但係我去佢嘅Funeral，但係喺Funeral嗰度，自然啲情緒就爆咗出嚟，到5月至8月期間，就好似癱瘓咗咁。」
情緒停擺，J. Arie寄情事業外，還緊緊的收埋自己。
「我都有繼續做嘢，但整個人就消失咗，冇乜點Update social media，Fans搵我又冇應，又冇開live，直頭係唔想見人。基本上係日日喊，喊到啲微笑管爆晒，我諗冇乜人知，但我想講，我將我呢啲情感，冇乜人會預計我會咁，但係每個人私底下，係會咁Emo。」
她還把自身感受，寫進作品中。
「其實我嗰陣時唔開心到，覺得其實走（離世）都冇乜所謂，亦都有開始睇一兩次Therapist，但係呢因為我窮，I can't afford therapy！我直頭將呢句我寫埋落歌詞，你明唔明呀？即係平極都千幾蚊，所以我覺得有陣時情緒治療，都係要好多錢。我心諗，同一個friend係由零開始講，同一個三唔識七嘅人又係由零開始講，點解我唔搵下另外一個方法。
「卒之我搵咗一啲好有用嘅書，我睇好多好多書，嗰兩、三個月期間，我睇咗十幾廿本，我發覺呢個方式係令我平靜嘅。」
書中不只有黃金屋，也令她想通了。
「我有個friend又係好熟嗰啲咩MBTI，傾開就話我呢個ENTJ嘅人，好啱睇一個叫阿德勒（Alfred Adler）嘅心理學家嘅書，仲有Freud（弗洛伊德）同榮格（Carl Gustav Jung），呢3個係並列嘅。
「譬如弗洛伊德嗰啲會話，你嘅過去就會影響你𠵱家；但係阿德勒講，你唔好理你之前發生過啲乜嘢，𠵱家呢一刻你有勇氣去改變，就可以即刻改變！同埋𠵱家呢一刻先係主宰你嘅未來，我覺得好有用！呢本書叫《被討厭的勇氣》。」
《東周網》訪談系列節目《星桄伴我心》3月重磅嘉賓：
即睇：喬寶寶細仔不良於行 陪伴中風病母 感觸落淚：見得幾耐得幾耐
即睇：65歲林漪娸親揭與某藝人不和內幕 笑談老公鐵漢柔情 分享美魔女秘訣
