發佈時間：11:01 2026-08-10
領養是福！義工為了幫待家的動物尋找合適的領養家庭，可算是各奇謀。最近一隻名叫「壽司」的面罩貓，義工就為其以AI製作短片，有性感韓國女團伴舞，為「壽司郎」打氣。你有意領養「壽司郎」嗎？
勁爆韓國女團伴舞
動物義工都要懂marketing、要懂包裝推銷。以下這隻名叫壽司的黑白面罩貓，又稱為賓士貓，男仔，今年大約3歲，性情溫馴易熟落。義工就為牠製作熱舞短片，並幫她改名為「壽司郎」，希望在勁爆韓國女團伴舞M V推銷吓，大家可以對壽司郎留下深刻印象！
以下是義工的推銷貼文：
「嘩，呢隻貓……Buff全滿喎！點搵屋企啊，唔好玩啦…」
等等！唔好碌走住🥹🙏🏻
俾我用2分鐘，介紹下今日主角Sushi⋯⋯
2024年因為欖口收地Sushi被帶到Shelter。
第一次離開熟悉環境，又要面對幾十隻陌生貓、陌生人，對一隻膽小嘅貓嚟講，佢個世界…突然崩塌咗
Sushi一直都係喺shelter 被欺負嗰個，食飯&瞓覺要讓，一個安心休息嘅角落都冇…
長期壓力之下，開始出現壓力禿，肚仔嘅毛都舐到甩晒．．．
佢只係努力咁生存，但命運從來冇打算放過佢。」
Shelter爆發貓瘟倖存者
「2025年12月，Shelter爆發貓瘟。暫托姐姐望住Sushi，心入面只得一個念頭：「我唔想佢死。」
身邊好多人反對，因為知道要面對好多醫療開支同疾病風險，暫託姐姐依然帶佢離開。
原本以為終於可以開始過好日子
有一日，暫托突然message我：
「Sushi唔食嘢。」
我哋即刻安排上門醫生，而第二朝一早Sushi嘔血、血便。檢查結果發現佢有FIV（貓愛滋）+有蟲
蛋白質偏低，腸胃有大量寄生蟲，令佢長期無法正常吸收營養。」
有貓愛滋被誤解
「但最令人心酸唔係呢啲病，而係每一次帶Sushi去領養日，一次，一次向大家解釋：感染FIV嘅貓，其實唔等於絕症。佢哋只係免疫力比一般貓弱少少
只要定期檢查、均衡飲食、保持室內生活、減少壓力，一樣可以活得健康快樂，可以陪主人好多好多年。
可惜，好多人未深入了解就已經選擇放棄。
Sushi從來唔係因為佢唔可愛，唔係因為佢唔乖。佢輸俾嘅係人類對FIV嘅誤解，原本有機會可能屬於佢嘅家，就咁溜走。但即使經歷過咁多苦難，Sushi依然願意相信人，依然會用頭仔輕輕撞你隻手，依然會喺你身邊慢慢放鬆反肚仔，依然期待有一日，有人唔會只睇到佢身上嘅標籤，而係睇見真正嘅佢！」
看完以上壽司郎嘅經歷，如果你願意俾一個機會呢個歷盡風浪嘅Sushi小朋友。請連同自我介紹+窗網照片WhatsApp 9646 6142 Ally (家訪窗網是必須）
有貓愛滋的貓咪在領養路上會較困難，因為很多人對貓愛滋有誤解，認為具有高度傳染性。有領養帶貓愛滋病毒的動物診所護士就表示，沒有特別為家中原居民與愛滋貓隔離，亦沒有分開飲水和進食，多年後為貓貓進行測試，家中原居民並沒有因此成為貓愛滋病毒𢹂帶者。而照顧貓愛滋病毒測試陽性的貓咪，和一般家貓一樣，只是牠們抵抗力較弱，當病徵出現時盡快由醫生診治處方適當藥物及照顧，基本上壽命和普通家貓一樣。
