發佈時間：20:10 2026-06-17
瑜伽導師日前跑步經過草叢救起兩眼疾貓B收養，同日有街坊在同一位置發現另一隻疑是同胎貓B，眼疾更嚴重，已帶往獸醫診所治療，境況堪虐，兩眼已失明。
瑜伽導師Ann於6月8日跑步時在博愛醫院附近遇見兩隻年幼貓B，當時牠們幾乎衝出馬路，於是快手救起帶回家，之後帶往獸醫診所檢查，發現兩個貓B皆左眼失明。診所留下貓B幫牠們尋家，經考慮後於4日後（6月15日）決定收編，由救命恩人變身愛心家長。然而原來在6月8日瑜伽導師Ann救貓後數小時，有街坊在同一地點發現另一隻眼疾更嚴重的貓B，於是救起。街坊其後得知瑜伽導師在同位置拾起兩貓，故聯絡她希望能接收剩下的苦命貓，讓牠們一家團聚，然而瑜伽導師拒絕，令她十分氣憤。
街坊、瑜伽導師前後腳救起同胎3貓B
事緣6月8日早上有網民在社交網站發帖指在元朗博愛醫院附近發現兩貓B，望有人救援：「今日朝頭早喺博愛醫院對面單車徑見到兩隻貓仔，拎咗個鞋盒畀咗啲糧，睇下有冇有心人收養（各位車友行過注意小心唔好整到啲貓）」（chickhavetotry@threads）
街坊C小組見到帖文後到現場尋找貓B，但已不見鞋盒，在現場尋找到聽到貓咪叫聲，循聲音搜索找到一隻嚴重眼疾貓B，從身形推斷能是鞋盒同胎兄弟。之後C小姐從社交網絡得知瑜伽導師Ann在她們到場前已帶走兩隻貓B並送到診所，於是透過社交帳號聯絡，希望對方聯絡診所接收這一隻剩下的貓咪醫治，惟對方拒絕。
C小姐向小編說，被拒絕當下感到氣憤。她惟有帶貓B去其他診所求醫，獸醫檢查後確定眼疾嚴重，很大機會無法保留雙眼。之後處方了抗生素、眼藥水及奶粉等給她照顧貓B，稍後覆診檢查進度。
C小姐說，她沒有照顧這類嚴重眼疾貓B經歷，但都要頂硬上。幸貓B很爭氣，能夠主動進食，無須餵奶。C小時見貓B情況穩定，考慮到牠一個B孤伶伶，故再聯絡瑜伽導師Ann希望她能收留貓B，讓牠們一家團聚，然而再一次遭到拒絕。
街坊C氣憤 一力承擔貓B後續照顧
C之後見到瑜伽導師Ann在社交網絡發帖收養了眼疾貓B後，主動聯絡本刊：「佢喺facebook度打鑼打鼓同人講做咗好事拯救咗對貓，根本就係攞對貓做宣傳
什麼瑜伽老師，人美心善如果係點解唔救埋呢一隻，等呢隻全盲嘅孤苦伶仃自己一個....偽善」
一家團聚希望落空後，C小姐硬着頭皮努大學習照顧小貓。
C小姐提到：「其實我執到嘅時候都好驚，唔識得處理，頂硬上...
Bb返嚟嘅時候其實已經可以自行飲食(仲要超大食)同大小二便～ 雖然佢隻眼睇唔到嘢～但係好懂性～從來唔會亂叫～ 好乖～但係見佢自己一個～睇唔到嘢又好可憐～
因為bb實在太細個，醫生建議如果要手術都要到佢有四個月後～先可以進行 摘除眼球手術～其實咁細個小朋友要面對大手術重要自己一個～冇父母冇兄弟姊妹陪～其實真係好心痛佢～面對將來雙目都失明～希望佢可以適應～開開心心生活 ～
生命改變生命～希望救咗佢嗰對兄弟姊妹嘅人～唔好再選擇性救援～要救就一齊救～唔好放棄任何一個生命～亦都希望嗰對貓b真正得到幸福～唔好畀人利用做宣傳～雖然佢哋同胎唔可以一齊生活～都祝佢哋生活愉快～～」
她同時希望透過本刊多謝浪貓薈，在她出差這幾天幫手照顧貓B。
「真係好難得，佢哋都好忙，都幫我，同埋我真係冇呢啲經驗湊呢啲傷殘貓，佢畀咗好多意見我，幫我解決問題。今日義工冇瞓覺都幫我帶隻貓去覆診。」
C小姐說無須為貓B籌醫療費：「我唔係為籌錢而救佢～ 都仲係我能力以內可以做到。」
瑜伽導師表示能力有限 養動物須審慎考量
有關指控，小編再聯絡瑜伽導師Ann，她感到十分無奈：「當日到黃昏時候有一個讀者佢係自稱執到另外一隻，佢向我查詢診所可否接收呢一隻。
翌日，我馬上和佢查詢診診所，但係收到嘅答覆係診所因為資源不足同仍然冇義工願意接收貓貓嘅情況下，唔能夠再接收呢一隻貓貓啦，我亦都轉述診所說話可能對方自己搵貓義工會係更快途徑。
我亦都回覆了對方上述事宜。當時對方亦都表示明白同理解。」
至於有否考慮領養餘下這一隻更嚴重眼疾B，讓牠們一家團聚，她回覆說：「我唔能夠再多一隻貓貓啦！因為我一個女仔生活，我仲有兩隻狗同生活要照顧。
要做一個負責任嘅主人，我唔能夠再接呢隻貓貓啦，而家照顧呢兩隻初生貓貓已經疲於奔命，好大壓力㗎。所以抱歉我能力唔可以再接受。」
她又提到：「養動物唔可以下巴輕輕㗎，我都考慮咗好耐，真係好審慎我先至領養呢兩隻貓貓。幫得到就幫。
現階段，我希望照顧好兩隻初生殘疾貓貓，同我兩隻狗狗先。
希望嗰隻貓貓都有人領養佢啦。」
Ann提供兩貓最新生活照，兩隻已改名陳跑跑和陳步步的貓B蹦蹦跳在家玩耍十分開心。另外Ann亦有兩狗需要照顧，責任不輕。
