新年攻防戰︱拜年親戚必問!5大超煩問題+回應教學

新年攻防戰︱拜年親戚必問!5大超煩問題+回應教學

更新時間:11:27 2025-01-30
發佈時間:11:27 2025-01-30

去拜年,Mean爆問答大會正式開始,最怕親朋戚友問長問短,上至結婚生仔,下至學業成績或人工,咪話唔頭痕!想答得得體,即睇以下應對攻略,見招拆招!

單身,會被問幾時拍拖,拍拖就被問幾時結婚,結婚更加被問幾時生BB!回答時可以模稜兩可,甚至反過來稱讚對方,逗長輩開心,輕鬆終結話題。或者玩幽默,不單不用回答尷尬問題,還能讓對方「冇聲出」!

正所謂「只要我不尷尬,尷尬的就是別人」,另一招是可以「反客為主」,到達拜年場合後,先下手為強,在對方開口前,你先問對方超煩問題:「姑媽新年快樂!姑丈血壓有冇下降?表弟成績好唔好啊?要溫下書喎!」

問題1. 「拍拖未?結婚未?仲未生小朋友?」

答:「太多選擇,我仲揀緊」、「我係一隻無腳雀仔」、「仲未諗住喎,你個仔都好似未拍拖,叫佢同我交流吓。」、「而家事業為上,當然專心工作搵錢啦!」、「冇呀,我諗住過兩年做和尚喇!」、「緣分到就會有小朋友」、「你個仔都未生喎,點解?」、「你幫手養?」

問題2:「讀書讀成點?」、「返緊咩工?幾錢人工?」

答:「不過不失咁啦,咁你個仔/女呢?」、「工當然要返,每個月都有人工!」、「人工夠生活啦!簽咗保密協議,透露咗人工,會炒我㗎。新年流流,俾條生路嚟行吓。」

問題 3:「男/女朋友做緊咩?」

答:「佢正職係佢父母嘅仔女,副職係我情人!」

問題 4:「打算幾時買樓?」

答:「樓價咁貴仲入市咁傻豬?不如你封利是封大啲幫補下」

問題 5:「讀呢科畢咗業搵唔搵到食?」

答:「都未畢業我點知?我讀嚟都係為咗追尋夢想,人冇夢想同條咸魚有咩分別?」