今年1月，血癌帶走了媽媽，陳敏之痛得仿如斷臂。感情要好得不只是母女，既是閨蜜，也是拍檔，過去每個人生階段，甚至日常生活，媽媽一一見證及融入。「媽咪就好似我左右手咁，我覺得自己冇咗隻手，感覺係無助無力，好似砌puzzle，永遠缺少咗重要嘅一塊。有時我會諗，如果我同媽媽關係冇咁close，我係咪冇咁傷心？」陳敏之說。

感覺如斷臂

        第一次面對至親死亡，是2003年，當時24歲的陳敏之，驚聞父親有末期肺癌，發現患癌後約1個月，因病情惡化而病逝。「爸爸突然暈低入院，一日後就走咗，佢好後生好靚仔，白頭髮都冇條，點解會係咁？當時我得廿幾歲，仲未賺到錢回報佢，我又未結婚未生仔，仲未睇到我長大。我當時真係好傷心，傷心到好似厭食咁，每日只係飲杯水，食唔到嘢，瘦到得90幾磅。當時我媽好擔心，仲話︰『你再係咁，連你都入埋醫院㗎嘞。』就係當時開始佢帶我返教會。」

       父母先後逝世，同樣傷痛，但不同的是因父親走得太突然，而媽媽是一年前已開始發現有病，起碼叫做有心理準備。

      「媽咪舊年已有呢個病，佢係好返之後復發。由上年1月發現有病到佢走，啱啱好係一年，醫生初時仲話媽咪唔會耐，只係得兩、三個月命，我當然癲咗，覺得冇可能！所以過去一年，陪佢喜歡做嘅嘢，例如旅行、打牌等等，總之佢好開心。最開心係玩孫，媽媽最愛係我個仔，佢過咗好多歡樂時光，但係爸爸冇享樂過，佢嘅人生係好唔開心咁就走咗，我哋想孝順佢都冇機會。但爸爸走時，我同佢講我會好好照顧媽咪，會供細佬讀大學，好多嘢我全部做足，所以爸爸係安樂。」

信仰豐富生命

       「媽媽好叻叻豬，畀多咗自己一段日子。媽媽信主好多年，我真係見到神係『托』住媽媽，甚至『托』住我嘅家庭。媽媽喺未復發前講過：『我唔怕死㗎！我遲早都要上天堂㗎啦！』我聽得出因為神住喺佢心裏面，所以先會大膽咁講。如果神唔係都『托』住我，我諗會做傻事、唔食嘢、喊到抽筋，成個人會好頹。」

        有其母必有其女，其實不只是陳媽媽「叻叻豬」，陳敏之也是，就連她自己也覺得，作為女兒，已超額完成應盡的責任，給了媽媽無限的愛，她說要獎給自己一隻白兔仔。

陪媽媽瞓醫院

        所言非虛，自父親逝世後，陳敏之肩負一家之主的責任，捱更抵夜的努力工作，為的是希望母親及弟弟無後顧之憂。母親去年入院，陳敏之安排她入住私家醫院，獲最好的治療及照顧外，她更拋夫棄子的在醫院照顧母親，如24小時私家看護，日夜衣不解帶守在床邊。

        「上年媽咪喺醫院時，醫生護士都同佢講：『你好幸福，你個女真係好孝順。』因為我真係喺醫院度瞓，我想爭取更多時間，陪伴佢照顧佢，例如佢一起身，我可以扶佢去洗手間。醫生朝早7點見到頭髮蓬鬆嘅我，就話：『乜你又喺度？麗英（陳母名字）你真係好幸福呀！』」

        「我知道媽咪係好安慰，佢同人講：『我對仔女好錫我，今次我有咗呢個病，更加見到仔女真係好乖，我真係好感動，好感恩。』我聽到媽咪咁講，我係好感動，因為我好少聽到佢咁講。」

         過去一年，陳敏之爭取每分每秒，讓媽媽沐浴在無盡的愛與快樂中，除了是愛，更出於不想有半點遺憾。陳敏之說：「我同媽咪感情雖然係好，但我覺得陪得佢唔夠多，因為要工作要湊仔，最好可以24小時陪住媽咪就好嘞！好多嘢係唔好計較付出，你做咗，都好過唔做而有遺憾。」

        「舊年我堅持要去個family trip, 10月我哋全家去泰國，點知1月媽咪個病就復發，好彩我哋有去。嗰次旅行媽咪係好開心，最記得去泳池游水，媽咪開心到係咁游，當時我拍片，已經覺得佢可能就去天堂，佢游去我身邊時，我問佢開唔開心，佢話：『正呀！』我特登拍低，係因為我要留念，我知道，媽咪一定會走，可能係一年後，或者係十年後。點知呢條片真係變成最後，我將呢個片段，加埋其他片，剪輯咗一條24分鐘嘅片，喺安息禮播放。」

終身美麗

        陳敏之說媽媽離世時，是沒有半點痛苦，走得安詳，沒有一臉病容，美麗如昔。「雖然媽咪講過無懼死亡，但我知道佢唔捨得我哋，佢當時好想講嘢但講唔到，係有唔開心，但冇法，患有重病，冇受到煎熬已經好感恩。媽媽真係好靚，個樣好高貴、好有福氣，由佢喺醫院離開，到火化，都係好好，非常完美。我未見過咁完美咁平安，我覺得係因為神，亦都係媽咪嘅福氣。」

        陳媽媽的最後一程，是陳敏之東奔西走的張羅大大小小的事情如棺木、場地等，譜寫完美的人生終章。「好多親友都話點解我咁傷心，但都可以搞好個安息禮，就連媽咪個妝，我都爭啲化埋，我見到媽咪個遺容時，我冇驚過，反而覺得好想幫佢加多筆再靚啲，係化妝師叫住我，話會幫手化。我真係愛得我媽咪好緊要，好想佢好靚好靚咁走。」

兒子是我們的天使

       陳敏之曾在ig分享一張相，是拍下她和陳媽媽牽着手，搭在印有兒子子樂樣子的攬枕上。三代同堂，樂也融融。不只是陳敏之給媽媽無盡的愛，今年7歲的兒子子樂，是陳媽媽的寶貝孫兒，也是她最後歲月的快樂泉源。子樂是個懂事、貼心的小男孩，源源不絕的給婆婆如蜜糖般的甜蜜，令她讓醫生跌眼鏡，生命旅程一個又一個月的延續下去。說到這裏，陳敏之不禁飲泣，是喜悅且安慰的眼淚。

      「我曾經有諗過，一個7歲嘅小朋友嚟講，係咪要咁早面對生死嘅課題？子樂唔知道咩叫cancer, 佢只知道婆婆病咗要入院。呢個BB真係好樂天，成日都話：『我要幫婆婆祈禱，希望婆婆快啲好返！』一見到婆婆，就會主動走去攬到實話：『靚女婆婆！』冧到我媽咪好似初戀咁，我真係覺得『喜樂的心是良藥』呢句說話好啱，我... 我真係生咗個天使出嚟...... 係我個仔救咗我媽咪，係佢嘅愛醫治我媽咪。」陳敏之哭着說。

       「媽媽嘅離開，令子樂更長大。佢雖然知道婆婆去咗天堂，但佢見到要燒婆婆嘅棺木時，激動喊住話唔好燒婆婆，我同佢解釋肉體已死，但婆婆嘅精神係不死。有時佢會問：『天堂咁好，不如快啲die？』、『點解Jesus咁早帶走婆婆？』 我話神有佢嘅安排，人人都唔同，而家先做好自己嘅嘢。我都會擔心佢屈住，所以會盡量聆聽，同佢傾多啲。」

         天人永隔，陳敏之雖憶起和母親的每一幕，都是快樂和歡笑，但如果可以再見一面，最想知的，是媽媽臨走前的整整18天，是在想什麼，又或想說什麼。「當時媽咪已講唔到嘢，如果喺平行時空返去嗰一刻，我好想佢話我知佢嘅諗法，仲有啲咩願望想交帶。我同佢一向好多嘢傾，我知道嗰18日佢一定好忟，想講都講唔到。」

         陳媽媽病發入院前，依然為家人的健康及飲食張羅，就算有家傭，也會親自去街市買餸。一煲龍脷葉水，是給陳敏之最後的禮物。

         「佢係好稱職嘅媽咪，為咗頭家付出一切，成日會擔心我哋食得唔夠好、冇營養，尤其會擔心成日病嘅我，就算佢入醫院前都會煲嘢我飲。佢臨入醫院前一日，都仲去街市買湯料，因為我喉嚨唔舒服，嗰煲龍脷葉水，就係佢送畀我嘅最後一份禮物。我望住呢煲龍脷葉水時，已經心知不妙，覺得可能係最後一次飲到，飲落去，好苦，因為個心好苦。」

媽媽報夢：和天父拗數來幫我

        媽媽離世接近4個月以來，陳敏之一直很想夢中見，渴望對方報夢，最後「夢」想實現，和媽媽夢中見了數次。雖說日有所思，夜有所夢，神奇的是，媽媽的報夢，巧合地解鎖了陳敏之面對的難題，緩和她的煩憂。

        第一次夢中見，是陳敏之緊張不已的搞安息禮，「當時我好緊張去籌備，好驚媽咪唔滿意，有晚我夢見媽咪走埋嚟，行得好近，好滿意咁笑，搭住我膊頭話：『慢慢嚟！』佢只係畀咗呢3個字我。雖然係夢，但我對住佢咁多年，佢嘅眼神同表情係冇得呃。我起身時，真係有毛管戙，原來媽媽都知我心急好擔心，想做到最完美。」

       陳敏之本來要處理媽媽舊居的事宜，包括退租、執拾及處理全屋傢俬電器、衣物及遺物等，繁複不堪。怎料突然收到業主通知，說要一個月後正式收回陳敏之所租住的物業。一波未平一波又起，要善後媽媽的事情，同時又要爭分奪秒的另覓新居，壓力之大可想而知，遍尋無所獲，始終找不到理想的新居。直至這一晚，媽媽又和她夢中見。

      「我搵屋搵極都唔啱，氣餒到真係喊，喊住話：『媽咪，我真係搞唔掂，平時有你幫我，我而家好似冇咗隻手咁，我求你出嚟幫我，冇你我搞唔掂！』」

      「跟住我發咗個夢，喺一個感覺似係我屋企嘅地方，媽咪企喺大門，好慈祥咁笑，有個黑影同佢一齊，而我同老公就踎咗喺度不斷嗌媽咪，個感覺係媽咪知道我哋掛住佢，叫我哋唔使驚，會幫我哋搞掂。發完呢個夢之後，就出現咗一個朋友介紹嘅agent, 佢話有個幾好嘅盤，有鎖匙可以睇，我一睇完即刻租咗。」

      「呢個地方係媽咪生前都鍾意，之前我搵過呢個地方係冇盤放出嚟。Agent 話啱啱業主裝修好，個盤真係啱啱放出嚟，連條鎖匙都未掛！雖然夢係潛意識，日有所思，夜有所夢，但係我信係媽咪，媽咪係我守護天使，因為佢係愛我哋愛到，可以連條命都唔要嘅人，雖然佢走咗，但精神仲喺度。我相信媽咪喺天堂同天父拗數：『我個女真係搞唔掂，祢睇吓我個女喊到咁，我求祢畀我落去見一下，3秒都好吖！』不過，每次媽媽夢中出現，我一衝埋去，佢就走咗，媽咪，你啲法力係咪唔夠呢？」

       衷心感謝陳敏之。媽媽離去，這個傷口仍淌着血和淚時，同時接二連三的要解決多個難題：辦喪禮、處理媽媽的遺物、清走媽媽居所的物件、要在4星期內另覓新居，以上事情是在5個月內發生。但身心俱疲的陳敏之，仍抽出寶貴的時間，犧牲隨時可再和媽媽夢中見的時間，在凌晨時份，和東周刊娓娓道來和母親的點滴。

       陳敏之說：「我做呢個訪問，係好想話畀大家聽，唔好錯失任何一個可以孝順父母嘅機會！我好多謝好多網民，尤其同樣失去至親嘅同路人，佢哋唔單只安慰支持我，仲分享自己嘅親身感受，我哋喺網上做咗『病友』，一句說話一個emoji, made my day! 雖然我仲未醫治到我嘅情緒，但大家嚟安慰我時，我都會鼓勵返佢哋。有啲朋友分享，話自己同媽咪相處唔到。我明白，個個情況唔同，但千祈唔好畀自己後悔，因為當佢離開嘅時候，可能你就會諗：『點解我唔忍吓？唔退一步？』」