缺氧，是怎樣的感覺？
犯了錯，錯得不單要承受千夫所指，連自己也不原諒自己，分秒活在內疚自責中，活多一天都沒有氣力時，是2019年爆出「安心事件」後，黃心穎活得幾乎缺氧窒息的寫照。
4年1460天，由後悔傷害他人，情緒崩潰險輕生，面對排山倒海、近乎連呼吸都有罪的批評時，慢慢站起來，見自己，見天地，見眾生。
推出新歌《I Sleep》的黃心穎，在《東周網》全情剖白4年來的心路歷程，她說冇想過要去「洗白」，因相信因果，做過的，始終怎洗也洗不走，反而感恩上天給她歷劫，由「我仲喺到做乜？」的消極崩潰，轉化到「點解我嚟呢個世界？」積極思考人生課題，來回地獄又折返人間，低谷的意義，就是迎來更美好的自己。

"I sleep because I'm tired to live."

對比3年前寫歌《I Sleep》，黃心穎的2023年，是重生。那年的黃心穎，雖已消失幕前，但依然是大眾未忘的話題人物，負面報道長報長有，當時的她，選擇拒絕發聲，因為她認為所面對的一切，是活該的，是應有的懲罰。

活得如缺氧，有天，突然冒起幾個音符，再填填詞，成就了《I Sleep》這曲："I sleep because I'm tired to live."（我睡，因為我活得太累）、"I write because I cannot speak. " （我寫，因有口難言）

「呢首歌，係寫人生嘅緣起緣落。2020年寫，亦都係我咁多首歌最喜歡嘅一首。叫《I Sleep》，因為當時嘅我，對所有嘢都係逃避，歌詞"I write because it's my new exit."，因為當時覺得只有寫嘢，係可以畀我去抒發。」黃心穎說。

「呢個懲罰係啱，我應得。」

「當時好多報道關於我，我係非常害怕，刪除啲apps，唔想睇。喺人哋口中，有好多個version嘅我，我冇出聲冇澄清，係因為冇必要，因為人哋永遠只會睇想睇嘅嘢，就算你點講，人哋都未必想睇呢個事實。我出嚟講乜都係錯，甚至會認為啲報道要咁寫，都係啱，呢個懲罰係啱，我應得嘅，所以更加唔想出嚟。」

「2021年第一次錄《I Sleep》，當時感覺好強，唱到眼濕濕，之後因想唱得再好啲，再錄時感覺好好多，已經唔係嗰個感覺。最巧合，係計劃出歌時，又失去人生中更重要嘅嘢，我覺得係一個天意，失去嘅，就係我嘅爸爸，所以呢首歌，對我嚟講，加多咗一份意義。」說起剛逝世的父親，黃心穎不禁潸然淚下。

有三個姐姐的黃心穎，深知自己是父親的掌上明珠，並寄予厚望：「細個時我覺得爸爸係支持我做任何嘢嘅人，去到我長大後，我覺得有壓力，佢對我期望好大，大壓力到有啲驚，想疏遠少少，我覺得佢想我成功，佢唔係強迫我，但我感覺到。直到後期爸爸身體唔好，我就知道唔應該恐懼，要多啲陪佢，我覺得自己做得唔夠。」

「一開始事件發生時，我去咗美國，出發前都冇見爸爸，佢會send message嚟，有時好關心我，有時會鬧我，我覺得佢當時都好慌張，佢可能都會覺得，作為一個爸爸，都唔知點幫我。到我返香港時，佢鼓勵我企番起身，佢意思唔係話叫我要成功，而係唔好匿埋唔去面對。」

人情冷暖：你唔好返嚟！

事發後，黃心穎飛去美國避靜長達8個多月，為免自己胡思亂想，報讀演技課程。「迫自己去返學，唔想有freetime亂諗嘢，朝九晚六，不停上堂，同人對戲時不停咁喊，嗰段過程係擺低好多情感，當時我自己都唔知。同學覺得我點解可以喊咁多、咁犀利？老師又話我可以咁入戲，覺得我唔係唔識演戲，點解會嚟上beginners class？到後期佢哋先知我嘅事，甚至好保護我，見到有華人面孔，知要圍住我，驚畀人知我喺邊。」

「當時我對人嘅信任度好低。好多人message我，點知我回覆後，就變咗新聞，又或者我去機場，已有人通知媒體我飛去洛杉磯。我最記得，一出機場大堂，就聽到有人一路影，一路好大聲叫我名，我當時好驚。畀人出賣行程好多，多到數唔晒，我唔怪對方，人係有八卦心態。」

日久見人心，何況患難始見真情。昔日交朋結友如魚得水，但犯錯後跌入黑洞中，人情冷暖，願意陪伴，又或慰問，又有幾多個？黃心穎說，的確有很多朋友，在她犯錯後疏遠割席。

「都多嘅！我認為重要嘅人，都有好幾個（疏遠）。有啲我認為會搵我嘅人，佢唔會即刻搵我，過咗幾個月後搵，因知我要沉澱。我明白，所以我唔會好執着，唔會只係睇到唔好嗰啲，每人都有自己選擇。以前嘅我，只係盲目地睇到人哋點對我好。當然會有失望，但我過咗呢個階段，回望返，會慶幸睇到人嘅百態，一定會有人變咗，本來係朋友變咗唔係朋友，或者有啲人喺背後話我，例如有個幕後朋友，叫人同我講：『你玩完嘞！唔好返嚟！』」

「點解我仲要活多一日？」

自責、內疚、後悔，受盡千夫所指，崩潰得一敗塗地。活多一天都是錯，是黃心穎曾有的念頭，眼看一手摧毀所有，令家人憂心連連並背負指責，朋友割席，事業暫停，牽涉或連累的人多多，內疚感更大。在美國的日子，以淚洗面，寢食不安，情緒崩潰，甚至有輕生念頭。

「我依家覺得，捱得過，真係唔容易。好彩自己本身係一個藝人，面對群眾壓力有一定抗壓程度，但如果我係一個普通人，我諗我已經玩完，因為唔係一個正常人可以承受嘅嘢。」

「過咗嗰段日子，我會諗，好感恩個天畀我遇上咁多嘢，總有佢嘅原因，我依家係以好奇心行落去。當時我成日諗：『我仲喺到做乜嘢？』我諗唔到一個理由，點解我仲要活多一日？」

無罣礙故，無有恐怖

接觸佛學，是給黃心穎重新對生命有另一體會，並減少恐懼。緣起，是有天姐姐抄了一篇《心經》。「前年，姐姐有日話抄咗篇《心經》迴向畀我，當時我唔明迴向嘅意思，更加唔知《心經》嘅內容。當時我禮尚往來，抄返篇畀佢，又抄埋畀父母，更發現身邊好多人接觸佛學。我跟朋友去共修學地藏經，第一次唸經時，完全唔明白內容，咁啱有本漫畫注解，當晚凌晨2點開始睇，一個通宵睇晒，之後開始慢慢再研究，戒牛同食齋。」

「最大得着，係令我少咗好多恐懼，會覺得：『點解要咁執着？』好多嘢係有前因後果，我仲要執着啲咩呢？《心經》有一句：『無有恐怖』，其實係啱，好多嘢都係『顛倒夢想。』接觸佛學，令我平靜好多，追求都少好多。」

明白萬事萬物是因果循環，黃心穎比前更心寬，至少也原諒了自己。「我明白到，每人嘅遭遇都有佢嘅原因，所以我會對人慈悲咗好多，就算人哋鬧你，都會體諒點解人哋咁鬧。我都有原諒當日嘅自己，要一段時間先可以。」她說更加明白要承擔一切當日作出的選擇，後悔的是沒想過別人的感受，傷害了別人。

「我冇留戀過娛樂圈」

黃心穎轉型當創作歌手，自不然被解讀成留戀娛樂圈，然而要再站起來重新出發，步步驚心，荊棘滿途，為何不完全淡出大眾視線、另闖天地？

「當時我冇諗過要返嚟呢個圈，我冇留戀過，就算當時舊公司（無綫）叫我返去拍劇或做主持，我都係一直拒絕。2020年開始，發現自己對音樂係有少少天份。有一晚突然哼吓歌，覺得ok好聽喎，點解嘅？不如擺啲字入去。初時以為一次半次，但之後作咗7首歌，不如去學啦！」

「我唔知點去形容，如果相信有歷劫嘅話，可能呢啲係以前我有做過嘅嘢，突然好似收到信息咁，令我開始作歌，其實係好奇怪，每次我去形容，啲人都唔會信，我真係唔知點形容。」

「我係鍾意音樂，畀我一個出口之餘，其實我一直都喜歡唱歌。所以由嗰段時間開始，我掙扎緊好唔好做音樂，因為我知去做，就係代表入返娛樂圈，但係我諗唔到其他我想做嘅嘢。我冇理由經歷咁多嘢之後，竟然係為錢而生活！我當然係要為開心、追求一啲我想做嘅嘢，但我知道，前面條路好難行，有好多恐懼，但都要衝過去。其實所有嘢都難，唔通唔難先做？個結果係點，邊個會知？唔試過就唔會知。只係做啫，只要去做，就可以。」

「我依家冇乜嘢要恐懼。以前會驚媒體同埋啲評論，好驚人哋點睇，依家覺得，其實唔係掟啲咩過嚟，我就一定要接。唔好嘅energy，點解要接收？我連死亡都唔恐懼，我冇嘢好驚，但我啱啱經歷爸爸離去，始終都會怕失去至親。」

學音樂也學裝修

黃心穎和樂隊RubberBand鼓手泥鯭（黎萬宏）今年10月結婚，她說最大得着，是父親可以看到她找到幸福的歸宿。結婚，是一年半前已計劃，既不存在追撃同年結婚的舊愛，也不是要特意趕及患病的父親能見證出嫁，一切都是巧合。至於新歌本月推出，也是父親生前替她選擇的日子。

日後的路，可以走得多遠多精彩，還是不似預期，黃心穎很隨心，「我冇諗其他人點睇，我只係希望自己可以做喜歡嘅嘢，唔一定只係出歌，我興趣比較多，我想學裝修，睇人哋拆屋再起過，好療癒。我喜歡hands on嘅嘢，自己動手自做，我成日同朋友講，如果要油油，可以叫我，哈！以前我屋企部洗衣機係封塵，啲衫拎畀姐姐個工人洗，垃圾桶冇開封過，煲都冇乜用過，日日只係返工、沖涼、瞓覺，依家好唔同 ，識做家務，樣樣都想試！」

泥鯭鼓勵出歌：「有咩好驚？」

煉成今日的黃心穎，丈夫泥鯭功不可沒，默默地無間支持，步步助她解鎖自我。「我曾經浸親幾次，但為咗可以去潛水，所以一直想學游水。佢鼓勵我去學，仲搵埋教練，近排我學識咗，真係勁開心。當初我讀音樂，都係佢叫我去，直到我考慮應唔應該出歌，擔心好多嘢時，佢話：『出啦！有咩好驚？』」

「佢好支持我，亦都係我喜歡佢嘅原因。我鍾意佢好man，好保護我，無私地去錫我，畀我去選擇想行嘅路。好細微嘅嘢，佢都會兼顧到，例如佢知我有某些日子食齋，佢會幫我安排素食早餐，我起身見到，個心真係軟一軟。」享受二人世界，更嚮往兒女成群，黃心穎坦言，一定會生兒育女。

「點解我嚟呢個世界？」

走過人生最黑暗的日子，黃心穎說非常喜歡現在的自己，得着比前更多，亦從來不認為接受訪問是代表「洗底」，因為凡事總留下痕跡，始終洗不走，反而認為沒有當天的自己，就沒有今天的我。

「我喜歡依家嘅黃心穎，係一個upgrade咗、improve咗嘅自己。我覺得，依家我嘅人生係ok，可能大家會覺得我好慘，因為見我失去嘅嘢，係一件好大嘅事。但在於我角度，我得着好多。我失去咗一份工作同埋一啲朋友，但我得到嘅，係好珍貴嘅學習，同埋成長經歷。」
「狗狗都係我嘅經歷中，其中一個得着。因為有佢，我先肯出去行吓，當初放狗時，佢有佢行，我企埋一邊，之後佢令我open咗，肯接觸其他主人，傾吓偈，幫咗我好多。」

「我已經唔係好驚人哋嘅批評，已經解鎖咗，反而我成日有一個問題問自己：『究竟我嘅人生係嚟做啲乜？』、『點解我嚟呢個世界？』細個時會認為係體驗、have fun，依家知道唔係。每人都有佢嘅課題，否則唔會返嚟呢度（人世）。」

做訪問如「打大佬」

以正面心態過日子，隨心而活，隨喜而行，2024年的小目標，黃心穎說希望和不同音樂人合作寫歌，多閱讀學好中文：「今年衝破好多恐懼，係真正嘅reborn，例如出歌，預咗好多人鬧，但幾難都好，都要做，行前一步，做一樣嘢，已經同目標近咗。唱live，都係好大嘅關口，預咗被放大批評，到咗今次做專訪，直情係『打大佬』，哈哈！」

「連日嚟做訪問，覺得好似擺低咗啲嘢，亦預咗會答好多好難答嘅問題。好好彩，遇到有啲我冇諗過嘅問題，係可以令我放低一啲情感。做專訪，係我最後一個要衝破嘅一關，所以好似「打大佬」咁。」

「已經有4年，係一個耐嘅時間。我以前份人係好急，冇乜耐性，乜都要即學即做，原來一啲healing，係唔急得。好多人寫我好勝，我只係對自己好勝，人人都會好勝，想自己做到最好，我唔覺得係negative，當然要寫我好勝嘅嘢係幼稚，好勝只係對自己競爭。」

已給她一個道歉

如果他日跟事件牽涉的人物碰頭，會否是另一個難跨的關口？黃心穎答得直截了當：「唔怕！如果預先知道大家係同場，我唔會避，但我冇諗過自己會有咩反應。」

4年前黃心穎發文公開道歉，但一直被網民窮追不捨的，是指她欠鄭秀文一個道歉，「冇人比我更清楚發生咩事。我知道呢個係好多人會問嘅問題，我一直都諗，點解要講出嚟我有冇做？我係有做到（道歉），我冇post出嚟我有做到。另一角度睇，如果做錯事嗰個唔係我，點解一個人做錯，另一個人認為自己有權要求人哋咁做？呢個係我反思嘅問題。」

化妝：Herman Ng
髮型：Steve Shek
場地：whiteday.life