發佈時間：15:41 2025-04-06
窮得有一餐沒一餐的小孩，睜着滿是渴望的大眼睛，反覆吮着魚骨來充飢。一鍋只有零丁湯渣、食之無味的湯，已是全家一日的食糧。為了買一缸水，耗掉半日薪金：2.5美元（約港幣19.4元），而這缸水只足夠4天用。
親歷其境，貧困和荒涼，活生生的在眼前。有呼吸真的有希望？七天的柬埔寨之行，令演員衛詩雅及導演劉偉恒，不禁反思何謂生存及生活，衛詩雅哽咽着說：「當人哋担心緊下啖飯唔知仲有冇得食，你仲擔心有冇獎呢舊鐵？」
衛詩雅、導演劉偉恒及其太太及一對女兒「饅頭」及「包包」，一行五人，隨着宣明會赴柬埔寨，七天之行探訪分別在古倫及巴里寶等社區生活的多個家庭，了解民生，聽聽他們不一樣的故事。因感動因激動而哭了多次的衛詩雅，更是和助養多年的女兒首次見面。
由黑暗走到光明，由無望看見希望，憑着愛。
窮得只有空氣
首站是古倫，這是宣明會第一年進駐的社區，剛展開評估及提供初步支援工作。走進古倫，映入眼廉的，是乾涸的河溪，雜草遍滿的荒地，以霉舊木材簡陋搭建、難抵風吹雨打的木屋，就是當地居民的家，超乎想像以外的窮困，窮得只有空氣及愛。
衛詩雅和劉偉恒在古倫接觸的首個家庭，一直掙扎求存，一家七口，男主人因抱恙只可打散工，女主人是長期病患，也要竭力照顧五個小孩。在叢林及河溪找食物，發掘到野生香蕉甚或小蟹，已是非常幸運。如孩子病倒，別說診金，就連去醫院的車費也成問題。
另一個家庭，單親媽媽平時靠除雜草及採集腰果等雜活，不穩定地地賺取收入，以獨力照顧一對7歲及4歲的兒子。由於衛生環境不佳，常輪流生病，長子Khorn因常患病及要照顧弟弟，經常缺課。家中空蕩蕩，絕對是家徒四壁，令衛詩雅震撼的，是骨瘦如柴的4歲男孩，吮着已沒有魚肉黏附的魚骨來充飢。
吮着魚骨充飢
眼前全是超乎想像以外的艱難和窮乏，非常懷疑人生真的是否滿有希望。在首晚的分享環節中，心情沉重得難以形容，充滿的是無力感。劉偉恒說：「因為估唔到呢啲家庭嘅生活咁差，今日有得食，聽日唔知有冇。我不禁自問：『我同佢哋傾咗玩咗一日，其實可以令佢嘅生活有咩改變？』」
「我都係父親，如果我啲囡囡喺呢個環境長大，我會點呢？我問嗰位一家七口嘅爸爸有咩心願，佢話希望仔女唔好好似而家咁，想佢哋有書讀，將來有份工。見到呢位爸爸身體唔好，見到呢個生活環境，我真係唔知點答佢，因為我唔知道將來佢哋可以有咩改變，甚至覺得：『佢哋真係冇希望？』」劉偉恒說。
衛詩雅說到訪單親媽媽的家時，令她最深刻的場景，是幾乎空無一物的家中，小男孩為了充飢不斷吮魚骨，每當想起這幕，不禁爆淚哽咽：「其實個小朋友，係冇做錯任何嘢，點解會係咁？」
「我最記得，呢個家庭嘅屋企真係家徒四壁，角落只有一煲湯同一煲飯，就係兩日嘅食糧。嗰位4歲小朋友，成日攞住舊魚骨嚟吮，我初時以為佢出牙仔牙痕，見佢吮完魚骨又不斷飲水。後來先知道，原來佢太肚餓，所以係咁飲水填飽個肚。」
「呢個家庭平時好少接觸外人同其他事物，唔識表達自己，我同佢哋玩同笑時，覺得佢哋唔明我做緊咩，我哋好似另一種生物咁，你同佢笑，佢唔知畀咩反應你，就連打開筆蓋都唔識，你會覺得唔知點幫，係好心痛，當時真係覺得，原來有個地方係可以冇希望。大家都係生活同一個世界，我哋係可以富裕到食餐飯食淨剩好多嘢，但佢哋係貧乏到可能今晚都冇嘢食。」衛詩雅說。
無望看見希望
行程的第四天，是探訪社區巴里寶。在宣明會協助發展了十多年下，巴利寶當地民生跟古倫比較，完全是天與地。宣明會不但在巴里寶推行助養兒童計劃，更在區內完成基本的建設和房屋，包括建有水塔、水管駁至每家每戶等，而居民更接受農耕養殖、美容剪髮等技術培訓，生活大大改善，可以憑一技謀生。
知識改變命運。當地的學校在宣明會援助下，設有幼稚園及圖書館，並獲完善的教材及師資培訓等。同時，宣明會更推行「喜樂家庭模式培訓班」，計劃目的是重建及灌輸健康的家庭價值觀，達致家庭和睦融洽，減低家庭暴力、協調夫婦或子女之間的問題。
正是一點一滴開始的改變，巴里寶民生得以改善，令本來心情沉重的衛詩雅和劉偉恒，走入巴里寶時，看到的是不一樣的風貎，深切感受到光明和希望。期間他們參與「喜樂家庭模式培訓班」，和當地的夫婦交流外，更到學前教育中心參加「非常廚灶」活動，和當地居民一起洗菜煮飯，快快樂樂的和學前兒童共聚午餐。
集腋成裘的力量
劉偉恒說來到這一站，明顯看到社區在援助下的改變，更樂見當地的年青人懷着傳承回饋的心：「你會見到呢班小朋友有接受教育嘅機會下，生活就會有改變。期間同一班16、17歲嘅年青人交流，佢哋分享理想，希望同其他國家嘅人交流，研究氣候轉變，睇吓所住嘅地方喺種植方面有咩影響，想讀多啲書去改變世界。你係睇到佢哋係好有心，我係被佢哋感動，所以我離開呢個社區時，走都走得安心。」
「呢啲家庭接受幫助之下，先發現原來之前覺得嘅無希望，其實係可以改變，一分一毫嘅捐助，係可以改善生活軌跡，原來我哋嘅力量係可以幫得到。我做咗助養者廿幾年，只係一直每個月碌卡捐錢，唔知道係做緊咩，但親身嚟到睇，先至明白原來係好重要，唔係話我三幾百幫到好多，而係集腋成裘嘅力量。」劉偉恒說。
衛詩雅說踏入巴里寶社區，明顯是在宣明會協助下，設施及民生也大不同，「見到有人養牛、耕田、開小店等等，你睇到係愈來愈好，就連衞生意識或同人溝通嘅方法，都係好唔同。當地嘅居民明顯係好有自信，會同你握手擁抱，同之前社區嘅家庭嗰份被動係好唔同。其實好多人唔係唔努力，只係欠缺資源同機會。」
喜樂家庭模式培訓班
由於知識貧乏及少有接觸資訊，欠缺正面的個人及家庭價值觀下，往往因不懂溝通而衍生不少家庭問題，如酗酒、「躺平」拒賺錢養家、不協助打理家中的家頭細務等，甚至發生家庭暴力問題。「喜樂家庭模式培訓班」的服務對象，就是針對以上問題的家庭，提供不同的工作坊及輔導，讓夫妻們明白及尊重每位家庭成員的角色，重塑養育孩子的正確價值觀，學習建立快樂家庭的重要性。
衛詩雅笑言跟「喜樂家庭模式培訓班」的夫婦交流時，曾猜想現場誰是「家暴男」，並請教夫婦們維繫婚姻之道：「我問建唔建議我結婚，其中有位男士話贊成，祝福我之餘，仲話夫婦間要有好嘅溝通。」劉偉恒說十分驚訝男士會參加培訓班：「我奇怪在點解男人肯嚟聽？因為好多都係大男人，最初我仲以為係類似戒酒營嗰啲。見到出席嘅男士真係好誠懇真誠，仲話以前係冇家庭觀念，唔知道父親同丈夫嘅角色係乜，只係覺得生活太艱難，有得食就食，有得做就做，但有課程教之後，爭執都少咗。」
初見女兒
行程的第6天，也是衛詩雅最期待的一天，因為終於「母女團聚」。2018年開始，衛詩雅助養了三名小朋友，其中一位是身在柬埔寨、當時只有7歲的女童Chankoa。
七年來，縱隔千里遠，素未謀面，也有仿如血濃於水的感情連結，見面那一刻，衛詩雅和Chankoa不約而同的上前和對方擁抱，一個擁抱已勝千言萬語。眼淺的衛詩雅，感動得眼濕濕：「好似見返失散多年嘅女咁。」
這一天，這對母女一直手拖手，抱了又抱，十分珍惜相見的每一刻，Chankoa更送上親手製作的紙花及花籃作為結婚禮物。
衛詩雅說：「臨見Chankoa前一晚，我要寫張心意卡畀佢，我老公提醒我唔好用太深嘅英文，因為英文始終係Chanoka嘅第二語言，於是我用AI翻譯為高棉語，逐隻字放大去抄寫。翌日我畀信Chankoa時係有啲驚，因為當日我睇佢啲功課，佢嘅字體靚到好似打印出嚟咁，所以我畀呢封信佢時，同佢講：『我啲字呢......唔好意思，我希望你睇得明。』Chankoa好細心同可愛，全程同我十指緊扣，影相時又會主動攬住我。」
「本身我係感性嘅人，見囡囡之前，我想像到自己一定好感動，始終真係由細睇到佢大，當我真係見到Chankoa時我真係喊。我助養Chankoa時，佢只有六歲，我最深刻係睇相時，佢嗰對大眼睛同埋好靚嘅笑容，但相片嘅背景係一塊爛地。見到Chankoa而家喺一個已經發展完成嘅社區生活，有個開心嘅家庭，令我覺得，原來只係做咗一啲小小嘅事，就可以令佢有好好嘅生活，我好想十年後再返嚟見佢。聽到佢話志願係做醫生，想幫更多人，我真係好開心。」
視名利如浮雲
憑電影《破‧地獄》獲多個殊榮的衛詩雅，以大熱姿態角逐金像獎最佳女主角之位，獎項無疑是對個人努力的肯定，但是次柬埔寨之旅，所看所聽所聞，有無比震撼和觸動，令她不禁反思奬項及人生的意義，甚至認為這個旅程已是上天給她最好的禮物。衛詩雅一臉感恩，流下感激的眼淚。
衛詩雅說：「喊嘅次數係超出預期，我本身係易笑易喊，有啲位估唔到都會喊，尤其係見到生活有改善嘅家庭，我都會喊。返到香港，我一直諗緊自己嘅人生、希望將來可以做啲乜，我一路諗，連揸車時都諗到喊。」
「去柬埔寨期間，每日都會同丈夫由頭講一次所見所聞，好想將真實感受講畀大家聽，我唔知今次可以幫到幾多人，但起碼可以幫到我更清晰。我成日問自己：『點解我要做演員？』因為我知道我要幫弱勢社群做一啲嘢。呢個旅程再次提醒我：『點解要做演員？』令我更肯定做演員嘅原因。」衛詩雅說。
「近來發生嘅事好多，例如電影《破》嘅討論度高，但我更感恩係有柬埔寨呢個經歷，令我覺好多嘢係浮雲。多一個獎少一個獎，真係咁緊要咩？我雖然冇宗教信仰，但我覺得喺呢段時候，畀我遇到呢件事（去柬埔寨）同埋呢部電影，一定係原因。當人哋担心有冇水飲、小朋友今晚有冇嘢食時，你担心嘅竟然係有冇入圍同埋一舊鐵（獎項）？我覺得今次嘅體會，係上天賜畀我嘅禮物，呢份禮物比起世界任何一舊鐵更加重要。」衛詩雅說。
讓女兒以心體會
從未跟衛詩雅合作的劉偉恒，說是次旅程讓他真正認識對方，劉偉恒說：「以前我只知佢係演員，透過今次旅程嘅相處，發現佢都好勇，同埋唔錫身，攞鋤頭又或接觸到啲污糟嘢，佢作為靚女演員竟然係完全唔介意，連蚱蜢都擺落口食！佢係好真心嘅人，我冇諗過佢對呢個世界咁有感觸。」衛詩雅也大讚劉偉恒是廿四孝好丈夫好父親，她說：「『包包』同『饅頭』好幸運好有福氣，有你同太太咁稱職嘅父母，好有耐性，我要我老公向你學習。」
太太和女兒總是以「阿全」來稱呼劉偉恒，「阿全」意義非凡，代表劉偉恒不單是丈夫及父親，更是司機、保鑣、家務助理、補習老師等身份，全方位多功能包攬所有崗位。劉偉恒帶太太及兩個寶貝女去柬埔寨，雖然依然是當「阿全」，但今次特別感到欣慰。在踏上旅程的一刻開始，就不打算向女兒們進行「嗱！你哋睇吓人哋啦！睇吓自己幾幸福啦！」這類說教，認為由女兒們親自去看去感受，已勝過他的千言萬語。
「當地嘅小朋友冇玩具冇嘢玩，我哋喺帆布上面，同幾十個小朋友一齊趴喺度畫畫，又或一齊跳繩，啲小朋友已經好開心。送筆袋畀小朋友時，小朋友唔識拉拉鏈，細女問點解唔識，大女答佢：『因為佢冇見過。』，嗰一刻，就知道兩個女真係感受到，原來有啲小朋友擁有小小嘢就好開心滿足，第二，呢班小朋友係好努力去生存。呢啲感受，我唔會主動講，係畀囡囡自己感受同消化。今日你唔明，將來一定明。我相信冇嘢好得過你自己去睇一次。」劉偉恒說。
「喺我眼中，一對女係相當嬌生慣養，好有自己生活模式，食嘢有要求，初時担心佢哋冇嘢食，所以買咗一喼杯麵同餅乾等以防不時之需，仲做咗好多心理輔導，例如話『到時唔好麻煩人，唔好扭計』、『可能洗手間未必乾淨』等等。其實根本唔係我想像中咁差，原來兩個女嘅適應能力好高，遠遠超乎我想像。」
向前線致敬：唔係打份工
「阿女平時超奄尖，即係白飯有一滴茄汁都唔食，全地球咁多牛奶，都只飲一隻。但估唔到，第一餐飯，當我仲諗住係咪整杯麵畀佢哋食時，佢哋已經捧住荷葉白飯係咁食，食到唔捨得放低。而佢哋主動去接觸當地小朋友嘅能力，亦都遠超我想像，今次我係睇到囡囡嘅另一個面向。太太出發前所買嘅大量杯麵同牛奶等，最後係有七成帶返香港，因為全程都係食當地嘅食物，所以我決定以後旅行，唔使畀咁好嘅酒店畀佢哋，哈！」
「帶埋小朋友去，因為覺得係時候畀佢哋睇吓呢個世界，平時只靠睇書或上網，知道有好多小朋友要幫助、知道施比受更有福，但有冇真係見過呢？我細個都成日聽到父母話要珍惜食物、以前啲人窮到要食樹皮，但只係聽，咁又點呢？去到柬埔寨第一日，已經唔使諗同囡囡要講啲乜，因為佢哋已經睇到。」
「如果家長有機會，真係可以帶小朋友睇世界另一端。下次有機會我一定同家人再去，因為呢個旅程帶嚟好大嘅impact，每位小朋友或家庭嘅樣子同笑容，隨着脫離舊有嘅生活軌跡而有所改變。作為導演，拍戲最緊要係世界觀，我多謝宣明會畀機會我去睇呢個世界，亦都向前線工作者致萬二分敬意，因為佢哋唔係打份工，真係用心去做。」
最愛的照片
七天之旅，無論是宣明會工作人員拍攝，又或者是自己以手機紀錄的，照片多不勝數。按筆者要求，挑選一張至今最觸動的照片，衛詩雅選了逗玩嬰兒的一幕，她說：「每一位小孩都係珍寶，值得被好好珍惜對待。」
劉偉恒所選的，是「饅頭」和「包包」跟當地的小朋友，伏在帆布上畫畫的一刻。「當地一位村民見到小朋友獲贈顏色筆同畫紙，就邀請大家一齊畫畫。藍天白雲下，喺沙泥地上鋪咗張帆布，好多小朋友衝出嚟一齊畫。雖然大家聽唔明對方嘅語言，亦都唔認識對方，素未謀面，但都可以搵到共同嘅興趣一齊玩。當地小朋友就係咁簡單，好易滿足，每個笑容好天真好靚，呢個畫面令我非常感動。」
