發佈時間：10:40 2026-10-27
想帶小朋友去深圳玩，又唔想去商場人擠人？深圳園博園絕對係一個好選擇。呢度唔單止免費入場，園區夠大、綠化又多，小朋友可以喺 Apple Land 蘋果樂園同巨型紅蘋果、萌貓雕塑打卡，家長又可以喺加拿大月亮花園嘅「一尺花園」歎杯咖啡歇腳。園區東區有古色古香嘅中式庭院，西區就有國際花園同童話裝置，古今中外風景一次過睇晒！
深圳園博園 | 園區介紹
深圳園博園位於福田區深南大道，係 2004 年第五屆中國國際園林花卉博覽會嘅會址，博覽會結束後轉型為永久市政公園。園區內有 80 多處景點，涵蓋中國各地園林風格同部分國際園林景觀，近年經過活化改造後，由原本「行行睇睇」變成可以慢慢坐低、飲杯咖啡、影相打卡嘅休閒空間。
深圳園博園 | 園區特色
四大國際主題花園
呢幾個花園係園博園近期煥新後最受歡迎嘅打卡位，風格各異，好適合影相：
加拿大月亮花園：保留原生樹木，有噴泉、草坪同蜿蜒步道，園內仲有「一尺花園」咖啡店，逛完可以歇腳飲咖啡。
美國加州陽光花園：以龍舌蘭、迷迭香、月季等植物造景，充滿美式戶外鬆弛感。
東南亞萬象花園：有大象雕塑、藤編燈飾、火山岩造景，南洋風情濃厚。
俄羅斯普希金花園：對稱拱廊、模紋花壇同白色雕塑，帶點歐式復古浪漫。
東區中式園林
東區集中咗多座仿古中式庭院，例如南苑、匯芳園、水墨江南園等，亭台樓閣、小橋流水，古韻十足，好適合著漢服或新中式衫影相。春季時，匯芳園嘅三角梅花瀑尤其壯觀。
Apple Land 蘋果樂園
Apple Land是親子家庭的打卡好去處，有巨型紅蘋果裝置、童話小屋同園區萌貓雕塑，小朋友會好鍾意。附近亦有輕食、咖啡同文創小店，適合一家人慢慢行。
福塔
福塔係園區地標，登上塔頂可以俯瞰成個園博園，天氣好時仲望到遠處城市景觀。
深圳園博園 | 實用信息
門票：免費，無需預約
開放時間：每日 6:00–23:00 22:30停止入園
地址：深圳市福田區深南大道 8002 號深圳國際園林花卉博覽園
交通：搭乘深圳地鐵1號線至「僑城東站」A出口，步行約 10 分鐘可達西門；或至「竹子林站」B2出口，步行前往東門。
