發佈時間：19:25 2025-01-22
港人被誘騙至東南亞國家如柬埔寨、泰國及緬甸等地後被禁錮的案件備受關注，加上本月初內地藝人王星及模特兒楊澤琪先後因「群組中介」誘騙下被「賣豬仔」到緬甸電騙園區，就連陳奕迅泰國演唱會也宣布取消，人心惶惶下，陶大宇竟無懼被「賣豬仔」，和《愛．回家之開心速遞》「王朝」莫家淦到柬埔寨做商演，快閃逗留兩日一夜，今日（22日）極速返港，自爆全程有軍人護送，包括去洗手間都跟到實！
以「水撥式」台風唱爆《倒轉地球》的陶大宇，近年成為炙手可熱的商演寵兒，今次到備受爭議的柬埔寨金邊進行商演，陶大宇說是因合作多年的相熟中介邀請，並非「群組中介」安排。鑑於連串「賣豬仔」誘騙事件，陶大宇事前要求對方承諾，全程有專人貼身接送及保護外，更先要了解今次商演主辦方的背景、演出場地等資料後才決定是否接演。
師奶殺手倒轉柬埔寨
陶大宇和莫家淦甫到達當地機場，即有人送花舉牌以示熱烈歡迎，並有超過十名保安護送，主辦方也派出多位代表隨行及安排專車接待。是次演出的場地W Club是柬埔寨金邊人氣勁的大型娛樂場所，當晚陶大宇獻唱多次首「飲歌」包括《倒轉地球》、《愛你一萬年》、《唱這歌》等。「師奶殺手」魅力沒法擋，在柬埔寨一樣有粉絲，過千名觀眾迫爆夜場，其中闊別幕前多年、現在內地從政的一代性感女星彭丹也有捧場。
今次勇闖柬埔寨商演，問到酬勞是否特別豐厚，陶大宇說是「合理價」：「如果係危險嘅，你畀多多你都唔會去啦！其實我出發之前，都收到好多朋友嘅關心，其實之前我都去過幾次，有朋友喺呢度做生意，打咗個底。柬埔寨有好多食嘢嘅地方，當地朋友託我幫手澄清，其實係安全。我知道係一個點樣嘅地方，啲人好善良。可能大家會以為柬埔寨係『嗰啲地方』，但其實唔關事，完全係唔同地域，唔關『最近好敏感嘅嗰件事』事。」
去廁所軍人睇實
快閃柬埔寨的陶大宇，在空檔時被安排到熱點打卡以及到夜市掃街，全程有專人跟到實，包括軍人！「好多柬埔寨人都會睇香港嘅電視劇，我都好詫異同開心佢哋都認得我，就連護送我嘅軍人都話有睇我嘅劇，我都向佢哋敬一敬禮先。今次呢個演出我都好開心，氣氛好好。主辦方照顧得好好，包括安排保安同軍人，啲制服我唔知點分，但一望就知係軍人，全程令你好舒服同好安全，由頭到尾貼心照顧，去洗手間都會喺你後面。」
