發佈時間：07:58 2024-12-17
現年30歲的關嘉敏（Carman），早前在《福祿壽訓練學院終極對決》中，因扮《中年好聲音2》亞軍譚輝智，超級神似而一鳴驚人！節目中，Carman以「痰輝智」獻唱〈屈到輝智病了〉，表演時，她無論表情、舞姿、唱腔，都模仿得維肖維妙；就連譚輝智本尊見到Carman的扮相都盛讚，並表示仔女見到這位「痰輝智」，都誤認是爸爸，真真假假分不清。難怪，網民即封她做「扮嘢女神」！
成功背後 隱藏辛酸
Carman之所以能夠做到一扮成名，當然下了不少苦工，她坦言：「當思捷叫我扮譚輝智嘅時候，我係完全想像唔到我可以扮到，由收到通知至到演出，我只得一星期嘅時間去練習。我於是日睇、夜又睇譚輝智嘅唱歌同訪問片段，佢每一個動作、神情，我都反覆睇咗幾百次，我相信我𠵱家係比譚輝智更了解佢自己，哈哈！」Carman又表示每一次要轉換造型時，就好似進行酷刑一樣，尤其是拆頭套時，更彷彿將皮膚、頭髮扯甩，痛到想喊，感覺像生仔一樣，所以成功背後，確實隱藏了不少辛酸！
2016年女子組合Bingo出道
2016年，Carman以女子組合Bingo出道，並擔任隊長一職。她憶述，初出道時的日子，簡直苦不堪言，除了受盡白眼之外，更曾試過月入只得8毫子：「當年公司話扣除佣金、租車費、化妝、整頭錢，我哋5個成員平分，所以每個人分到8毫子。當其時，我揸住張8毫子嘅糧單，真係匿埋喺房度喊咗一日，完全對自己失去信心，但係因為份合約未到期，唔做落去又要賠錢，惟有硬着頭皮做落去。其後，俾我媽咪知道咗我嘅情況，佢都喊埋一份，我見到佢咁，我自己都好心噏 。」
兩年食老本 6位數私己錢冇晒
入行前，Carman 原本是model，儲了一筆6位數的私己錢；入行後，她捱了兩年，雖然慳住使，但戶口很快便腰斬至3位數，她猶有餘悸的說：「嗰時，我真係完全唔敢同朋友出街，媽咪整飯盒俾我開工，如果開工能夠行路，我都會選擇行路。我真係試過由樂富行去觀塘，行咗足足一個半小時，我安慰自己，當減肥囉！」
自認是慳妹的Carman，當時沒錢買衫，但工作需要必須一日換5、6套衫，她無奈地厚住面皮，找一些有退貨的服裝店舖買衫，着完交回店退錢。此外，她有時又會與Bingo隊友互相交換衫着；以及將舊衫剪裁成愛犬的服裝，實行慳得就慳。當年，Carman還一邊做歌手，一邊做其他兼職：「嗰幾年，我係乜工都做，好似戲院小賣部、售貨員、模特兒、主題公園演員，總言之能夠搵到錢我都去做。」她苦笑說幸好自己不用養家。
參加《全民造星III》轉投無綫 慘遭網民狂鬧「反骨妹」
其後，唱片公司出現人事變動，一位高層鼓勵Carman參加《全民造星III》，唱得又跳得的她，雖然未能擠身10強，但因形象討好，而人氣躍升。不過，她在2021年於公司安排下加盟無綫的姊妹公司邵氏，接着便慘遭網民狂鬧「反骨妹」！她坦言，當時就似由天堂跌落地獄，之前辛苦建立的全部被抹得一乾二淨：「當時，有成幾千個抨擊我嘅留言，最唔開心就係責怪我『反骨』。我喺演藝圈已經好少機會，佢哋當然唔會理解我嘅感受，所以真係好無助、好崩潰！最慘前幾個月仲好哋哋接job，人氣突然插水式下滑，接受唔到囉！咁啱同一時間阿嫲『走咗』，唔通仲同家人講我有幾唔開心咩？當時真係好辛苦，匿喺屋企喊足3日3夜，乜都冇做過。」
盡快儲錢買樓畀父母安享晚年
雖然Carman現時工作浪接浪，總算脫貧成功，但為了能盡快儲錢買樓給父母安享晚年，她直言仍然要慳住使。此外，她更表示為了賺更多錢，只要三點不露，全裸都可以考慮：「全裸都可以好時尚、有美感，底線係三點不露，我都恨拍寫真集，想趁青春留倩影，再過幾年就冇本錢。」
日前約下午5時，在火炭工業區，《東周刊》發現剛剛拍完廣告的Carman，去了一間小食店匆匆吃了一碗車仔麵醫肚，就當午餐及晚餐；另外，她出入仍以港鐵為主要交通工具，貫徹慳家本色！據悉，Carman希望能在去深圳拍劇前，先到老人院探訪，提前贈送一班老友記聖誕禮物，所以當日她吃罷，便四出搜羅物資。唔扮嘢做自己的Carman，原來是人美心善的「真女神」也！
《東周網》訪談系列節目《星桄伴我心》12月重磅嘉賓：
肥媽攬屍唱情歌 憶亡夫飲泣 搵胡楓哭訴對話大公開
「黑妹」李麗霞2段婚姻3次患癌「我其實係一個軟弱女人！」
