發佈時間：08:55 2024-12-14
誰不想「沒有最好，只有更好」？
現實是，人生路上充滿變數，好與壞，還是取決於心態。
47歲的谷祖琳，走過高山低谷，才到達豁然開朗的境界。
「𠵱家呢個階段，我係真心開心！以前我唔開心，係會沉溺嘅，係一個無底洞，會覺得睇唔到希望，會諗弊嘞！以後永遠都係咁。
「我𠵱家都會有唔開心嘅時候，但睇到有底，係好表層嘅，好快就完結。我會覺得唔開心，就接受呢個唔開心，可能將來演戲會有用。」
演戲，谷祖琳演了26載，包括現時的話題作《爸爸》，她坦言，新作也讓自己重新自我檢視。
「經歷過之前嘅沉溺，𠵱家先係開始。所以我睇到戲入面嘅『永年』（劉青雲角色），真係睇到我自己，睇到我有幾年就係咁，冇靈魂、冇軀殼、咩都隨便，叫喊又唔喊，我都試過有呢個狀態，所以我好同情爸爸。
「然後就諗，我都試過咁，好同情我自己，但突然間又發現，我已經跳咗出嚟去睇呢件事，就覺得原來我過咗。唔係咁形象化，我唔會突然坐低諗，究竟呢幾年我過成點？呢個就係時間嘅魔力。」
延伸內容：《爸爸》劉青雲心碎演繹令人折服 谷祖琳角色沉重 : 要掏空自己
延伸內容：劉青雲挑戰沉重角色 新片劇本靈感來自「荃灣享和街弒母殺妹案」
延伸內容：荃灣弒母殺妹案｜劉青雲《爸爸》改編真實個案 15歲乖仔突行兇 父子近況曝光
走出低谷，令谷祖琳更珍惜每一個當下。
「我個人其實幾當下嘅，每一刻都係，冇一個特定想停留嘅時間。但係如果可以返番去以前，我諗我細個嘅時候係幾開心嘅。𠵱家我都成日同我啲女講，如果我細個能夠學多啲嘢，我𠵱家可能可以去紅館。
「我成日話All is well，所有嘢都好。你要相信所有嘢嘅發生，都係最好嘅。你可能會話，我坐喺度梗係識講啦，但我真係經歷過，我唔係冇經歷，去到一個位，就會相信所有嘢嘅發生，都有美好嘅一面。當然表面好似好黑暗、好唔好彩，但仲未行到最後，你又點會知呢？」
最好？更好？還是剛好，已經足夠。
戲畢竟看似沉重，而現實中已是兩女之母的谷祖琳，則笑言這次拍攝時，把角色帶回家也無所謂。
「其實我好好彩，咁啱嗰時我啲女放假，就跟咗嫲嫲去旅行，所以我冇點見過佢哋；我老公係大人，仲係正面王，佢諗嘢永遠都好正面，所以我唔會影響到佢。而且作息時間唔同，我返到屋企佢就瞓咗，所以喺時間上係冇問題嘅。」
結婚14年，談到老公劉穎恆，谷祖琳用上她的萬能Key。
「都係All is well，哈哈！兩夫妻，係會有佢睇我唔順眼、我睇佢唔順眼嘅時候，但點解呢個世界咁多億人口，佢會係我老公？呢個係值得去諗嘅，所以老公都係一個課題。
「我係一個冇安全感同有好多顧慮嘅人，但佢就啱啱相反，係天跌落嚟當被冚嘅，既然控制唔到嘅嘢，就唔使咁Care，我都質疑過佢咁做人得唔得㗎，但到疫情嗰幾年，都俾佢感染咗。」
至於兩名女兒，現已分別12歲及10歲，谷祖琳笑言，女兒們也是自己的「翻版」。
「兩個都似我，家姐似細個嘅我，阿妹就似大個咗嘅我，係一個Old soul（老靈魂）。家姐同我講佢同同學之間嘅嘢，成日叫我教佢路，或者值唔值得交呢個Friend。
「我𠵱家仲會同佢哋一齊瞓覺，臨瞓前仲會有Girls’ talk，我諗我唔係虎媽，同佢哋好似朋友咁。只要佢哋唔為非作歹，我已經冇問題！」
於《爸爸》中，谷祖琳飾演的角色，與女兒同被患思覺失調的兒子所殺，現實中的她，有至親疑受情緒困擾輕生，令她感受更深。
「拍之前一兩日都有掙扎，但我即刻覺得係多餘嘅。首先我對呢個病係有一定嘅知識；二嚟係翁子光叫我演嘅，我覺得佢有眼光（一笑），因為導演諗一萬步，都唔會搵我做村姑，但我一直都好渴望做村姑，因為我好鍾意張藝謀，睇嗰啲《菊豆》、《秋菊打官司》，我覺得好正。
「我成日幻想，因為我係山東人，個樣好北方，總之我混入了一條村落，你唔會搵到我。我玩過好多次，喺大陸拍戲試過咁玩，拍陳果都要去山旮旯嘅地方。」
當專業演員已久，谷祖琳還養成八卦習慣。
「我唔係睇通告，而係睇導演單嘅。唔止係呢套，我每一次拍戲，都要睇導演單，因為我要好清楚嗰日發生啲咩事，有咩演員、有咩道具。
「拍卡拉OK嗰場戲嗰日，我睇到有個『谷替身』，咩叫『谷替身』？點解要搵人替我？其實嗰場戲我係有戲嘅，雖然唔係拍我，但嗰場戲係爸爸唱歌，因為佢懷念媽媽，喺卡拉OK唱〈這是愛〉，唱唱吓就就幻想媽媽喺佢旁邊，佢就唱到喊。」
拍罷電影，谷祖琳還是有一股莫名的失落。
「呢部電影唔係負面嘅，但係點解我拍完會Sad咗幾日？係因為我真係好專注去做嗰件事，就好似歌星開完演唱會，係好開心，但都會失落幾日嘅感覺。突然情緒好豐富，又開心又唔捨得，又感動又覺得好Sad，幾樣嘢夾埋一齊。
「我約咗一班朋友去日本幾日，本來諗住去飲酒，仲買咗好多酒，但係我只係食咗一餐飯，因為唔想放負，就自己返去酒店，嗰幾日就自己一個人，靜靜哋匿埋喺酒店房。」
_______________________________________
《東周網》訪談系列節目《星桄伴我心》12月重磅嘉賓：
即睇：肥媽攬屍唱情歌 憶亡夫飲泣 搵胡楓哭訴對話大公開｜星桄伴我心
即睇：「黑妹」李麗霞2段婚姻3次患癌「我其實係一個軟弱女人！」｜星桄伴我心
