戴耀明秘撈做侍應茶餐廳搞亂檔

更新時間：10:58 2024-11-21
發佈時間：10:58 2024-11-21

字體大小

入行32年的「TVB金牌綠葉」戴耀明，參演劇集無數，去年底更獲得服務無綫第30年金牌。不過，今時今日的藝人，追夢之餘，還要自我增值，又要能屈能伸，更要「炒散」幫補生計。

剛從內地拍畢無綫劇《刑偵12》的戴耀明，自言曾試過「拍烏蠅」8個月，故要諗定後路。日前，他就專誠落老友兼「飲食界富二代」張本立（Billy哥）的茶記幫手，由水吧沖飲品，到做侍應招呼客人，乜都學。不過，他期間就搞亂檔，竟然將成杯水倒落老闆身上，幸好，他拍慣劇識得執生，馬上善後清潔。

延伸內容 : 劉威煌參加《中年好聲音2》好掙扎驚畀人話發明星夢

延伸內容 : 41歲李蘢怡中門大開大派福利睇到網民流鼻血

延伸內容 : TVB前「御用丫鬟」李焯寧做樓面被調戲？竟被要求餵客食麵

拍攝《痞子殿下》同飲食界富二代結緣

現年52歲的戴耀明，因滑稽外形和誇張演技，令觀眾留下深刻印象；而其光頭look，更由於神似日本動漫「一拳超人」，故獲邀擔任手遊代言人，令他人氣急升！不過，做演員始終較被動，他就曾表示試過「拍烏蠅」8個月冇工開。適逢2021年，他跟既是演員又是「飲食界富二代」的張本立，於拍攝《痞子殿下》時結緣，眼見對方從事飲食業多年，遂有意偷師，為自己鋪定後路。

戴耀明茶記打混

剛於內地拍畢無綫新劇《刑偵12》的戴耀明，日前現身張本立位於黃大仙的茶記開工。現場所見，張本立主力在廚房炒菜，而戴耀明則當侍應，由擺放餐牌黑板、落單、送餐、執枱清潔等一腳踢。待中午飯市過後，張本立較空閒，便安排他到水吧學沖飲品，接着帶他到附近的街市，為茶記補貨買菜和生果。期間，他相當識做，一見老闆俾錢，便幫忙拎食物。不過，貴為新手侍應的戴耀明，似乎忙中生亂，為食客落單後，回頭時竟不慎打瀉張本立手上的兩杯水。幸好，他懂得執生，馬上攞布替食客抹枱。

戴耀明廿年前曾開酒吧

工作了大半日，戴耀明對自己做茶記侍應評分，總算合格：「我適合做啲輕鬆嘅，招呼吓啲阿伯、阿婆最啱。揸鑊呢啲，就唔好預我，容乜易火燭？我今日係落嚟體驗下做茶記，怕將來若窮途末路，所以要孖住 Billy哥。其實我都多落嚟呢度，因為同 Billy哥度學嘢，我哋最近幫個啤酒品牌去拍探店片，出嚟反應都唔錯。」
至於會否想做茶記老闆？戴耀明透露廿年前曾於尖沙咀的棉登徑開酒吧︰「當時，每個月係賺到幾萬蚊嘅，但晚晚要落去飲，有時飲到朝早6、7點，跟住去開工。咁樣真係賠上健康，命仔唔會長，所以冇再做。我都知做生意，唔止燈油火蠟、仲有入貨成本，同面對員工，加埋營運壓力，真係好辛苦，所以我都係鍾意做顧客多啲。」

茶記老闆大有來頭《痞子殿下》飾演「北邪」

身為茶記老闆的張本立，熟口熟面，當中以《痞子殿下》飾演的「北邪」、《十二傳說》的電視台鹹濕監製，最為觀眾熟悉。現場所見，他忙個不停，經常穿插於廚房和食客之間，隨時補位；期間，他又一心多用，用電話安排食材運送，還要遙控另一間酒樓的運作。其實，他大有來頭的，父親張錫鵬是漢寶集團的創辦人之一。而他早年曾留學英國，畢業後一度任職時裝設計師；不過，自1996年起，他開始接手家族飲食生意，邊做邊學，現要打理黃大仙的燒臘茶記及尖沙咀的海鮮酒家，還要經營食品供應分銷。

縱使近年飲食業經營困難，但跟張本立合作的生意拍檔和員工都有一段長時間，故繼續堅守下去，「𠵱家做飲食唔使蝕都ok。我每日要8點起身，跟住會返兩間食肆做嘢，雖然呢行辛苦，但學到好多嘢，因為『敵人』係會逼你進步。不過，唔排除將來會做全職演員。」外表嚴肅認真的張本立，跟鬼馬的戴耀明一凸一凹，近來兩人就為啤酒品牌拍探店片，火花十足！