發佈時間：15:28 2024-11-09
影后葉童和黃德斌首度合作的舞台劇《唔講得》，將於11月14日至17日在尖沙咀文化中心大劇院公演。現正進入最後倒數階段，導演及改篇胡恩威和監製陳善之，與一眾演員包括葉童、黃德斌、楊永德、李俊樂日以繼夜排練。葉童笑指黃德斌外表粗獷，其實個人好溫柔，而且演繹肢體動作還好有驚喜，黃德斌聞言即笑說：「我無底線！」
延伸內容：失憶諒解備忘鹿︱ 彭秀慧一人分飾多角 首演前忘我綵排反覆落淚
延伸內容：彭秀慧坦言面對多次死別 從獨腳戲到鹿角戲
延伸內容：焦媛 任時光在身邊流逝
葉童每場情緒唔一樣
日前大會特別安排了綵排探班，率先觀看葉童與黃德斌其中一場對手戲。及後二人接受訪問時，葉童坦言：「雖然我同德斌合演一對夫婦，但有時又唔似係夫妻，當中我同佢有好緊扣嘅關係，其實我哋嘅關係同情緒喺每一場戲都唔一樣。但講真，德斌好有風度，佢係一個好溫文爾雅嘅人，雖然佢外表比較粗獷，但其實佢個人好溫柔。」
黃德斌指自己冇底線
葉童續說：「佢喺排練時經常畀到驚喜，有時演繹一啲肢體動作戲，我仲以為佢未必願意嘗試，但佢用行動表示冇問題。」黃德斌聞言即笑說：「我無底線！其實我哋喺部劇裏面，有好多對白講起嚟真係好蹺口，但經過咗多次密集式訓練，我哋已經背到好熟，始終當中嘅對白非常生活化，有時都唔知自己喺度講對白，因為你唔會記得自己講咗啲咩，但你𠵱家又要記住自己講咗啲乜嘢。」
黃德斌直言：「我唔單止要應付體能，因為每場戲喺情緒上嘅演繹都有唔同起伏，所以要好集中去做。」舞台劇導演及改篇胡恩威、監製陳善之和演員楊永德，均笑指葉童與黃德斌演出經驗豐富，表現當然冇問題，再加上他們很專業，會以不同方法去演繹台詞，因而產生不少火花。
奚仲文擔任美術指導
《唔講得》製作班底包括美術指導奚仲文，他特別為每個角色，設計了數個別出心裁的造型。而身兼導演、改編、舞台及多媒體設計的胡恩威，更首次於劇場引入5.5G網絡技術，為現場觀眾帶來比5G快逾10倍的無縫網絡連接，體驗實時手機影像，打造演員與觀眾最親密的距離。由於觀眾反應熱烈，《唔講得》將加開11月16日下午3點場。另主辦單位聲明：近日有內地網站聲稱能安排演員簽名，但此舞台劇並不設任何觀眾簽名安排，敬請留意！
夫婦常對話卻冇溝通
廣東話黑色話劇《唔講得》，講述一對腦神經科醫生夫婦不停對話，但無法溝通，舊同學來訪，揭開了不可告人的秘密。無常的日常，埋藏着甚麼「唔講得」的秘密？是有難言之隱、抑或真相，說不得？
