發佈時間：16:49 2024-11-04
被譽為「音樂女神」、於英國倫敦皇家音樂學院碩士畢業的女高音歌唱家陳海兒（Hedy），在TVB歌唱選秀節目《中年好聲音3》幫手做評審，由於她貌美兼身材驕人，故瞬間引起網友的關注。日前她應母校香港演藝學院邀請，出席聲樂系碩士生的獎學金籌款活動。在台上，她高歌一曲震撼人心，她坦言想老師為她自豪，更有小粉絲因為她讀唱歌、讀聲樂，感動！
延伸內容：《中3》索女評審 陳海兒絕密艷照大搜刮
延伸內容：中年好聲音3｜ 高菲天籟女聲震驚網民 評審都Amazing！
獲恩師邀請
Hedy透露今次出席活動，皆因受到她恩師的邀請，她說：「去英國之前，我都係演藝學院畢業，我以前個Professor就係呢個Vocal School嘅Head of Department，佢今次叫我返去唱一首歌，希望可以幫手籌款畀未來讀碩士嘅學生。呢個老師係我嘅恩師，係我人生嘅大伯樂。」
情意結演出
活動上，Hedy演唱《Quando m'en Vo’》一曲，她解釋：「呢首就係我入演藝學院、喺呢個舞台第一首Opera表演嘅獨唱歌。」她坦言於演藝畢業多年，這次演出感覺特別，她續說：「喺度特別有情意結，因為畢咗業咁多年，返去母校重回同一個舞台唱畀老師聽，好想老師會為我感到自豪，覺得我係Good Girl，哈哈！以前我自己企喺同一個舞台唱歌，唔係好幻想到咁多年後嘅自己會係點，到𠵱家成為一個Performer，我可以真正享受到呢個舞台，誇張啲講，我希望可以為學生們籌到款，幫到佢哋！」
「為我讀唱歌」
除此之外，當晚有一位她的小粉絲，亦專誠到場欣賞她的演出，令她十分感動，她直言：「佢同我講佢由中一、中二開始，喺IG聽我唱歌，因為聽咗我唱歌，所以佢都決定要入演藝學院讀唱歌、讀聲樂，我就覺得：『嘩！原來會有一個小女孩因為我而決定去讀唱歌，同我行同一條路。』嗰刻我好感動，真係冇諗過自己可以做到呢一點！」
