發佈時間：14:37 2024-10-30
昨晚（10月29日）播出的《巾幗4》第七集，主要劇情講述柴十七（黎耀祥飾）與七爺（胡定欣飾）再度鬧翻。事緣向來看上海名人大紅姐（康華飾）不順眼的七爺，在與對方洽談房地產買賣生意時大耍機心，口裏說要將買入價提高至888萬大洋，實質是要令貪錢的大紅姐推卻其他潛在買家，之後再以拖字訣令大紅姐在別無選擇的情況下、以388萬大洋賤賣房子；七爺的無良及算死草令柴十七亦看不過眼，因而與七爺大吵一場，狠批七爺「人無恥則無敵」之餘，並嬲爆慨嘆：「到今日我先徹頭徹尾知道呢個賤字點寫。」被彈至一文不值的七爺，最終嬲爆當眾脫下華麗大衣…
52歲康華保養得宜
出名保養得宜、現年52歲的康華，昨晚出場時先以一雙修長美腿入鏡，甚有氣派，而為角色梳了一頭古典波浪頭的她，先後以兩大貴氣造型亮相，分別是暗紅色絨毛領大衣，及黑金長旗袍配毛毛披肩，眉頭眼額甚是霸氣之餘還夾雜著別具女人味的嫵媚，難怪獲網民再度認證是美魔女。
昨晚講數場口之所以好看，是手頭上物業大受歡迎的大紅姐原本佔盡上風，更乘機搞小動作坐地起價；可惜七爺不是省油的燈，表面豪爽地大幅加價令大紅姐心猿意馬、更藏不住喜悅露出市儈樣，但實則是要利誘大紅姐親手打斷米路…最終知道自己慘遭玩弄的小紅姐，雖然已追不回金錢上的損失，但仍輸人唔輸陣地字字鏗鏘道出七爺的詭計，期間更不忘向七爺怒目而視予以指責，表情變化極為吸引。
圈中隱形小富婆 唔聲唔聲手持4個物業
康華劇中角色做生意雖然未夠精明，但現實中的她卻盛傳是圈中隱形小富婆，除早前被指斥資八位數買入一個五房單位外，2012年又傳過她當時已買入兩個荃灣單位打通自住，保守估計現時手揸4個物業！康華受訪時坦言很喜歡「大紅姐」這個角色，除了因為角色性格極有義氣，亦因為與真實的自己有共通點，並笑言可能是監製嘟嘟巧妙安排：「呢個角色都好接近平時嘅我，可能嘟嘟知道我鍾意投資物業。」
康華坦言疫情後對投資興趣更濃，閒時更有進修投資課程，並謙稱自己依然是初哥：「我都仲係學習緊，唔係叻架。唔使開工時我都會進修吓投資課程，除咗香港，都會投入（資）吓其他地方。當然拍戲係我first priority，始終我都係好鍾意做戲。」
為着旗袍 開拍前一個月減磅瘦身
康華又大讚《巾幗4》梳化團隊相當專業，除了每位演員的造型都很出色，所有細緻位也做得很好：「呢個角色set頭需要好長時間，要梳成個半鐘。我記得第一次造型做咗六個鐘頭，試咗好多次，嘟嘟每個細節位都好認真，連手指甲都揀咗好多次先至襯到晒啲衫，我覺得公司拍嘢真係愈嚟愈認真，呢種認真精神令到演員更有士氣。」康華又笑言著旗袍是「大紅姐」一大挑戰，為了效果，故開拍前一個月已著力減磅瘦身，認真專業。
