發佈時間：18:03 2024-10-28
《今天is the day劉德華巡迴演唱會》於吉隆坡站的4場演出經已順利完成。身在當地的姜皓文（黑仔）夫婦也專程去睇Show，是作為兩公婆生日和結婚紀念的慶祝活動之一。而心水清的華仔，竟然在演唱會上，分別送上《暗裡著迷》和《心肝寶貝》作為他們的生日和結婚紀念禮物，令黑仔和太太既驚喜又興奮！
慶祝月份
10月份對黑仔（姜皓文）兩公婆來說，絕對是一個慶祝的月份，皆因太太殷寧在本月24號生日，而25號就是兩人的結婚周年，跟住26日就輪到是黑仔的生日，所以昨晚（27日）兩公婆一齊睇華仔演唱會，是他們其中一個慶祝節目。
雙重驚喜
華仔近3小時的演出，令現場觀眾看得投入，而且歌迷的熱情，更令華仔不得不說一句：「大家的反應，簡直是演唱會天花板！」期間心水清的華仔，竟然在演唱會上，分別送上《暗裡著迷》和《心肝寶貝》這兩首歌作為黑仔夫婦的生日及結婚紀念禮物，他還跟現場觀眾一齊合唱生日歌，令黑仔和太太既驚喜又興奮，並很感謝華仔這份心意。
睇多一次
黑仔欣喜的說：「能夠睇到華哥嘅演唱會，已經係今年份量十足嘅生日禮物，我都係第一次喺馬來西亞睇演唱會，冇諗過驚喜陸續有嚟，《暗裡著迷》係我最愛聽嘅華哥歌曲之一，至於另一首《心肝寶貝》，係祝賀我同太太嘅結婚紀念，實在太感恩，感謝華哥嘅所有祝福！其實睇到華哥喺台上又唱又跳，佢嘅魄力令我十分佩服！睇完呢個演唱會後，覺得睇一次係唔夠，希望佢喺香港舉行演唱會時，我哋可以再睇一次。」
再次攻蛋
睇完Show後，黑仔收到不少Fans留言表示，多得他的「生日」，讓他們可以聽到華仔在吉隆坡站唱《暗裡著迷》這首歌。而華仔對於今次在馬來西亞的4場演出能圓滿舉行，並深受觀眾感動，他直言：「無話可說，無論係一班觀眾、定台前幕後嘅工作人員，真係好感謝大家嘅愛戴同支持，下一站見！」嚟緊10月31日至11月3日，劉德華將到台北小巨蛋舉行4場演唱會，相隔11年再次攻蛋、跟久違了的歌迷見面，期待！
